Category: اہم خبریں

لِنکڈ ان ، نوکری گلف اور دیگرویب سائٹس پرلوگوں کوہدف بنایاجاتا، پُرکشش تنخواہ سے انگیج کیاجاتا،حیلے بہانوں سے ملکی حساس اداروں ، اہم عمارتوں کی تصاویر اور لوکیشنز منگوائی جاتیں سروے اورریسرچ کی آڑ میں قومی منصوبوں کی تصاویر اور دیگر معلومات حاصل کی جاتیں،قانون نافذ کرنیوالے اداروں کا بھارتی ویب سائٹس بلاک کرنے کیلئے پی ٹی اے کوخط،ملک گیر مہم کا آغاز

اسلام آباد:پاکستانی اداروں کے پاس مصدقہ معلومات ہیں کہ دشمن ملک کی ایجنسیاں آن لائن نوکری کا جھانسہ دے کر پاکستان کی حساس تنصیبات کی معلومات حاصل کرنے کی کوشش کر رہی ہیں اور اس مقصد کے لیے انھوں نے کچھ ویب سائٹس بنا رکھی ہیں ،قانون نافذ کرنے والے اداروں کی جانب سے پاکستان ٹیلی کمیونیکیشن اتھارٹی کو مراسلہ لکھا گیاہے کہ بھارتی آن لائن ویب سائٹس کو بلاک کیا جائے جو جعلی کمپنیوں کے نام سے پُرکشش تنخواہ آفر کر کے پاکستانیوں کو انگیج کرنے کی کوشش کر رہی ہیں اور پاکستان سے متعلق اہم اداروں اور اُن کی لوکیشن سے متعلق شہریوں کو ٹُول کے طور پر استعمال کرنے کی کوشش کر رہی ہیں ۔ اس حوالے سے پاکستان ٹیلی کمیونیکیشن اتھارٹی نے نوجوانوں کی آگاہی کے لیے ایک مُلک گیر مہم کا بھی آغاز کر دیا ہے ۔ ذرائع نے بتایا کہ غیر ملکی خفیہ ایجنسیاں آن لائن کمپنیاں بنا کر نوجوانوں کو نوکری پر رکھتی ہیں اور پھر مختلف حیلوں اور بہانوں سے ملکی حساس اداروں اور اہم عمارتوں کی تصاویر اور لوکیشنز منگواتی ہیں۔ لِنکڈ ان پلیٹ فارم ، نوکری گلف اور اس جیسی دیگر ویب سائٹس پر لوگوں کو ہدف بنایا جارہا ہے ۔نوکری گلف جیسی ویب سائٹ بھارت سے چلائی جارہی ہیں۔ان ویب سائٹس پر لوگوں نے اپنا پروفائل بنایا ہوتا ہے جن میں نوکری کے خواہش مند افراد کی تفصیلات موجود ہوتی ہیں ۔ پاکستان ٹیلی کمیونی کیشن اتھارٹی (پی ٹی اے ) نے ملک بھر میں نوجوانوں کے لیے بھر پور مہم کا آغاز کردیا تاکہ وہ ان ملک دشمن ایجنسیوں کا آلہ کار بننے سے بچ سکیں ۔ پی ٹی اے نے کالز پر چلنے والے پیغام میں یہ کہا ہے کہ دشمن کی خفیہ ایجنسیوں کی سازش سے بچیں ، یہ ایجنسیاں سوشل میڈیا پلیٹ فارمز پر کمپنیوں کے ناموں سے نوجوانوں کو نوکریاں آفر کرتی ہیں، سروے اور ریسرچ کی آڑ میں قومی منصوبوں کی تصاویر اور لوکیشن حاصل کرتی ہیں، یہ معلومات مُلک اور شہریوں کے خلاف استعمال ہو سکتی ہیں ، ذمہ دار بنیں اور دُشمن کے ایجنڈے سے با خبر رہیں۔

قاہرہ: ڈونلڈ ٹرمپ کے 20 نکاتی غزہ امن منصوبے پر فریقین کے درمیان مصر میں جاری بالواسطہ مذاکرات کے دوران حماس نے اپنی شرائط پیش کردیں۔امریکی نشریاتی ادارے سی این این کے مطابق حماس نے اسرائیل کے ساتھ جنگ بندی کے معاہدے کے لیے اپنی اہم شرائط واضح کر دی ہیں جس میں حماس کا کہنا ہے کہ وہ ایسے معاہدے کے لیے کوشاں ہے جو فلسطینی عوام کی خواہشات اور بنیادی مطالبات کی عکاسی کرے۔حماس کے سینئر رہنما اور ترجمان فوزی برھوم نے بتایا کہ ہمارے مذاکراتی وفود اس بات کے لیے کام کر رہے ہیں کہ تمام رکاوٹوں کو دور کیا جا سکے اور ایسا معاہدہ سامنے آئے جو فلسطینیوں کی امنگوں پر پورا اترے۔ان کے بقول حماس وفد نے جنگ بندی معاہدے کے لیے درج ذیل شرائط پیش کی ہیں:
مستقل اور جامع جنگ بندی
اسرائیلی افواج کا غزہ سے مکمل انخلا
انسانی ہمدردی کی امداد کا بلا روک ٹوک داخلہ
بے گھر فلسطینیوں کی واپسی کی ضمانت
قیدیوں کے منصفانہ تبادلے کامعاہدہ
غزہ کی تعمیر نو کا فوری آغاز
حماس کے ترجمان فوزی برھوم نے اسرائیلی وزیراعظم پر الزام عائد کیا کہ نیتن یاہو ماضی کی طرح اس بار بھی مذاکراتی عمل کو سبوتاژ کرنے کی کوشش کرسکتے ہیں، ہم جانتے ہیں کہ نیتن یاہو ہر مرحلے پر جان بوجھ کر رکاوٹ ڈالتے رہے ہیں تاکہ کسی پائیدار امن معاہدے تک نہ پہنچا جا سکے۔حماس رہنما نے مزید کہا کہ فلسطینی عوام اپنی جدوجہد، اتحاد اور انصاف پر مبنی موقف پر قائم ہیں اور کسی بھی ایسے منصوبے کو ناکام بنائیں گے جو ان کے قومی مقصد کو کمزور کرنے کی کوشش کرے۔یاد رہے کہ یہ مذاکرات اس وقت ہو رہے ہیں جب غزہ میں کئی ماہ سے جاری اسرائیلی فوجی کارروائیوں کے نتیجے میں شدید انسانی بحران پیدا ہو چکا ہے۔

ملائشین وزیراعظم انورابراہم نے رہائشگاہ پرمجوشی سے استقبال کیا،بے حد خوش ،دورہ تعلقات کو مضبوط کریگا:وزیراعظم شہباز شریف ہم منصب سے ملاقات کرینگے ، وفود کی سطح پر بات چیت بھی ہوگی ، مختلف معاہدوں پر دستخط کئے جائیں گےاسلام آباد ،لاہو: وزیراعظم شہباز شریف 2روزہ سرکاری دورے پر ملائشیا کے دارالحکومت کوالالمپور پہنچ گئے ، بنگا رایا بین الاقوامی ہوائی اڈے پر ملائشیا کے وزیر اطلاعات و کمیونیکیشنز فہمی فادضل، پاکستانی ہائی کمشنر سید احسن رضا شاہ اور سفارتی عملے نے وزیراعظم اورا ن کے وفد کا شاندار استقبال کیا۔وزیراعظم کو شاہی پروٹوکول کے ساتھ ملائشین وزیراعظم انورابراہیم کی رہائش گاہ پرلے جایاگیا،اس موقع پرکوالالمپور کی شاہراہوں کو پاکستانی اور ملائشیائی پرچموں سے سجایاگیاتھا ۔تفصیلات کے مطابق وزیراعظم شہباز شریف ملائشیا کے وزیراعظم انور ابراہیم کی دعوت پر 2روزہ سرکاری دورے پر گزشتہ روز کوالالمپور پہنچے ، نائب وزیراعظم و وزیر خارجہ اسحاق ڈار ، وفاقی وزیر اطلاعات و نشریات عطا اللہ تارڑ اور وزیراعظم کے معاون خصوصی طارق فاطمی وزیر اعظم کے ہمراہ ہیں،انورابراہیم نے اپنی رہائش گاہ آمد پر شہبازشریف کا گرمجوشی سے استقبال کیا اور خوش آمدید کہا، شہباز شریف نے پرتپاک استقبال پر شکریہ ادا کرتے ہوئے کہا کہ ملائشیا آ کر بے حد خوشی محسوس ہو رہی ہے اور یہ دورہ دونوں ممالک کے تعلقات کو مزید مضبوط کرے گا۔شہباز شریف نے اپنے ایکس پیغام میں کہاکہ ملائشیا آ کر بے حد خوشی ہو رہی ہے ، پر تپاک استقبال پر ملائشیا کے وزیر اعظم کا شکریہ ادا کرتا ہوں۔وزیراعظم اپنے دورے کے دوران ملائشیا کے وزیر اعظم سے ملاقات کریں گے جبکہ دونوں ممالک کے درمیان وفود کی سطح پر بھی بات چیت ہو گی ،دونوں ممالک کے درمیان مختلف شعبوں میں تعاون کے معاہدوں اور مفاہمتی یادداشتوں پر دستخط بھی ہوں گے ۔دونوں رہنما تجارت، آئی ٹی اور ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت میں دوطرفہ تعاون کو بڑھانے پر بھی غور کریں گے ، عوام سے عوام کے روابط بڑھانے کے لئے نئے تعاون کے مواقع تلاش کرنے پر گفتگو ہوگی۔ دوسری طرف وزیر اعظم شہباز شریف نے گزشتہ ہفتے دورہ لندن کے دوران تعلیمی میدان میں ورلڈ ریکارڈ ہولڈر پاکستانی نژاد طالبہ ماہ نور چیمہ سے ملاقات کی اور اے لیول کے امتحانات میں 24 مضامین میں انفرادی طور پر امتیازی گریڈ کے ساتھ کامیابی حاصل کرنے اور شاندار کارکردگی دکھانے پر دلی مبارکباد دیتے ہوئے کہاکہ ماہ نور چیمہ ملک و قوم کا قیمتی اثاثہ اور نوجوان نسل کیلئے مشعلِ راہ ہیں۔ انہوں نے ماہ نور چیمہ کو تحائف بھی پیش کئے ۔