Category: کھیل

ہم ٹاس ہار بھی گئے تو کوشش ہوگی 350 رنز سے زائد سکور کریں،ہوسکتا ہے کہ تین سپنرز، ایک فاسٹ باؤلر کھلائیں،قومی ہیڈ کوچ ہمیں معلوم ہے نعمان علی اور ساجد خان کا چیلنج ہمیں پنڈی میں بھی درپیش ہوگا ، انہیں کھیلنے سے متعلق پلان بنالیا ہے ، ایڈن مارکرم راولپنڈی:پاکستان اور جنوبی افریقہ کے درمیان دوسرا ٹیسٹ میچ آج سے راولپنڈی کرکٹ سٹیڈیم میں شروع ہوگا ۔گزشتہ روز پاکستان اور جنوبی افریقہ کی ٹیموں کا راولپنڈی کرکٹ سٹیڈیم میں پریکٹس سیشن ہوا۔ پریکٹس سیشن کے دوران کھلاڑیوں نے بیٹنگ، باؤلنگ اور فیلڈنگ کی مشقیں کیں، قومی کرکٹ ٹیم کے کپتان شان مسعود نے پچ کا جائزہ لیا۔ قومی کرکٹ ٹیم کے کوچ اظہر محمود نے کہا ہے کہ جنوبی افریقہ کے خلاف دوسرے ٹیسٹ میچ میں زیادہ تبدیلیاں نہیں ہوں گی، پچ دیکھ کر فائنل الیون کا اعلان کریں گے ۔پریس کانفرنس کرتے ہوئے اظہر محمود نے کہا کہ اگر ہم ٹاس ہار بھی گئے تو کوشش ہوگی کہ پہلی اننگز میں 350 رنز سے زائد سکور کریں۔ پہلے ٹیسٹ میں تمام 7 بلے بازوں نے رنز کیے سب نے اپنا کردار ادا کیا۔بدقسمتی سے ہمارا لوئر آرڈر نہیں چل سکا، ہم ان سے بھی امید رکھتے ہیں کہ وہ رنز سکور کریں گے کیونکہ لوئر آرڈرز کے رنز بھی معنی رکھتے ہیں ، ہوسکتا ہے کہ دوسرے ٹیسٹ میں تین سپنرز، ایک فاسٹ باؤلر کھلائیں۔ ہمارا مقصد ٹیسٹ چیمپئن شپ جیتنا ہے ۔اللہ نے بہترین موقع دیا ہے کہ ہم بہترین ٹیم کے خلاف سیریز جیتیں۔جنوبی افریقی ٹیسٹ ٹیم کے کپتان ایڈن مارکرم نے کہا ہے کہ ہمیں معلوم ہے نعمان علی اور ساجد خان کا چیلنج ہمیں پنڈی میں بھی درپیش ہوگا۔ جنوبی افریقی کپتان نے کہا کہ نعمان علی اور ساجد خان کے حوالے سے ٹیم میٹنگ میں گفتگو ہوئی ہے ، انہیں کھیلنے سے متعلق پلان بنالیا ہے ۔ایڈن مارکرم نے کہا کہ یہاں بھرپور ٹریننگ کی ہے ، ہمارے لیے بہت ضروری ہے کہ ہم سیریز میں کم بیک کرتے ہوئے سیریز برابر کریں۔

راولپنڈی:پاکستان ساؤتھ افریقہ ٹیسٹ سیریز کا دوسرا میچ کھیلنے کے لئے پاکستان اور ساؤتھ افریقہ کی کرکٹ ٹیمیں لاہور سے اسلام آباد پہنچ گئیں۔ دونوں ٹیمیں آج اسلام آباد کلب میں 12:30 بجے سے 3:30 بجے تک پریکٹس کریں گی۔ ورلڈ ٹیسٹ چیمپئن شپ سیریز کا دوسرا میچ پاکستان اور ساؤتھ افریقہ کے درمیان 20 اکتوبر کو راولپنڈی کرکٹ سٹیڈیم میں شروع ہوگا۔

لاہور:پاکستان نے جنوبی افریقا کے خلاف وائٹ بال سیریز کے لیے پلان تیار کرلیا۔ ذرائع کے مطابق تھنک ٹینک نے کیوریٹرز کو پچز کے حوالے سے ہدایات جاری کردی ہیں اور وائٹ بال سیریز میں فلیٹ بیٹنگ ٹریکس نہ بنانے کا فیصلہ کیا گیا ہے ۔ذرائع کا کہنا ہے کہ وائٹ بال سیریز میں یکطرفہ طور پر بڑے رنز کے لیے پچز تیار نہیں کی جائیں گی، فلیٹ بیٹنگ ٹریکس پر جنوبی افریقا کے بیٹرز کی سٹرنتھ کی وجہ سے فیصلہ کیا گیا، وائٹ بال سیریز میں ٹریکس سے بولرز، خاص طور پر سپنرز کو بھی مدد ملے گی۔ دوسری جانب ذرائع کا بتانا ہے کہ جنوبی افریقا کے خلاف وائٹ بال سیریز کیلئے سکواڈ پر مشاورت جاری ہے اور پاکستان سکواڈ میں اضافی سپنر کو شامل کیے جانے کا قوی امکان ہے۔سلیکشن کمیٹی کے ذرائع کا کہنا ہے کہ ٹی ٹونٹی ورلڈکپ کے لئے تیاری آخری مرحلے میں داخل ہو رہی ہیں، بہترین دستیاب کھلاڑیوں کے ساتھ آنے والے میچز کے لیے سکواڈ ترتیب دیا جا رہا ہے ۔ ذرائع سلیکشن کمیٹی کے مطابق ٹی ٹونٹی سکواڈ کیلئے کسی کے نام کے آگے کراس کا نشان نہیں، بابر اعظم اور نسیم شاہ سمیت تمام وائٹ بال کھیلنے والے کھلاڑی زیر غور ہیں، کوئی بھی کھلاڑی اگر اس وقت ٹیم کی ضرورت ہے تو اسے نظر انداز نہیں کیا جائے گا۔ یاد رہے پاکستان اور جنوبی افریقا کے درمیان ٹی ٹونٹی میچز 28 اکتوبر سے یکم نومبر کے درمیان کھیلے جائیں گے جب کہ ون ڈے میچز 4 ، 6 اور 8 نومبر کو کھیلے جائیں گے ۔

لاہور: محمد رضوان کی جگہ شاہین آفریدی کو کپتان بنائے جانے کے معاملہ پر پاکستان کرکٹ بورڈ کی وضاحت سامنے آ گئی۔ترجمان پی سی بی کے مطابق کپتان کی تبدیلی سے متعلق ایسی کوئی بات علم میں نہیں، قومی سکواڈ کا اعلان دوسرے ٹیسٹ میچ کے بعد ہوگا۔دوسری جانب یاد رہے جنوبی افریقہ کے خلاف ون ڈے اور ٹی 20 سیریز کے لیے سکواڈ کا باضابطہ اعلان پیر کو متوقع ہے۔واضح رہے میڈیا میں اس طرح کی خبریں سامنے آرہی تھی کہ محمد رضوان کی جگہ شاہین شاہ آفریدی کو ون ڈے ٹیم کا کپتان مقرر کیے جانے کا امکان تھا۔

لاہور:ٹیسٹ کرکٹ کے مستقبل سے متعلق بڑھتی ہوئی تشویش کے دوران ایک نیا فارمیٹ منظرِ عام پر آگیا، جو روایتی ریڈ بال کرکٹ اور جدید ٹی 20 کرکٹ کے عناصر کو یکجا کرتا ہے ، اس نئے فارمیٹ کا نام ‘ٹیسٹ 20’ رکھا گیا ہے ۔یہ خیال بھارتی سپورٹس سرمایہ کار اور ‘ون ون سِکس نیٹ ورک’ کے ایگزیکٹو چیئرمین گورو بہیروانی نے پیش کیا، اس منصوبے کو سابق کرکٹ سٹارز اے بی ڈی ویلیئرز، کلائیو لائیڈ، میتھیو ہیڈن اور ہربھجن سنگھ جیسے نامور کھلاڑیوں کی سرپرستی حاصل ہے ۔یہ فارمیٹ 80 اوورز پر مشتمل ہوگا، جس میں ہر ٹیم کو 2،2 اننگز کھیلنے کا موقع ملے گا، ہر اننگز 20 اوورز پر مشتمل ہوگی اور دونوں اننگز کے سکور آگے منتقل کیے جائیں گے ۔ٹیسٹ 20 کا پہلا مکمل سیزن جنوری 2026 میں شروع ہوگا، جس میں 6 عالمی سطح کی بڑی فرنچائزز حصہ لیں گی، جس میں 3 بین الاقوامی (دبئی، لندن، اور ایک امریکی شہر) اور 3 بھارتی شہروں سے شامل ہوں گی۔ ٹیموں میں شامل کھلاڑیوں کو جونیئر ٹیسٹ 20 چیمپئن شپ کے ذریعے دریافت کیا جائے گا۔ تاہم اس تجویز پر ابھی تک باضابطہ طور پر غور و خوض نہیں کیا گیا۔

لاہور:پاکستان کرکٹ بورڈ نے قذافی سٹیڈیم میں پیش آنے والے واقعے کے بعد ڈریسنگ رومز کی سکیورٹی مزید سخت کرنے کا فیصلہ کرلیا۔ذرائع کے مطابق انکلیوژر اور ڈریسنگ رومز کے درمیان حفاظتی باڑ لگانے کا منصوبہ تیار کر لیا گیا ہے تاکہ میدان میں موجود تماشائی یا غیر متعلقہ افراد کسی صورت ڈریسنگ رومز تک نہ پہنچ سکیں۔واضح رہے کہ پاکستان اور جنوبی افریقہ کے درمیان ٹیسٹ میچ کے دوران ایک نوجوان بابراعظم کا فین دیوار پھلانگ کر ڈریسنگ روم تک پہنچ گیا تھا۔

لاہور:پاکستان جنوبی افریقا ٹیسٹ سیریز کے دوسرے ٹیسٹ کیلئے بھی سپن فرینڈلی وکٹ بنائی جائیگی۔راولپنڈی سٹیڈیم میں پاکستان اور جنوبی افریقہ کے درمیان دوسرے ٹیسٹ کے لئے سپنرز کو مدد دینے والی پچ تیار کی جا رہی ہے ،اطلاعات کیمطابق پاکستان کرکٹ بورڈ کے پچ انچارج گزشتہ تین دنوں سے اس وکٹ کی تیاری میں مصروف ہیں، ان کا کہنا ہے کہ اس بار پچ ایسی بنائی جا رہی ہے جس پر سپن بولرز کو زیادہ مدد ملے گی اور میچ دلچسپ بنے گا۔دوسری جانب پی سی بی کے ڈائریکٹر ہائی پرفارمنس عاقب جاوید آ ج راولپنڈی پہنچیں گے تاکہ پچ اور دیگر انتظامات کا تفصیلی جائزہ لے سکیں۔ پاکستان اور جنوبی افریقہ کی ٹیمیں آج اسلام آباد پہنچیں گی، جہاں وہ دوسرے ٹیسٹ سے قبل ٹریننگ سیشنز میں حصہ لیں گی۔