Category: اہم خبریں

لاہور:سابق وفاقی وزیر فواد چودھری نے دنیا نیوز کے پروگرام دنیا مہر بخاری کے ساتھ میں گفتگو کرتے ہوئے کہا کہ عمران خان نے پارٹی پر انہیں مسلط کیا جن کا کنٹرول نہیں، پی پی پی اور ن لیگ کی کوئی حیثیت ہی نہیں،ملک کی دو پٹڑیاں ہیں،ایک اسٹیبلشمنٹ، دوسری سیاسی پٹڑی ہے۔ جو پی ٹی آئی کے پاس ہے ، ن لیگ اور پی پی دونوں کا مینڈیٹ جینوئین ہی نہیں ہے ، ان کا زبردستی کا مینڈیٹ ہے ، انہوں نے اختیا ر آپس میں بانٹ رکھا ہے ، یہ تیرا وہ میرا کی پالیسی ہے ، صدر مملکت کو پتا ہی نہیں کیا ہو رہا ہے ، انہیں فیصلوں کے بارے بتایا ہی نہیں جا رہا، وہ تو صرف دہی کھا رہے ہیں، اگر غیر اہم لوگ امریکا ساتھ جا سکتے تھے تو بلاول کو کیوں نہیں لے جا سکتے تھے ، مریم نواز نے ایگریسیو سٹینڈ لیا ہے ، اس لیے ان کی کابینہ بھی ایسا ہی کہے گی، دونوں پارٹیوں کا یہاں ساتھ ختم ہو جائے ، ایسا ممکن نہیں۔ پی پی پی میں آصف علی زرداری اور بلاول بھٹو کے فیصلے چلتے ہیں، ن لیگ میں نواز شریف کے چلتے ہیں، مریم اور بلاول ایک حد تک ہی بات کر سکتے ہیں، خیبر پختونخوا میں علی امین گنڈا پور کے اوپر دبائو بڑھا ہے ، علیمہ سیدھی بات کر دیتی ہیں، پی ٹی آئی اصل میں عمران کا نام ہے۔کے پی کے میں وسائل خرچ کر کے جلسہ کرایا گیا، اس میں عمران خان کے بیٹوں کی تقریر کرا دیتے ، ایسا نہیں کیا گیا، گنڈا پو ر اپنے لیے مشکلات خود بڑھا رہے ہیں، لوگ علیمہ خان کے ساتھ ہی جڑیں گے یا عمران کے بیٹوں کے ساتھ، گنڈا پور پارٹی کے فیصلے نہیں کر سکتے ، عمران خان نے ایسے لوگوں کو پارٹی پر مسلط کیا ہے ، جن کا کنٹرول نہیں، پنجاب میں انہوں نے بزدار کو اسی لیے لگایا تھا تاکہ کنٹرول انکے اپنے پاس رہے ، وہ یہ پاور کسی اور کونہیں دے سکتے تھے ، عمران کہتے ہیں جس نے بات کرنی ہے مجھ سے کر لے ، درست فیصلے ہوتے تو یہ لیڈر شپ آگے نہ ہوتی، پی ٹی آئی خود بخود چل رہی ہے ، خان کی غلطی یہ ہے کہ جو لوگ پارٹی کو چلا سکتے تھے ، وہ باہر ہیں، عمران ایک قدم پیچھے ہٹنے کو تیار نہیں، ان کو اندر رکھنے کے لیے جوڈیشری اور اسٹیبلشمنٹ کو تباہ کیا گیا، قانون میں ویڈیو لنک ٹرائل کا جواز نہیں، جیسا ان کا ہو رہا ہے ، وہ سیاست کی وجہ سے اندر ہیں، کسی قانون کے تحت نہیں، وہ کسی پر ٹرسٹ نہیں کرتے ، انکے بیٹوں پر انکا ٹرسٹ ہے انہیں آگے لانا چاہیے ۔

راولپنڈی:پاک فوج نے فتح 4 گراؤنڈ لانچڈ کروز میزائل کا کامیاب تربیتی تجربہ کرلیا۔آئی ایس پی آر کے مطابق ملکی سطح پر تیار کردہ 750 کلومیٹر رینج کے حامل فتح ۔4 کا کامیاب تجربہ کیا گیا ہے۔یہ میزائل جدید ایویانکس اور نیویگیشنل آلات سے لیس ہے ، میزائل دشمن کے میزائل ڈیفنس سسٹم کو چکمہ دینے کی صلاحیت رکھتا ہے اور زمینی سطح کے ساتھ پرواز کی خصوصیات کا حامل ہے ۔ان خصوصیات کے باعث یہ میزائل اہداف کو انتہائی درستی کے ساتھ نشانہ بنانے کی صلاحیت رکھتا ہے ۔فتح ۔4 میزائل آرمی راکٹ فورس کمانڈ کا حصہ ہے جو پاکستان آرمی کے میزائل نظام کی رینج اور صلاحیت کو مزید بہتر بنائے گا۔آئی ایس پی آر کے مطابق چیف آف جنرل سٹاف، پاک افواج کے سینئر افسران اور سائنسدانوں و انجینئرز نے تجربے کا مشاہدہ کیا۔صدرِ مملکت، وزیرِاعظم ، چیئرمین جوائنٹ چیفس آف سٹاف کمیٹی اور سروسز چیفس کی جانب سے فتح ۔4 میزائل کے کامیاب تربیتی تجربے پر شریک دستوں، سائنسدانوں اور انجینئرز کو مبارکباد دی گئی ہے۔

اسلام آباد: وفاقی ادارہ شماریات نے مہنگائی سے متعلق ماہانہ رپورٹ جاری کر دی، اگست کے مقابلے میں ملک میں ستمبر میں مہنگائی کی شرح میں 2 فیصد کا اضافہ ہوا۔وفاقی ادارہ شماریات کی رپورٹ کے مطابق ستمبر میں دیہات میں مہنگائی کی سالانہ شرح 5.8 فیصدرہی، جبکہ شہروں میں منہگائی کی سالانہ شرح 5.5 فیصد رہی۔ادارہ شماریات کی رپورٹ کے مطابق وزارت خزانہ نے ستمبر کے لیے مہنگائی کا تخمینہ 3.5 تا 4.5 فیصد لگایا تھا، جولائی تا ستمبر کی سہ ماہی میں اوسط مہنگائی 4.22 فیصد رہی، اگست 2025 میں مہنگائی بڑھنے کی سالانہ شرح 2.99 فیصد ریکارڈ کی گئی تھی۔رپورٹ کے مطابق ستمبر 2024 میں مہنگائی بڑھنے کی سالانہ شرح 6.9 فیصد تھی، ستمبر میں دیہات میں ماہانہ مہنگائی کی شرح 2.8 فیصد بڑھی، ستمبر میں شہروں میں مہنگائی میں 1.5 فیصد اضافہ ہوا۔