Category: اہم خبریں

راولپنڈی: سکیورٹی فورسز نے ڈیرہ اسماعیل خان میں آپریشن کرتے ہوئے 7 خوارج جہنم واصل کر دیئے، فائرنگ کے تبادلہ میں ایک میجر شہید ہو گئے۔آئی ایس پی آر کے مطابق ڈیرہ اسماعیل خان کے علاقے درابن میں انڈین پراکسی فتنہ الخوارج سے تعلق رکھنے والے خوارج کی موجودگی کی اطلاع ملی تھی، سکیورٹی فورسز نے فوری طور پر علاقے کو گھیرے میں لے کر کارروائی شروع کی، اس دوران دہشت گردوں نے شدید فائرنگ کی، تاہم پاکستانی جوانوں نے بھرپور جوابی کارروائی کرتے ہوئے تمام دہشت گردوں کو انجام تک پہنچا دیا۔پاک فوج کے ترجمان نے بتایا ہے کہ یہ تمام دہشت گرد سکیورٹی فورسز، قانون نافذ کرنے والے اداروں اور عام شہریوں پر حملوں میں ملوث تھے اور ملک میں دہشت گردی کی متعدد کارروائیوں کی منصوبہ بندی کر رہے تھے، مارے گئے دہشت گردوں سے اسلحہ اور گولہ بارود بھی برآمد ہوا ہے، علاقے میں کلیئرنس آپریشن جاری ہے۔ترجمان پاک فوج کی جانب سے یہ بھی بتایا گیا ہے کہ کوئٹہ سے تعلق رکھنے والے پاکستانی فوج کے 30 سالہ بہادر افسر میجر سبطین حیدر نے بہادری اور دلیری کی مثال قائم کرتے ہوئے دشمن کا مقابلہ کیا، وہ اپنے دستے کی قیادت کرتے ہوئے فرنٹ لائن پر لڑتے رہے اور مادرِ وطن کی خاطر جامِ شہادت نوش کیا۔آئی ایس پی آر کے مطابق سکیورٹی فورسز بھارتی حمایت یافتہ دہشت گردوں کے خاتمے کے لیے پرعزم ہیں، پاک فوج کے بہادر سپوتوں کی قربانیاں قوم کے حوصلے بلند کر رہی ہیں اور ہم آخری خوارج کے خاتمے تک اپنی جدوجہد جاری رکھیں گے۔

پشاور: سکریٹری جنرل پی ٹی آئی سلمان اکرم راجا نے علی امین گنڈا پور کو خیبر پختونخوا کی وزارت اعلیٰ سے ہٹائے جانے کی تصدیق کرتے ہوئے اعلان کیا ہے کہ سہیل آفریدی کو صوبے کا نیا وزیر اعلیٰ نامزد کیا گیا ہے۔خیبرپختونخوا کے نامزد وزیرِ اعلیٰ سہیل آفریدی کا تعلق ضلع خیبر سے ہے ، وہ 2024 کے عام انتخابات میں پہلی بار ضلع خیبرسے رکن صوبائی اسمبلی منتخب ہوئے، سہیل آفریدی کافی عرصے تک انصاف اسٹوڈنٹس فیڈریشن کے پی کے صدر رہے۔وہ موجودہ حکومت میں وزیرِاعلیٰ کے معاون خصوصی کمیونیکیشن اینڈ ورکس رہے، صوبائی کابینہ میں تبدیلی کے بعد سہیل آفریدی کو وزیر برائے ہائر ایجوکیشن بنایا گیا۔انہوں نے بی ایس اکنامکس کی ڈگری حاصل کی جبکہ پیشے کے اعتبار سے وہ بزنس مین ہیں، عام انتخابات میں انہوں نے بڑے مارجن کے ساتھ مسلم لیگ (ن) کے بلاول آفریدی اور جے یو آئی کے حمید اللہ جان آفریدی سمیت دیگر کو شکست دی تھی۔

ٹیمیں گھر گھر جا کر متاثرہ خاندانوں سے معلومات اکٹھی کر رہی ہیں :عثمان طاہر جپہ
مظفرگڑھ:وزیراعلیٰ پنجاب مریم نواز شریف کی ہدایت پر سیلاب سے متاثرہ علاقوں میں نقصانات کے تخمینے کے لیے سروے کا عمل ضلع مظفرگڑھ میں تیزی سے جاری ہے ۔ ڈپٹی کمشنر عثمان طاہر جپہ کی نگرانی میں مختلف محکموں پر مشتمل ٹیمیں متاثرہ علاقوں میں سرگرمِ عمل ہیں۔ محکمہ ریونیو، زراعت، لائیو اسٹاک، اربن یونٹ اور پاک فوج کے افسران و اہلکاروں پر مشتمل ٹیمیں گھر گھر جا کر متاثرہ خاندانوں سے معلومات اکٹھی کر رہی ہیں تاکہ نقصانات کا درست اور شفاف تخمینہ لگایا جا سکے ۔ ڈپٹی کمشنر عثمان طاہر جپہ نے کہا کہ ضلعی انتظامیہ شفاف سروے کی بنیاد پر وزیراعلیٰ پنجاب کے ریلیف کیمپس پیکجز کی منصفانہ تقسیم کو یقینی بنائے گی تاکہ متاثرہ عوام کو حکومتِ پنجاب کی جانب سے بروقت امداد فراہم کی جا سکے ۔

جب تک دونوں پارٹیوں کی قیادت چاہے گی سسٹم کو کچھ نہیں ہو گا ہمارا مقصد کسی سے معافی منگوانا نہیں ، ندیم افضل ، دنیا مہر بخاری کیساتھ میں گفتگو
لاہور :مسلم لیگ ن کے رہنما سینیٹر رانا ثنا اللہ نے کہا کہ پنجاب میں معاملہ بلاول بھٹو کی پریس کانفرنس کے بعد شروع ہوا ، بلاول کی تجاویز سے مریم نواز نے اتفاق نہیں کیا تو بات شروع ہوئی ،بلاول پیپلز پارٹی ، مریم نواز ن لیگ کی لیڈر ہیں ، سیاست میں دونوں طرف سے باتیں ہوا کرتی ہیں ، ایک طرف سے پریس کانفرنس ہو گی تو دوسری طرف سے بھی ہو گی۔دنیا نیوز کے پروگرام دنیا مہر بخاری کے ساتھ میں گفتگو کرتے ہوئے انہوں نے کہا صدر آصف زرداری اور میاں نواز شریف دونوں طرف سے اپنی اپنی پارٹیوں کے بڑے ہیں ، جب انہوں نے آپس میں بات کی تو یہ معاملہ ختم ہو جائے گا ، شہباز شریف وطن واپس آ گئے ہیں، وہ بھی صدر سے گفتگو کریں گے ، وہ زرداری سے بات کریں گے تو معاملہ یہیں تھم جائے گا ، کوئی سسٹم کو لپیٹ نہیں سکتا ، جب تک دونوں پارٹیوں کی قیادت چاہے گی سسٹم کو کچھ نہیں ہو گا ، سیاست میں اس طرح کے جھٹکے آتے رہیں گے لیکن نظام چلتا رہے گا ۔ رہنما پی پی پی و سیکرٹری اطلاعات ندیم افضل چن نے کہا کہ پنجاب کے حوالے سے بڑے سنجیدہ ایشوز موجود ہیں ، مریم نواز کی جانب سے بہت سخت باتیں کی گئیں ، پنجاب کے حوالے سے مسائل تو موجود ہیں ، وزیر اعلی ٰ مریم نواز صوبائی سطح پر اتحادیوں سے کسی طرح کی مشاورت نہیں کرتیں ،میٹنگ کے اندر بھی ہم سوالات اٹھاتے ہیں ، ہر مشکل وقت میں ہم نے وفاقی حکومت کو سپورٹ کیا ہے ۔ہمارا مقصد کسی سے معافی منگوانا نہیں ۔

پایہ تکمیل کیلئے 17اکتوبر کی ڈیڈ لائن، واٹر کولیکشن،سیٹلمنٹ،فلٹریشن کے بعد زیر زمین پانی میں شامل ہوجائے گا،وزیر آبپاشی
ملتان :صوبائی وزیر آبپاشی کاظم علی پیر زادہ نے اریگیشن ریسرچ انسٹیٹیوٹ کا دورہ کیا اور 100ملین روپے لاگت سے بارش کے پانی کو زیر زمین محفوظ بنانے کیلئے لاہور سمیت صوبہ بھر میں 40کنوؤں کی تعمیر کے منصوبے کا افتتاح کیا ، چیف انجینئر ریسرچ انسٹیٹیوٹ ڈاکٹر ذاکر سیال و دیگر افسروں نے صوبائی وزیر کو منصوبہ بارے بریفنگ دی ۔ صوبائی وزیر آبپاشی کاظم علی پیر زادہ نے بتایا کہ وزیر اعلیٰ کے ویژن کے مطابق بارش کا پانی زیر زمین محفوظ بنانے کیلئے منصوبہ کی تکمیل کے لئے 17 اکتوبر کی ڈیڈ لائن مقرر کی گئی ہے ، ری چارج ویلز مختلف مراحل میں ری چارج ہونگے جس میں واٹر کولیکشن، واٹر سیٹلمنٹ، واٹر فلٹریشن کے بعد یہ زیر زمین پانی میں شامل ہو جائے گا، انہوں نے ریسرچ ونگ کو ہدایت کی کہ پراجیکٹ کی بروقت تکمیل یقینی بنائی جائے ۔ صوبائی وزیر آبپاشی کاظم علی پیر زادہ نے کہا کہ منصوبہ کے تحت اریگیشن سیکرٹریٹ لاہور میں دو ریچارج ویلز بنائے جا رہے ہیں جن پر کام تیزی سے جاری ہے ، مختلف اضلاع میں ان کنوؤں کی گہرائی مختلف ہے ، پراجیکٹ کی تکمیل سے بارش کا پانی محفوظ بنانے کے ساتھ زیر زمین پانی کی سطح بلند ہونے میں مدد ملے گی ۔ صوبائی وزیر آبپاشی نے ہدایت کی کہ ملتان ، ڈیرہ غازی خان اور بہاولپور میں دریاؤں اور آبی گذرگاہوں کے حفاظتی پشتوں کا جیو ٹیکنیکل سروے آئندہ دو ہفتوں میں مکمل کرکے رپورٹ پیش کی جائے ۔

اسلام آباد میں جوائنٹ وینچرز ماڈل پر سرمایہ کاری کی جاسکتی :محمد علی رندھاوا
اسلام آباد : چیئرمین سی ڈی اے و چیف کمشنر اسلام آباد محمد علی رندھاوا سے منیجنگ ڈائریکٹر او پی ایف محمد افضال بھٹی اور اوورسیز انویسٹرز نے منگل کے روز سی ڈی اے ہیڈکوارٹرز میں ملاقات کی۔ ملاقات میں ممبر پلاننگ و ڈیزائن ڈاکٹر خالد حفیظ، ممبر انوائرمنٹ اسفندیار بلوچ، ڈی جی بلڈنگ کنٹرول، ڈی جی ریسورس سمیت دیگر سنئیر افسران نے شرکت کی۔ ملاقات میں اسلام آباد میں بین الاقوامی سرمایہ کاری کے فروغ سمیت مختلف منصوبوں میں پارٹنرشپ کے امکانات پر تفصیلی تبادلہ خیال کیا گیا۔ چیئرمین سی ڈی اے محمد علی رندھاوا نے کہا کہ اسلام آباد میں سرمایہ کاری کے حوالے سے بہترین مواقع موجود ہیں۔ انہوں نے کہا کہ اسلام آباد میں سرمایہ کاروں کے ساتھ جوائنٹ وینچرز ماڈل کے تحت مختلف منصوبوں میں سرمایہ کاری کی جاسکتی ہے۔ چیئرمین سی ڈی اے نے کہا سی ڈی اے سرمایہ کاروں کو تمام ممکن سہولیات فراہم کررہا ہے ۔ انہوں نے کہا کہ اسلام آباد میں ہوٹل و میزبانی کی صنعت کو فروغ دینے کے منصوبوں پر کام جاری ہے ۔چیئرمین سی ڈی اے نے کہا کہ شہریوں کو جدید ترین سپورٹس سہولیات کیلئے مختلف منصوبوں پر بھی کام کیا جارہا ہے ۔ انہوں نے کہا کہ اسلام آباد میں اولمپک ویلیج کی تعمیر کے حوالے سے فیزبیلٹی سٹڈی پر کام ہو رہا ہے ۔سرمایہ کاروں کے وفد نے ہوٹل و میزبانی کی صنعت سمیت مختلف منصوبوں میں گہری دلچسپی کا اظہار کیا۔

سرگودھا: چیئرمین دنیا میڈیا گروپ میاں عامر محمود نے کہا ہے کہ ہمارا مقصد بہتر پاکستان تشکیل دینا ہے، نظام کو بدلنے کیلئے آواز بلند کرنا ہوگی، صوبے چھوٹے کرنے سے اخراجات کم ہوں گے اور وسائل لوگوں تک پہنچیں گے۔ایسوسی ایشن آف پرائیویٹ سیکٹر یونیورسٹیز آف پاکستان (ایپ سپ) کے زیر اہتمام آگاہی سیمینار “2030 کا پاکستان: چیلنجز، امکانات اور نئی راہیں” سے خطاب کرتے ہوئے چیئرمین دنیا میڈیا گروپ میاں عامر محمود کا کہنا تھا کہ ملک اس لئے بنتے ہیں کہ وہ اپنی قوم کی بہتر فلاح وبہبود کر سکیں، ایسے ملک بھی ہیں جن کی آبادی ڈیڑھ سو کروڑ ہے، بڑے ملک خود کو سٹیٹس اور پھر اس کو لوکل گورنمنٹس میں تقسیم کرتے ہیں، لوکل گورنمنٹ آپ کے گھر کی دہلیز پر مسائل کو حل کرتی ہے۔انہوں نے کہا ہے کہ پاکستان 25 کروڑ آبادی کا ملک ہے اور صرف 4 صوبے ہیں، پنجاب باقی تمام تین صوبوں سے بڑا ہے، بلوچستان رقبے کے لحاظ سے بڑا ہے جس کی وجہ سے وہاں محرومیاں ہیں۔