Category: ٹیکنالوجی

لندن: ایک نئی تحقیق میں خبردار کیا گیا ہے کہ برٹش آئلس (برطانوی جزائر) کے اطراف بسنے والے سمندری پرندوں کی متعدد اقسام معدوم ہونے کے دہانے پر ہیں۔

حال ہی میں برٹش ٹرسٹ فار اورنیتھولوجی (بی ٹی او) کی رہنمائی میں کی جانے والی تحقیق میں بتایا گیا ہے کہ برطانیہ اور آئرلینڈ میں سمندری پرندوں کی اقسام کے بڑے حصے کو موسمیاتی تغیر کے سبب طویل مدتی اثرات کا سامنا ہو سکتا ہے۔

تحقیق میں لگائے گئے اندازے کے مطابق اگر 2050 تک زمین کا درجہ حرارت 2 ڈگری سیلسیئس تک بڑھتا ہے تو پفِن، فلمر اور آرٹک ٹرن کہ تعداد میں اس صدی کی ابتداء کی نسبت 70 فی صد کمی واقع ہوسکتی ہے۔
جرنل مرین اِکولوجی پروگریس سیریز میں شائع ہونے والی تحقیق کے نتائج بتاتے ہیں کہ سمندری پرندوں کی مخصوص اقسام جیسے کہ ٹرن، آکس اور پیٹریل کو گلز (مرغابیوں) جیسے عام اور ماحول میں ڈھل جانے والے پرندوں کی اقسام کے مقابلے میں زیادہ خطرہ لاحق ہے۔

ٹیم کے مطابق کچھ پرندے برطانیہ اور آئرلینڈ کے نئے علاقوں میں آباد ہو سکتے ہیں۔ البتہ، ان پرندوں کے تحفظ کے لیے کام کرنے والوں نے تنبیہ کی ہے کہ ایسا ہونا ان پرندوں کے ان علاقوں سے کم ہونے جہاں ابھی ان کی افزائش نسل ہوتی ہے، کا ازالہ نہیں ہوگا۔

تحقیق میں بتایا گیا کہ اگرچہ پرندے کی ہر قسم سمندری اور زمینی موسم کے مختلف پہلوؤں سے اپنے انداز میں نمٹتی ہے،سمندری پرندے عموماً اس وقت کم دِکھائی دیتے ہیں جب بریڈنگ سیزن کے دوران فضائی درجہ حرارت بلند ہوتا ہے۔

واضح رہے پفن، فلمر اور آرٹک ٹرن سمیت متعدد اقسام کی تعداد میں گزشتہ دو سال کے دوران ایوین فلو کی وجہ سے واضح کمی آئی ہے۔

سوئزرلینڈ: ہم جانتے ہیں کہ پہاڑ محض سطح پر نہیں ہوتے بلکہ زمین کے اندر بھی ہوتے ہیں۔ لیکن اب معلوم ہوا ہے کہ زمین کے اندر گہرائی میں کئی پہاڑی سلسلے ایسے ہیں جو سب سے بلند پہاڑ’ایورسٹ‘ سے بھی چار پانچ گنا بلند ہوسکتے ہیں۔ لیکن ان پہاڑوں کا کوئی سر زمین سے باہر موجود نہیں۔

برفیلے براعظم انٹارکٹیکا پر واقع زلزلہ پیما اسٹیشن سے وابستہ ماہرین نے کہا ہے کہ زمینی قشر(کرسٹ) کے نیچے اور مینٹل کے ساتھ یہ پہاڑ موجود ہیں۔ قشر وہ زمینی تہہ ہے جس پر ہم چلتے پھرتے ہیں اور اس کےنیچے کا ارضیاتی حصہ مینٹل کہلاتا ہے۔ یہ پہاڑ اس سے بھی نیچے ہیں جن کی حدود زمین کے اندر گول قلب (کور) تک جاپہنچتی ہیں۔

1996 میں ارضیاتی ماہرین نے زلزلے کی امواج (سسمک ویوز) کی بدولت زمین کی اندرونی ساخت پر تحقیق کی تو ان پہاڑوں کا انکشاف ہوا۔ ہم جانتے ہیں کہ زلزلہ جاتی امواج جب مختلف مادوں سے گزرتی ہیں تو ان کی رفتار کم یا زیادہ ہوتی ہے۔ اسی بنا پر ماہرین ایک نقشہ بناتے ہیں کہ اندر کی جانب کیا کچھ موجود ہوسکتا ہے۔ اس طرح مادے کی مختلف اقسام کی کیفیت بھی معلوم کی جاسکتی ہے۔

ماہرین نے 25 لہروں سے مختلف نقشے بنائے اور اس بنا پر تحقیق کی۔ وہ حیران رہ گئے کہ زمین کے اندرونی مینٹل یا پگھلے ہوئے مادے پر اونچی چٹانیں تیررہی ہیں اور وہ زمینی پہاڑوں سے بھی غیرمعمولی طورپر کئی گنا بلند ہوسکتی ہیں۔

ماہرین نے انٹارکٹیکا کے نیچے 1000 سیسمک ریکارڈنگ کی ہیں اور اعلیٰ ترین تصاویر جاری ہیں کی ہیں۔ ان کے مطابق ’کورمینٹل باؤنڈری‘ یا سی ایم بی پر تحقیق سے معلوم ہوا ہے کہ وسیع پتھریلی چٹانیں موجود ہیں جو چند کلومیٹر سے دسیوں کلومیٹرچوڑی ہیں اور زمین کے بلند ترین پہاڑوں سےبھی بلند ہیں۔

کیلیفورنیا: ٹیکنالوجی کمپنی ایپل نے پاکستان کی درخواست پر 10 ایپلی کیشنز ایپ اسٹور سے ہٹا دیں۔

کمپنی کی جانب سے جاری ہونے والی 2022 کی ایپ اسٹور ٹرانسپرینسی رپورٹ کے مطابق ایپل نے مجموعی طور پر 1474 ایپلی کیشنز مختلف حکومتوں کی درخواستوں پر ایپ اسٹور سے ہٹائیں۔

اعداد و شمار کے مطابق ایپل نے چین کی درخواست پر 1435، بھارت کی درخواست پر 14، پاکستان کی درخواست پر10 اور روس کی درخواست پر سات ایپس کو ان ممالک کے قانون کی خلاف ورزی کرنے پر ایپ اسٹور سے ہٹایا۔
ایپل کو دنیا بھر سے ایپ ہٹائے جانے کے لیے 18 ہزار 412 درخواستیں موصول ہوئیں جن میں سب سے زیادہ چین کی جانب سے 5 ہزار 484 درخواستیں تھیں۔

ایپ اسٹور پر رجسٹرڈ ایپل ڈیویلپرز کی کُل تعداد 3 کروڑ 69 لاکھ 74 ہزار 15 تھیں جبکہ 2022 میں قواعد و ضوابط کی خلاف ورزی کرنے پر ایپل نے 4 لاکھ 28 ہزار 487 ڈیویلپرز اکاؤنٹ کو ختم کیاگیا۔

گزشتہ ہفتے ایپل نے بتایا تھا کہ ایپ اسٹور نے 2022 میں 2.09 ارب ڈالر سے زائد کی ممکنہ دھوکا دہی کی ٹرانزیکشن کو روکا، 39 لاکھ چوری شدہ کریڈٹ کارڈ کو بلاک کیا اور دوبارہ ٹرانزیکشن کرنے والے 7 لاکھ 14 ہزار اکاؤنٹس پر پابندی عائد کی۔

درخواست کرنے والے دیگر ممالک میں ترکیے، بلغاریہ، قبرص، ہانگ کانگ، اٹلی، لیٹویا اور نائجیریا شامل ہیں۔

ٹوکیو: سیٹلائٹ کا نام سنتے ہی ذہن میں چمکیلی دھات والے ایک بڑے ڈبے کی شکل ابھرتی ہے۔ لیکن جاپانی انجینیئروں نے ایک خاص قسم کےلکڑی سے بنے چوکور ڈبے میں برقی آلات رکھ کر اس کی آزمائش خلائی ماحول میں کی گئی ہے۔

میگنولیا نامی لکڑی سے تجرباتی سیٹلائٹ بنایا گیا ہے جو حقیقت میں بالکل اصل اور قابلِ عمل سیٹلائٹ بھی ہے۔ اس منصوبے کو ’لگنوسیٹ‘ کا نام دیا گیا ہے۔ میگنولیا لکڑی ہلکی، مضبوط اور لچکدار ہوتی ہے جس سے مکانات بنائے جاتے ہیں۔ اس کا سب سے بڑا فائدہ یہ ہے کہ دھات کی بجائے لکڑی کے سیٹلائٹ وزن میں ہلکے ہوتے ہیں۔

دھاتی سیٹلائٹ ناکامی کی صورت میں مدار میں گھومتے رہتے ہیں اور مزید باریک ٹکڑوں میں تقسیم ہوکر مدار میں کچرا بڑھارہے ہیں۔ اس خلائی کوڑے کی وجہ سے مستقبل کے خلائی منصوبے بھی شدید مشکلات کے شکار ہوسکتے ہیں۔
جاپانی سائنسدانوں نے گزشتہ برس پہلے لکڑی کے کچھ نمونے بین الاقوامی خلائی اسٹیشن (آئی ایس ایس) پر بھیجے اور انہیں 290 دن تک اسٹیشن سے باہر خلا میں رکھا گیا۔ اس کا مقصد لکڑی پر خلا میں اشعاع (ریڈی ایشن) کا جائزہ لینا تھا۔ پھر ڈبے میں تجرباتی طور پر کچھ آلات رکھ کر بھی ان کی آزمائش کی گئی۔

لکڑی نے خلائی ماحول کو برداشت کیا، اس میں کوئی ٹوٹ پھوٹ نہیں دیکھی گئی اور نہ ہی اشعاع سے لکڑی متاثر ہوئی اور توقع ہے کہ لکڑی سے بنے سیٹلائٹ ایک دن خلا میں اپنی جگہ بناسکیں گے۔