Category: اہم خبریں

اسلام آباد: پاکستان پیپلزپارٹی اور مسلم لیگ ن کے درمیان سیاسی کشیدگی برقرار ہے، اور پیپلز پارٹی کے ارکان سینیٹ کے بعد قومی اسمبلی کے اجلاس سے بھی واک آؤٹ کرگئے۔قومی اسمبلی کے اجلاس میں خطاب کرتے ہوئے پاکستان پیپلز پارٹی کے سینئر رہنما راجہ پرویز اشرف کا کہنا کہ میرا تعلق پنجاب سے ہے لیکن ہم سب سے پہلے پاکستانی ہیں،کوئی اس بھول میں نہ رہے کہ پیپلز پارٹی کو دیوار سے لگا دے گا، ہمیں سمجھ نہیں آتی کہ متنازعہ بیانات دینے کی آخر وجہ کیا ہے۔انہوں نے کہا کہ ایسا نہ ہو کہ پھر صوبائیت کی بدبو پھیلا دی جائے، ہم تو پاکستان کھپے کا نعرہ لگانے والے لوگ ہیں،اس سے قبل پاکستان پیپلز پارٹی کے سینیٹرز نے ایوان بالا سے بھی واک آؤٹ کیا، اور وزیراعلیٰ پنجاب مریم نواز کے بیان پر شدید احتجاج ریکارڈ کرایا۔واضح رہے کہ حال ہی میں وزیراعلیٰ پنجاب مریم نواز نے پیپلز پارٹی پر تنقید کرتے ہوئے کہا تھا کہ اپنے مشورے اپنے پاس رکھیں، ہر مسئلے کا بینظیر انکم سپورٹ پروگرام نہیں ہے، اس کے بعد سے دونوں جماعتوں کے درمیان کشیدگی شروع ہوگئی، خصوصاً سندھ اور پنجاب کی حکومتیں آمنے سامنے ہیں۔ وزیراطلاعات پنجاب عظمیٰ بخاری کوئی بیان جاری کرتی ہیں، تو سندھ سے شرجیل میمن اور دیگر کی جانب سے جواب آ جاتا ہے، عظمیٰ بخاری نے شرجیل میمن کا مناظرے کا چیلنج بھی قبول کرلیا ہے۔دوسری جانب صدر مملکت آصف علی زرداری نے بھی اس سیاسی کشیدگی کا فوری نوٹس لیتے ہوئے وفاقی وزیر داخلہ محسن نقوی کو کراچی طلب کرلیا ہے، جہاں اس حوالے سے مشاورت کی جائےگی۔علاوہ ازیں سابق وزیراعظم نواز شریف نے اس معاملے پر وزیراعلیٰ پنجاب مریم نواز کے مؤقف کی حمایت کرتے ہوئے کہا ہے کہ انہیں اپنے صوبے کے حوالے سے کسی بھی بات کا جواب دینے کا پورا حق حاصل ہے۔

وہاڑی :جماعت اسلا می کی جانب سے وہاڑی میں اسرائیلی جارحیت اور صمود فلوٹیلا پر حملے کیخلاف بھرپور احتجاجی ریلی نکالی گئی۔ ریلی کی قیادت ضلعی امیر جماعت اسلامی چوہدری طارق محمود نے کی۔ اس موقع پر شرکاء نے اسرائیل کیخلاف شدید نعرے بازی کی اور عالمی برادری سے فوری ایکشن لینے کا مطالبہ کیا۔مقررین نے کہا کہ گلوبل صمود فلوٹیلا پر حملہ نہ صرف عالمی قوانین کی خلاف ورزی ہے بلکہ انسانیت کے خلاف کھلی جارحیت بھی ہے ۔ ان کا کہنا تھا کہ اسرائیلی حکومت اور وزیراعظم نیتن یاہو عالمی دہشت گرد ہیں جنہیں عالمی عدالت انصاف میں کٹہرے میں لایا جانا چاہیے ۔ریلی کے شرکا نے یرغمال بنائے گئے افراد کی فوری رہائی کا مطالبہ کرتے ہوئے کہا کہ اگر عالمی برادری نے اسرائیلی بربریت کے خلاف عملی اقدامات نہ اٹھائے تو دنیا کا امن مزید خطرے میں پڑ جائے گا۔

اسلام آباد:چیئرمین سی ڈی اے و چیف کمشنر اسلام آباد محمد علی رندھاوا کی زیر صدارت شہر میں کیش لیس اکانومی کے فروغ کے حوالے سے اہم اجلاس ہوا۔ اسلام آباد میں کیش لیس اکانومی کو فروغ دینے کے حوالے سے اب تک کئے گئے اقدامات کا جائزہ لیا گیا۔ ممبر فنانس نے بریفنگ دیتے ہوئے بتایا کہ کیش لیس اکانومی کے عمل کو تیز تر بنا رہے ہیں۔ ہر قسم کی ادائیگیوں اور وصولیوں کیلئے ڈیجیٹل پیمنٹ سسٹم بشمول راست کیو آر کوڈ کو متعارف کرانے کو ضروری قرار دے دیا ہے ۔ اجلاس کو بتایا گیا کہ اسلام آباد میں کیش لیس اکانومی اقدامات کے تحت شہر بھر میں ابتک 5000 سے زائد تاجر و دوکاندار راست کیو آر کوڈ سسٹم سے منسلک ہوچکے ہیں اور اس سلسلے میں سیکٹر H-9 اور سیکٹر G-6 میں واقع ہفتہ وار بازاروں میں ڈیجیٹل ادائیگیوں کیلئے کیو آر کوڈ سسٹم متعارف ہوچکا ہے ۔ چیئرمین سی ڈی اے نے کہا کہ عوام میں آگاہی پیدا کرنے اور ڈیجیٹل ادائیگیوں کو فروغ دینے کیلئے ایک مؤثر حکمت عملی اپنائی جائے ۔ سی ڈی اے اورانتظامیہ بطور معاون بینکوں، تاجر برادری اور کسٹمرز کے مابین ہم آہنگی پیدا کر رہا ہے اور اس سلسلہ میں بینکس کی فیلڈ ٹیمیں تاجروں اور صارفین کو بہتر رہنمائی فراہم کریں۔

اسلام آباد: این ڈی ایم اے نے وفاقی دارالحکومت سمیت پنجاب، خیبر پختونخوا، سندھ اور گلگت بلتستان میں بارشوں کا الرٹ جاری کردیا۔این ڈی ایم اے حکام کا کہنا تھا کہ اگلے 12 سے 24 گھنٹوں کے دوران وقفے وقفے سے بارشوں کا امکان ہے،دریائے جہلم،راوی، ستلج کے بالائی علاقوں میں بھی موسلاد اور ہلکی بارشیں ہوسکتی ہیں۔اِسی طرح راولپنڈی، مری، گلیات، اٹک، چکوال، جہلم، میانوالی ،حافظ آباد، سرگودھا اور خوشاب چترال، دیر، ہری پور، کوہاٹ، کوہستان، خیبر، کرم اور مانسہرہ ، مہمند، نوشہرہ، مالاکنڈ، چارسدہ، ابیٹ آباد، بنوں، بونیر میں بھی بادل برسیں گے۔حکام نے مزید بتانا تھا کہ کراچی، جامشورو، ٹھٹھہ، بدین، سجاول، تھرپارکر اور عمر کوٹ میں بھی بارش متوقع ہیں جب کہ گلگت بلتستان اور آزاد کشمیر کے پہاڑی علاقوں میں لینڈ کے واقعات کا خدشہ ہے، شہریوں کو اِس حوالے سے انتباہ جاری کردیا گیا۔دوسری جانب خیبرپختونخوا کے ضلع کرک کے پلوسہ سر اور ملحقہ علاقوں میں تیز ہواؤں کیساتھ موسلادھار بارش اور شدید ژالہ باری ہونے سے موسم خوشگوار اور گرمی کا زور ٹوٹ گیا۔

اسلام آباد،راولپنڈی :سپیشل جج سنٹرل شاہ رخ ارجمند نے بانی پی ٹی آئی اور ان کی اہلیہ بشریٰ بی بی کے خلاف توشہ خانہ ٹو کیس کی سماعت بغیر کارروائی کے 6 اکتوبر تک ملتوی کرتے ہوئے سماعت روزانہ کی بنیاد پر کرنے کا حکم دے دیا ۔گزشتہ روز وکیل صفائی قوسین فیصل مفتی بیماری کے باعث عدالت میں پیش نہ ہوئے جس کے باعث کارروائی آگے نہ بڑھ سکی،عدالت نے وکیل صفائی کی جانب سے التواء کی رخواست منظور کی، حالانکہ درخواست کے ساتھ کوئی میڈیکل سرٹیفکیٹ منسلک نہیں تھا۔عدالت نے ریمارکس دیئے کہ گزشتہ تاریخ پر بھی وکلاصفائی غیر حاضر رہے تھے اور ایسا لگتا ہے کہ دفاعی وکلا مقدمے کو طول دینا اہتے ہیں، عدالت نے تینوں وکلاء صفائی کو ہدایت دی کہ آئندہ سماعت پر لازمی پیش ہوں اور مزید التوا کی کسی صورت اجازت نہیں دی جائے گی، عدالتی نے سماعت کے تحریری حکمنامہ میں کہا چونکہ کیس اپنے آخری مرحلے میں داخل ہو چکا ہے اور دو ملزم جیل میں ہیں، اس لیے انصاف کا تقاضا ہے کہ جلد فیصلہ کیا جائے ، عدالت نے حکم دیا کہ توشہ خانہ ٹو کیس کا ٹرائل روزانہ کی بنیاد پر اس وقت تک جاری رکھا جائے گا جب تک مقدمہ مکمل نہ ہو جائے ۔

کوئٹہ :وزیراعلی ٰبلوچستان سرفراز بگٹی نے کہا ہے کہ گلے شکوے کا حل ریاست کے خلاف بندوق اٹھانا نہیں ہے ، یہ وطن ہم سب کا ہے اور سب نے اس وطن کے لیے قربانیاں دی ہیں۔اپنے بیان میں سرفراز بگٹی نے کہا کہ بلوچستان میں گورننس کی بہتری کے لئے اصلاحات متعارف کروائی جارہی ہیں، بلوچستان میں 16 ہزار کنٹریکٹ اساتذہ بھرتی کر کے بند 3 ہزار 200 سکول فعال کئے ۔انہوں نے کہا کہ کئی علاقوں میں پہلی بار سرکاری سطح پر طبی سہولتیں فراہم کی گئیں، مند میں پہلی ڈاکٹر کی تعیناتی اور بیکڑ ہسپتال میں پہلے بچے کی پیدائش طبی سہولتوں کی فراہمی کا ثبوت ہیں۔ میر سرفراز بگٹی نے ضلع شیرانی میں دہشتگردوں کیخلاف سکیورٹی فورسز کی کامیاب کارروائی کو زبردست الفاظ میں سراہا ہے ۔ انہوں نے کہا کہ یہ بروقت اور مؤثر کارروائی بلوچستان میں امن و امان کے قیام کی روشن دلیل ہے ۔انہوں نے کہا کہ بلوچستان دشمن نیٹ ورکس اور بھارتی پراکسیز کو ناکام بنانا سکیورٹی فورسز کی شاندار صلاحیتوں اور پیشہ ورانہ مہارت کا ثبوت ہے ۔