Category: ٹیکنالوجی

اسلام آباد(سنگ میل نیوز) 31 جولائی 2025 کو چین کے ژیچانگ سیٹلائٹ لانچ سینٹر (XSLC) سے بھیجا گیاپاکستان کا نیا ریموٹ سینسنگ سیٹلائٹ کامیابی سے مدار میں پہنچ گیا۔ اور وہ بہترین کارکردگی کے ساتھ فعال ہے۔پاکستان اسپیس اینڈ اپر اٹماسفیئر ریسرچ کمیشن (سپارکو) نے ملک کے جدید ریموٹ سینسنگ سیٹلائٹ کی کامیاب تعیناتی اور عملی تیاری کی تصدیق کر دی۔کامیاب لانچ کے بعد سیٹلائٹ نے گراؤنڈ اسٹیشنز کے ساتھ مستحکم رابطہ قائم کر لیا ہے۔ اور ہائی ریزولوشن تصاویر حاصل کر کے زمین پر بھیجنا شروع کر دی ہیں۔ جس سے مختلف قومی شعبوں کے لیے ڈیٹا کی دستیابی ممکن ہو سکے گی۔حکام کے مطابق یہ سیٹلائٹ اعلی معیار کی تصویری صلاحیت کا حامل ہے۔ جو شہری منصوبہ بندی، انفراسٹرکچر کی ترقی اور علاقائی منصوبہ بندی میں انقلاب لائے گی۔ جبکہ شہری پھیلاؤ اور ترقی کے رجحانات کی نگرانی میں بھی مددگار ثابت ہو گی۔یہ قدرتی آفات سے بچاؤ کے نظام کو مستحکم کرے گا۔ اور سیلاب، زمین کے کھسکنے، زلزلوں اور دیگر خطرات کے لیے بروقت ڈیٹا فراہم کر کے فوری ردعمل ممکن بنائے گی۔ سیٹلائٹ ماحولیاتی تحفظ میں بھی کردار ادا کرے گی۔ جیسے گلیشیئر کا پگھلنا، جنگلات کی کٹائی اور ماحولیاتی تبدیلی کے اشارات کی نگرانی، سیٹلائٹ زراعت کی پیداوار کو بھی بہتر بنانے میں مدد کرے گی۔ اس کے علاوہ یہ قومی ترقیاتی منصوبوں جیسے چین پاکستان اکنامک کوریڈور میں بھی اہم کردار ادا کرے گی۔ ٹرانسپورٹ نیٹ ورکس کی نقشہ سازی، جغرافیائی خطرات کی شناخت اور وسائل کے مؤثر استعمال کو ممکن بنائے گی۔ ترجمان سپارکو نے کہا کہ یہ صلاحیتیں نہ صرف مختلف شعبوں میں فیصلہ سازی کو بہتر بنائیں گی۔ بلکہ پائیدار سماجی و اقتصادی ترقی اور پاکستان کی تکنیکی خود مختاری کو بھی مضبوط کریں گی۔ انہوں نے کہا کہ یہ شاندار کامیابی پاکستان کی خلا پر مبنی ٹیکنالوجیز میں پیشرفت اور سپارکو کے قومی انفراسٹرکچر کو مضبوط کرنے کے عزم کو اجاگر کرتی ہے۔

کراچی:پاکستان کا جدید ریموٹ سینسنگ سیٹلائٹ آج پاکستانی وقت کے مطابق صبح 7 سے 8 بجے کے درمیان چین کے شیچانگ سیٹلائٹ لانچ سینٹر سے خلاء میں کامیابی کے ساتھ روانہ ہو گیا۔ پاکستان کے خلائی تحقیقاتی ادارے سپارکو کے ماہرین اور سائنسدان چینی لانچ سینٹر میں موجود ہیں تاکہ مشن کو کامیابی سے مکمل کیا جا سکے۔سپارکو کے مطابق یہ سیٹلائٹ پاکستان کے خلائی پروگرام میں ایک اہم پیش رفت اور تکنیکی خود انحصاری کی جانب بڑا قدم ہے۔لانچ کی خصوصی تقریب سپارکو ہیڈکوارٹر کراچی میں براہ راست دکھائی گئی، جب کہ پروجیکٹ ڈائریکٹر ڈاکٹر محمد یاسر کا ویڈیو پیغام بھی چین سے نشر کیا جائے گا۔ سپارکو کے ترجمان کے مطابق، ریموٹ سینسنگ سیٹلائٹ کی مدد سے پاکستان میں انفراسٹرکچر کی ترقی، شہری پھیلاؤ کی نگرانی اور قدرتی آفات جیسے سیلاب، زمینی کھسکاؤ اور زلزلوں سے متعلق بروقت و موثر انتباہ ممکن ہو سکے گا۔ماہرین کا کہنا ہے کہ یہ سیٹلائٹ نہ صرف جغرافیائی خطرات کی بروقت نشان دہی کرے گا بلکہ اسے سی پیک جیسے اہم ترقیاتی منصوبوں میں بھی مؤثر معاون کے طور پر استعمال کیا جا سکے گا۔ڈی جی سپارکو افتخار بھٹی کا اس موقع پر کہنا تھا کہ یہ بہت خوشی کا موقع ہے پاکستان کی اسپیس تحقیق ترقی کی جانب ہے۔آج کا یہ سیٹلائٹ لانچ پاکستان کی قابلیت کا منہ بولتا ثبوت ہے، پاکستان ایک زمہ دار ملک ہے، یہ سیٹلائٹ ہمیں زراعت اور زمینی حقائق میں اہم معاونت فراہم کرے گا۔انہوں نے کہا کہ پاکستان نے گزشتہ ادوار میں مزید سیٹلائٹ بھیجے ہیں، اسپیں بیس ڈیٹا اینالائز کرنے کی صلاحیت بھی ہے۔ زلزلے اور سیلاب کی آگاہی اور زمین کی حرکت پر نظر۔ پانی کی قلت اور گلیشیئر کے پگھلنے تک سے گرمی کی شدت اور بدلتے موسم کے ثمرات میں معلومات فراہم کرے گا سپارکو اس پر فخر کرتا ہے اللہ ہمارا حامی و ناصر ہو۔

ترجمان دفتر خارجہ نے کہا کہ پاکستان کا ریموٹ سینسنگ سیٹلائٹ کامیابی سے خلاء میں روانہ ہوگیا، خلا کی تلاش اور ٹیکنالوجی کے میدان میں ایک اہم سنگ میل عبور کرتے ہوئے، پاکستان نے آج چین کے شی چانگ سیٹلائٹ لانچ سینٹرسے اپنا ریموٹ سینسنگ سیٹلائٹ کامیابی سے خلا میں روانہ کر دیا۔ترجمان کی جانب سے جاری بیان میں کہا گیا کہ یہ سیٹلائٹ اعلیٰ ریزولوشن کے ساتھ 24 گھنٹے مسلسل زمینی مشاہدے کی صلاحیت رکھتا ہے۔ترجمان نے کہا کہ پاکستان کی شہری منصوبہ بندی، بنیادی ڈھانچے کی ترقی، آفات کی نگرانی و نظم، زرعی نظام، خوراک کی سیکیورٹی، ماحولیاتی تحفظ، جنگلات کی کٹائی کی نگرانی، موسمیاتی تبدیلی کے تجزیے اور آبی وسائل کے نظم و نسق کے شعبوں میں استعدادِ کار کو نمایاں طور پر بہتر بنائے گا۔وفاقی وزیر منصوبہ بندی احسن اقبال نے ریموٹ سینسنگ سٹیلائٹ کی کامیاب لانچنگ پر قوم اور سپارکو کی تمام ٹیم ،انجینئرز،سائنسدانوں کو مبارکباد دی کو مبارکباد دی اور کہا کہ چین کےبھرپور تعاون پر شکرگزار ہیں۔احسن اقبال نے کہا کہ سٹیلائٹ کامیابی سے اپنے مدار میں پہنچ گیا، پاکستان کو سپیس ٹیکنالوجی میں دوبارہ قائدانہ کردار دلائیں گے، آئندہ سال چین کی مدد سے آسٹرو ناٹ خلا میں بھیجا جائے گا، 2035 تک ہم چاند پر پہنچنے کے پروگرام کو بھی کامیابی سےمکمل کریں گے۔

تحریر:محمد فاروق

پاکستان میں موبائل فونز پرعائد ٹیکسزاور ڈیوٹیز ایک عرصے سے عوامی بحث کا موضوع بنے ہوئے ہیں۔ آج کے دور میں جہاں ڈیجیٹل سہولیات تیزی سے روزمرہ زندگی کا حصہ بنتی جا رہی ہیں موبائل فون صرف رابطے کا ذریعہ ہی نہیں رہے بلکہ تعلیم، کاروبار، خریداری اور معلومات تک رسائی کا بنیادی وسیلہ بن چکے ہیں۔ اس وقت ملک میں تقریباً 198ملین موبائل صارفین موجود ہیں، ٹیلی ڈینسٹی 80.10فیصد ہے جبکہ 150ملین سے زائد افراد براڈبینڈ انٹرنیٹ استعمال کر رہے ہیں۔ ایسے میں موبائل فونز کی اہمیت سے انکار ممکن نہیں، تاہم ایک عام غلط فہمی یہ ہے کہ موبائل فونز پرعائد ٹیکسزاور ڈیوٹیز کا ذمہ دار پاکستان ٹیلی کمیونیکیشن اتھارٹی (پی ٹی اے) ہے۔ حالانکہ حقیقت اس کے برعکس ہے ۔ درحقیقت، موبائل فونز پر تمام ٹیکسزاور ڈیوٹیز ایف بی آر وصول کرتی ہے، جبکہ پی ٹی اے کا اس مالیاتی عمل سے کوئی تعلق نہیں۔
یہ امر واضح رہنا چاہیے کہ ایف بی آر ہی وہ ادارہ ہے جو موبائل ڈیوائسز پر ٹیکس عائد کرنے، اس کی وضاحت دینے اور اس کی وصولی کا مکمل اختیار رکھتا ہے۔ اس مقصد کے لیے ایف بی آر نے کئی قانونی نوٹیفکیشنز جاری کیے ہیں، جن میں ایس آر او50(I)/2019اور 51(I)/2019اور کسٹمز جنرل آرڈر 01آف 2024شامل ہیں۔ جو ان تمام ٹیکسز کی بنیاد فراہم کرتے ہیں ایف بی آر مختلف ماڈلز اور کیٹیگریز کے لیے وقتاً فوقتاً ٹیکس چارٹس جاری کرتا رہتا ہے، جو ایف بی آر کی ویب سائٹ پر دستیاب ہوتے ہیں۔ موبائل رجسٹریشن کے دوران جو بھی ادائیگی کی جاتی ہے، وہ براہِ راست ایف بی آر کے اکائونٹ میں جمع ہوتی ہے۔
پی ٹی اے پر ٹیکسز کا الزام دینا نہ صرف غلط فہمی کو جنم دیتا ہے بلکہ عوامی بحث کو غلط سمت میں موڑ دیتا ہے۔ حقیقت یہ ہے کہ پی ٹی اے نہ تو کوئی ٹیکس عائد کرتا ہے اور نہ ہی کوئی مالی وصولی کرتا ہے۔ پی ٹی اے کا کردار صرف ریگولیٹری ہے، یعنی ٹیلی کام سروسز کی نگرانی، معیار کی جانچ اور صارفین کی شکایات کا ازالہ و رہنمائی تک محدود ہے، نہ کہ ٹیکس وصولی۔ اس فرق کو سمجھنا ضروری ہے، لیکن عمومی طور پر سوشل میڈیا، مارکیٹوں اور روزمرہ گفتگو میں “پی ٹی اے ٹیکس” جیسی غلط اصطلاح عام طور پر رائج ہو چکی ہے جو حقائق کے منافی ہے۔
موبائل فونز کی قانونی رجسٹریشن اور ٹیکس ادائیگی کے عمل کو سمجھنے کے لیے ہمیں 2019میں لانچ کیے گئے ڈی آئی آر بی ایس(DIRBS)نظام کو دیکھنا ہوگا۔ یہ نظام ’’ٹیلی کام پالیسی 2015‘‘ کے تحت متعارف کروایا گیا تاکہ پاکستان میں اسمگل شدہ، نان کمپلائینٹ یا جعلی موبائل فونز کو بلاک کیا جا سکے۔ یہ سسٹم GSMA معیارات اور پی ٹی اے کے ٹائپ اپروول اصولوں کے مطابق کام کرتا ہے۔ DIRBS پی ٹی اے، ایف بی آر، جی ایس ایم اے، موبائل نیٹ ورک آپریٹرز اور صارفین کو ایک خودکار ڈیجیٹل سسٹم کے تحت باہم مربوط کرتا ہے۔ جو رجسٹریشن، تصدیق اور ادائیگی کے تمام مراحل کا احاطہ کرتا ہے۔ اس نظام کے ذریعے صارفین موبائل فون کی رجسٹریشن (*8484#) یا DIRBSویب پورٹل کے ذریعے کر سکتے ہیں۔ جب فون کا IMEIنمبر سسٹم میں درج کیا جاتا ہے تو ایف بی آر کی جانب سے مقرر کردہ ٹیکس کے مطابق ایک پیمنٹ سلپ آئی ڈی(PSID)جاری ہوتی ہے۔ صارف یہ رقم براہِ راست بنک کے ذریعے ایف بی آر کو ادا کرتا ہے، اور ادائیگی کی تصدیق کے بعد فون کو وائٹ لسٹ کر کے پاکستانی موبائل نیٹ ورکس پر فعال کر دیا جاتا ہے۔ رجسٹریشن کی حیثیت ایس ایم ایس، ویب سائٹ یا DIRBS ایپ کے ذریعے معلوم کی جا سکتی ہے۔اوورسیز پاکستانیوں کے لیے حکومت نے رجسٹریشن میں سہولت فراہم کرنے کے لیے خصوصی مراعات بھی متعارف کروائی ہیں، جن میں 60دن کے اندر رجسٹریشن پر 10فیصد ٹیکس رعایت اور ہر وزٹ پر فون کی 120دن کے لیے عارضی طور پر مفت رجسٹریشن شامل ہے۔ ان اقدامات سے قانونی درآمدات کو فروغ اور اوورسیز پاکستانیوں کو مدد فراہم کرنا ہے۔ ٹیکس سے متعلق تمام سوالات کے لیے صارفین ایف بی آر ہیلپ لائن 051-111-772-772 یا ای میلhelpline@fbr.gov.pkپر رابطہ کر سکتے ہیںاس پورے عمل میں پی ٹی اے کا کردار تکنیکی معاونت اور رہنمائی تک محدود ہے، پی ٹی اے روزانہ سینکڑوں شہریوں کی رہنمائی اور مسائل کے حل میں مصروفِ عمل رہتا ہے۔ صرف 2024 میں پی ٹی اے کو DIRBS سے متعلق 1,99,722شکایات موصول ہوئیں، جن میں سے 99.9فیصد کا کامیابی سے ازالہ کیا گیا۔ روزانہ اوسطاً 150سے 200شہری پی ٹی اے کے مرکزی دفتر میں رجوع کرتے ہیں۔ رجسٹریشن یا تکنیکی مسائل کے لیے پی ٹی اے کی ہیلپ لائن 0800-55055 پر رابطہ کیا جا سکتا ہے۔ پی ٹی اے اپنی خدمات تمام صارفین کو بغیر کسی فیس کے فراہم کررہا ہے۔
پی ٹی اے نہ صرف ایک فعال ریگولیٹری ادارہ ہے بلکہ ملکی موبائل مینوفیکچرنگ انڈسٹری کو بھی فروغ دے رہا ہے۔ صرف 2024میں 3۔3 کروڑ موبائل فون پاکستان میں تیار کیے گئے جب کہ 2025کے ابتدائی پانچ ماہ میں مزید 12.81ملین فونز مقامی طور پر بنائے گئے۔ اس سے درآمدی انحصار کم ہونے اور خود کفالت کی راہ ہموار ہوئی ہے۔ یہ پیش رفت مقامی صنعت اور روزگار کے مواقع میں اضافے لیے ایک مثبت اشارہ ہے۔مزید برآں پی ٹی اے کی جانب سے قومی خزانے میں جمع کی گئی رقوم بھی قابل ذکر ہیں، جن میں2021-22میں 112.71ارب روپے‘ 2022-23 میں 99ارب روپے اور2023-24میں 54ارب روپے شامل ہیں۔ یہ تمام آمدن پی ٹی اے کی لائسنس فیس، اسپیکٹرم نیلامی اور دیگر ضوابطی اقدامات سے حاصل ہوئی اس کے ساتھ ساتھ پی ٹی اے ملک بھر میں ٹیلی کام سروسز کے معیار کو جانچنے کے لیے باقاعدہ سروے کرتا ہے، اور خراب کارکردگی کی صورت میں لائسنس یافتہ کمپنیوں کو شوکاز نوٹسز اور جرمانے بھی عائد کرتا ہے۔ اس کے علاوہ، ’’پریوینشن آف الیکٹرانک کرائمز ایکٹ‘‘ (PECA)کے تحت آن لائن مواد کی نگرانی، غیر اخلاقی، فحش، نفرت انگیز اور بچوں کے لیے نقصان دہ مواد کو بلاک کرنے جیسے اہم فرائض میں بھی سرگرم عمل ہے۔
اگرچہ موبائل فونز پرعائد ٹیکس اور ڈیوٹیز قومی آمدنی کا ایک اہم ذریعہ ہیں، تاہم ان ٹیکسز کی شرح پر تنقید ایک فطری عمل ہے۔ ضرورت اس امر کی ہے کہ تنقید اور اصلاحات کا رخ درست سمت میں ہو۔ عوامی سطح پر غلط فہمیوں کے بجائے درست معلومات کا فروغ نہایت اہم ہے۔ ایک تجویز یہ ہے کہ پرانے یا درمیانے درجے کے فونز پر ٹیکس کم کیا جائے، جس کے لیے GSMA TACڈیٹابیس کے ذریعے ماڈلز کو کیٹیگرائز کیا جا سکتا ہے۔ اسی طرح مہنگے فونز پر ٹیکس کی شرح کو متوازن بنا کر قانونی رجسٹریشن کی ترغیب دی جا سکتی ہے اس سے ٹیکس نیٹ بیس میں بھی اضافہ کیا جاسکتا ہے۔
عوام‘ میڈیا اور صارفین کو اس فرق کو سمجھنا چاہیے کہ ٹیکس کا ذمہ دار ادارہ ایف بی آر ہے نہ کہ پی ٹی اے۔ پی ٹی اے ایک ریگولیٹری ادارہ ہے جو ملک کے ڈیجیٹل انفراسٹرکچر کی ترقی‘معیار اور تحفظ کے لیے کوشاں ہے۔ درست معلومات پر مبنی مکالمہ ہی ملک کو بہتر پالیسی سازی‘ ڈیجیٹل شمولیت اور قانونی درآمدات کی راہ پر ڈال سکتا ہے باشعور شہری ہی بہتر پالیسی اور مضبوط معیشت کی بنیاد فراہم کرتے ہیں۔

آج 17 مئی کو دنیا بھر میں مواصلاتی رابطوں کا عالمی دن منایا جا رہا ہے یہ دن نہ صرف جدید رابطہ کاری کی اہمیت کو اجاگر کرتا ہے بلکہ انسانیت کو جوڑنے کے ایک طویل سفر کی یاد بھی دلاتا ہے اور ساتھ ساتھ ہمیں یہ موقع بھی فراہم کرتا ہے کہ ہم نے اس سفر میں کیا کھویا کیا پایا اور آگے کہاں جانا ہے- اس دن کی بنیاد 17 مئی 1969 کو رکھی گئی تھی تاکہ 1865 میں بین الاقوامی ٹیلی گراف کنونشن پر دستخط اور انٹرنیشنل ٹیلی کمیونیکیشن یونین کے قیام کو یاد رکھا جا سکے- سال 2025 اس حوالے سے خصوصی اہمیت کا حامل ہے کیونکہ آئی ٹی یو اپنے قیام کی 160 ویں سالگرہ منا رہا ہے ایک ایسے وقت میں جب دنیا ڈیجیٹل ترقی کی نئی بلندیوں کو چھو رہی ہے ہم اس بات کے معترف ہیں کہ رابطے کے ذرائع نے ہماری زندگیوں ،معیشتوں اور معاشروں کو بدل کر رکھ دیا ہے۔
آپ کے ہاتھ میں موجود موبائل فون سے لے کر آسمان کے مدار میں گردش کرتے سیٹلائٹس تک، جب بھی ہم کال کرتے ہیں پیغام بھیجتے ہیں، ریڈیو آن کرتے ہیں، ٹی وی دیکھتے ہیں، جی پی ایس استعمال کرتے ہیں، انٹرنیٹ تک رسائی حاصل کرتے ہیں یا موسم کی تازہ ترین معلومات چیک کرتے ہیں تو درحقیقت ایک عالمی نیٹ ورک کی خدمات پر انحصار کر رہے ہوتے ہیں جو بہت ہی منظم مربوط اور بیک وقت پیچیدہ بھی ہے – ڈیجیٹل ٹیکنالوجیز کے حوالے سے اقوام متحدہ کی خصوصی ایجنسی کے طور پرآئی ٹی یو دنیا کو آپس میں جوڑنے میں کلیدی کردار ادا کر رہی ہے چاہے وہ سپیکٹرم مینجمنٹ ہو عالمی معیارات کا تعین یا ڈیجیٹل تقسیم کو ختم کرنے کی کوششیں ہوں-
1865 میں ٹیلی گراف سے شروع ہونے والا یہ سفر آج محض سادہ پیغام رسانی تک محدود نہیں رہا بلکہ دنیا میں رابطے ترقی اور ایجادات کے نئے دریچے روشناس کرا رہا ہے- اگر ٹیلی کام سیکٹر پر نظر دوڑائی جائے تو کھیتوں کی ہریالی سے صحت کی بحالی تک اور سیاست کے ایوانوں سے معیشت کے کارخانوں تک اس کی گونج سنائی دے رہی ہے اور یہ مصنوعی ذہانت ، فائیو جی ،انٹرنیٹ آف تھنگز اور جدید ڈیجیٹل نیٹ ورک تک پہنچ چکا ہے آج موبائل ٹیکنالوجیز اور سروسز دنیا بھر میں سات ارب سے زائد کنکشن کی حامل ہیں اگر آئی او ٹی ڈیوائسز کو شامل کیا جائے تو یہ تعداد 13.7 ارب سے تجاوز کر رہی ہے یہ خدمات عالمی جی ڈی پی میں تقریبا 8.5فیصد حصہ ڈال رہی ہیں جو 2030 تک8.4 فیصد شرح سے 11 ٹریلین ڈالر تک پہنچنے کی توقع ہے-
دنیا کی آبادی اس وقت کم و بیش 8.2 ارب نفوس پر مشتمل ہے جن میں 42 فیصد دیہی اور 58 فیصد شہری افراد شامل ہیں جبکہ صنفی تناسب کے لحاظ سے ان میں 49.73 فیصد خواتین اور 50.27 فیصد مرد حضرات ہیں۔ جی ایس ایم اے کی رپورٹ کے مطابق دنیا کی 71 فیصد آبادی یعنی تقریبا 5.8 ارب افراد موبائل فون صارفین ہیں اور 60 فیصد یعنی 4.70 ارب افراد انٹرنیٹ تک رسائی رکھتے ہیں اگرچہ سمارٹ فون کےاستعمال کی شرح 80 فیصد تک پہنچ چکی ہے مگر اب بھی 20 فیصد افراد سادہ ، بنیادی فیچر فون پر انحصار کر رہے ہیں یہ اعداد و شمار جہاں نمایاں پیشرفت کو ظاہر کرتے ہیں وہیں ڈیجیٹل رسائی میں موجود خلا کی نشاندہی بھی کرتے ہیں یہ ترقی اور محرومی کے ساتھ چلتے دو رخ ہیں۔
پاکستان میں ٹیلی کمیونیکیشن کے شعبہ میں نمایاں ترقی دیکھنے کو ملی ہے آج ملک بھر میں 200 ملین سے زائد موبائل صارفین موجود ہیں جبکہ 59.83 فیصد شرح کے ساتھ 147 ملین صارفین موبائل اور فکس براڈ بینڈ کی سہولیات سے مستفید ہو رہے ہیں پاکستان ٹیلی کام اتھارٹی ریگولیٹری اقدامات کے ساتھ ساتھ ڈیجیٹل خلا کو پر کرنے کے لیے قومی و عالمی اداروں اور تنظیموں کے ساتھ مل کر کام کر رہی ہے تاکہ پاکستان میں پائیدار ڈیجیٹل ترقی کے اہداف کو ممکن بنایا جا سکے۔
آج دنیا میں موبائل کنکشنزکی تعداد عالمی آبادی سے تجاوز کر رہی ہے یہ حیرت انگیز حقیقت بظاہر ترقی کی علامت دکھائی دیتی ہے لیکن کیا درحقیقت ہم بامقصد اور مساوی شمولیت کو حاصل کرنے میں کامیاب ہوئے ہیں جہاں سب کو یکساں مواقع میسر ہوں اگر نہیں تو اس کے حصول میں کیا رکاوٹیں کار فرما ہیں اس سیاق و سباق میں چند بڑے چیلنجز کا ذکر کریں تو بے جا نہ ہوگا ان میں ڈیجیٹل تقسیم، صنفی تفریق ،الیکٹرانک کچرا کے نقصانات، فیک نیوز کے مضمرات اور غیر محفوظ سائبر سپیس کے اثرات اہم ہیں ان چیلنجز کے معاشرتی رویے ، معاشی ترقی وسماجی ناہمواری اور قوموں کے مستقبل پر دیرپا اثرات مرتب ہوں گے جن سے نمٹنا وقت کی اہم ضرورت ہے-
اس سال آئی ٹی یو نے صنفی تفریق کو خصوصی موضوع بنایا ہے اگرچہ دنیا میں اربوں ڈیجیٹل ڈیوائسز استعمال ہو رہے ہیں مگر اس کے باوجود لاکھوں خواتین اور لڑکیاں خصوصا کم اور درمیانی آمدنی والے ممالک میں آج بھی آن لائن نہیں ہیں۔ عالمی سطح پر 70 فیصد مرد حضرات انٹرنیٹ استعمال کررہے ہیں جبکہ خواتین کا تناسب 65 فیصد ہے اس فرق کا مطلب ہے کہ دنیا بھر میں 189 ملین مرد خواتین کے مقابلے میں زیادہ انٹرنیٹ استعمال کررہے ہیں۔ آئی ٹی یو کے مطابق سال 2024 میں خواتین کے موبائل انٹرنیٹ استعمال کرنے کی شرح مردوں کے مقابلے میں 17 فیصد کم ہے- دیہی علاقوں اور پسماندہ طبقات میں یہ خلیج مزید وسیع ہو جاتی ہے جہاں انفراسٹرکچر کی کمی، سماجی رکاوٹیں اور ڈیجیٹل مہارت کی قلت جیسے عوامل کار فرماہیں۔
اس ڈیجیٹل محرومی کے اثرات محض عددی نہیں بلکہ یہ اجتماعی خوشحالی و ترقی، تعلیم و روزگار اور سماجی شمولیت میں ایک بڑی رکاوٹ ہیں۔ اس ڈیجیٹل صنفی خلا کو کم کرنے کے لیے فوری طور پر کئی اقدامات کیے جا سکتے ہیں جن میں خواتین کی رسائی کو ترجیح دینے کے لیے ٹیلی کام لائسنس کی شرائط میں تبدیلیاں لائی جا سکتی ہیں یونیورسل سروسز فنڈز کا استعمال کرتے ہوئے خواتین کو موبائل ڈیوائسز اور سم کارڈ کی ملکیت کے لیے سہولتیں اور مراعات فراہم کی جا سکتی ہیں دیہی اور پسماندہ علاقوں میں خاص طور پر خواتین اور بچیوں کے لیے ڈیجیٹل خواندگی کے پروگرام شروع کیے جا سکتے ہیں سول سوسائٹی، میڈیا اور تعلیمی اداروں کے ساتھ اشتراک کے ذریعے عوامی شعور اور روایتی تصورات میں تبدیلی لائی جا سکتی ہے -یہ اقدامات نہ صرف آسان رسائی فراہم کرنے کے لیے اہم ہیں بلکہ ڈیجیٹل خود مختاری اور صنفی شمولیت کے حقیقی تصور کو عملی جامہ پہنانے کے لیے ناگزیر ہیں۔
آج کے جدید دور میں جہاں اطلاعات کی ترسیل نہایت تیز ہو چکی ہے، وہیں فیک نیوز یعنی جھوٹی خبروں کا پھیلاؤ بھی ایک سنجیدہ مسئلہ بن چکا ہے۔ انٹرنیٹ، سوشل میڈیا اور واٹس ایپ جیسے ذرائع نے جہاں دنیا کو قریب کیا ہے، وہیں غلط اور گمراہ کن خبروں کو بھی لمحوں میں عوام تک پہنچا دیا جاتا ہے۔ فیک نیوز نہ صرف لوگوں کو گمراہ کر رہی ہیں بلکہ معاشرے میں بے چینی ، بد اعتمادی اور نفرتوں کو بھی جنم دے رہی ہیں ۔ فیک نیوز کو روکنے کے لیے عالمی سطح پر ایک مؤثر ،جامع، قابل عمل اور پائیدار ضابطہ اخلاق انتہائی ضروری ہے جو ایک کنونشن کی حیثیت رکھتا ہو جو تمام میڈیا فورمز کو عمل درآمد کے لیے پابند کرتا ہو تاکہ اس کے بڑھتے ہوئے نقصانات اور منفی اثرات سے معاشرے کو محفوظ بنا جا سکے –
ڈیجیٹل ترقی کے ساتھ ایک اور سنگین مسئلہ جو تیزی سے ابھر رہا ہے وہ الیکٹرانک کچرا یعنی ای ویسٹ ہے- ٹیکنالوجی نے جہاں انسانی زندگی کو سہل بنایا ہے وہیں اس کی ماحولیاتی قیمت بھی چکانا پڑ رہی ہے صرف سال 2022 میں دنیا بھر میں 62 ارب کلو گرام ای ویسٹ پیدا ہوا لیکن اس میں صرف22.3 فیصد کو باقاعدہ طور پر جمع کر کے ری سائیکل کیا گیا ہے باقی بچ جانے والا ای ویسٹ جس میں سیسہ ، پارہ اور پلاسٹک جیسے خطرناک مواد شامل ہیں ماحولیاتی آلودگی ،صحت کے مسائل اور معاشی نقصان کا سبب بن رہا ہے۔ آئی ٹی یو نے ہدف مقرر کیا تھا کہ 2023 تک 50 فیصد ممالک ای ویسٹ سے متعلق موثر قانون سازی کریں لیکن 42 فیصد ممالک ہی قانون سازی کر سکے ہیں حالیہ اعداد و شمار ظاہر کرتے ہیں کہ ای ویسٹ کے موثر انتظام میں کئی سنجیدہ نوعیت کے چیلنجز درپیش ہیں جن میں صحیح اعداد و شمار کا موجود نہ ہونا، غیر رسمی اور غیر محفوظ ری سائیکلنگ کا پھیلاؤ ،موثر قانون سازی اور عوامی آگاہی میں کمی جیسے عوامل شامل ہیں۔ ان چیلنجز سے نمٹنے کے لیے فوری اور عملی اقدامات سے بہتری کی گنجائش نکل سکتی ہے- حکومتیں اور صنعتی ادارے مینوفیکچررز کی “ٹیک بیک پالیسیز” کو مضبوط بنا سکتے ہیں اسی طرح پبلک پرائیویٹ شراکت داری کے ذریعے ماڈل ری سائیلنگ پلانٹ کا قیام عمل میں لایا جا سکتا ہے جو ای ویسٹ کی باقاعدہ اور پائیدار مینجمنٹ کے لیے ایک موثر نمونہ فراہم کرے ۔
اعداد و شمار جہاں ڈیجیٹل ترقی میں پیشرفت کو ظاہر کرتے ہیں وہاں ایک ایسے روڈ میپ کی ضرورت کے بھی متقاضی ہیں جو ٹیکنالوجی اور انٹرنیٹ تک رسائی میں حائل رکاوٹوں کو دور کرے جب ہم فائیو جی، انٹرنیٹ آف تھنگز اور کوانٹم ٹیکنالوجیز کے دور میں داخل ہو رہے ہیں تو ضروری ہے کہ ہماری توجہ صرف ٹیکنالوجی تک ہی محدود نہ رہے بلکہ محفوظ رسائی اور شمولیت پر بھی مرکوز رہے تاکہ کوئی بھی طبقہ اس ڈیجیٹل انقلاب سے محروم نہ رہے-
ورلڈ ٹیلی کام ڈے محض ایک سالانہ تقریب نہیں بلکہ یہ ایک نادر موقع ہے جو ہمیں یاد دلاتا ہے کہ حقیقی ترقی کا پیمانہ یہ نہیں کہ کتنے لوگ جڑے ہوئے ہیں بلکہ یہ ہے کہ کتنے لوگ بااختیار ہوئے ہیں ان اہداف کی تکمیل کے لیے ایک ایسے ایکشن پلان کا خاکہ پیش کرنا ضروری ہے جو قلیل مدتی ، وسط مدتی اور طویل مدتی سفارشات پر مشتمل ہو۔ موجودہ سازگار ماحول کو مزید مضبوط اور مربوط بنانا ضروری ہے تاکہ ڈیجیٹل تقسیم اور معیارات کی تفریق کو کم کر کے مستقبل کی حیران کن دنیا کو مدنظر رکھتے ہوئے جہاں سینسروں، روبوٹوں کا رابطہ جو مصنوعی ذہانت کی مدد سے انجام پائے گا کے ثمرات سے تمام طبقات بلا تفریق و تقسیم مستفید ہو سکیں۔