Category: کاروبار

آزاد کشمیر میں بھی ڈینگی بے قابو، مزید174 نئے مریض ،تعداد 1698 تک جا پہنچی راولپنڈی،مظفر آباد: راولپنڈی میں ایک دن میں ڈینگی کے مزید 30مریض ہسپتال داخل ہوئے ،راولپنڈی شہر میں کل مریضو ں کی تعداد 865 تک پہنچ گئی ۔ اس وقت مختلف ہسپتالوں میں ڈینگی کے 75 مریض زیر علاج ہیں جن کی حالت تسلی بخش بتائی جا رہی ہے ۔ رواں سیزن میں احتیاطی تدابیر کی خلاف ورزی پر ایک کروڑ 87لاکھ روپے سے زائد جرمانے کی صورت میں حکومتی خزانے میں جمع ہوئے ۔ آزاد کشمیر میں بھی ڈینگی بے قابو ہو گیا، 174 افراد میں ڈینگی وائرس کی تصدیق ہوگئی جس کے بعد کل تعداد 1698 تک جا پہنچی۔

کمپنیوں کو 60 روز کے اندر جرمانے کی رقم خزانے میں جمع کرانیکی ہدایت کراچی:کمپیٹیشن کمیشن آف پاکستان نے اسٹیل سیکٹر میں قیمتوں کے غیر قانونی گٹھ جوڑ (کارٹلائزیشن) کو بے نقاب کرتے ہوئے دو بڑی کمپنیوں عائشہ اسٹیل ملز لمیٹڈ اور انٹرنیشنل اسٹیل لمیٹڈ پر مجموعی طور پر 1 ارب 50 کروڑ روپے کا بھاری جرمانہ عائد کردیا ہے ۔کمیشن کے مطابق دونوں کمپنیوں نے اسٹیل مصنوعات کی قیمتوں میں غیر قانونی طور پر اضافہ کیا اور جولائی 2020 سے دسمبر 2023 تک فعال کارٹل کے ذریعے مارکیٹ میں قیمتوں کا گٹھ جوڑ برقرار رکھا جو کہ کمپیٹیشن ایکٹ کی سنگین خلاف ورزی ہے ۔فیصلے میں کہا گیا ہے کہ عائشہ اسٹیل ملز پر 64 کروڑ 83 لاکھ روپے جبکہ انٹرنیشنل اسٹیل ملز پر 91 کروڑ 42 لاکھ روپے کا جرمانہ عائد کیا گیا ہے دونوں کمپنیوں کو 60 روز کے اندر جرمانے کی رقم قومی خزانے میں جمع کروانے کی ہدایت کی گئی ہے ، بصورت دیگر1 لاکھ روپے اضافی جرمانہ عائد ہوگا۔

122 ارب روپے کی سبسڈی پالیسی پر نظرثانی کی جائے ، آٹو موٹیو مینو فیکچررز کراچی: پاکستان آٹو موٹیو مینوفیکچررز ایسوسی ایشن نے حکومت سے مطالبہ کیا ہے کہ ملک میں فروخت ہونے والی غیر معیاری اور ناقص بیٹریوں والی الیکٹرک گاڑیوں پر فوری طور پر پابندی عائد کی جائے ، کیونکہ یہ گاڑیاں نہ صرف صارفین کو نقصان پہنچا رہی ہیں بلکہ الیکٹرک وہیکل انڈسٹری کے مستقبل کو بھی خطرے میں ڈال رہی ہیں۔ ایسوسی ایشن کے ڈائریکٹر جنرل عبدالوحید خان نے اپنے بیان میں کہا کہ حکومت کو وہیکل الیکٹریفکیشن قومی پروگرام کے تحت دی جانے والی 122 ارب روپے کی سبسڈی پالیسی پر نظرثانی کرنی چاہیے ،مارکیٹ میں فروخت ہونے والی گرافین کوٹیڈ بیٹریاں دراصل پرانی ٹیکنالوجی کی نئی شکل کے طور پر پیش کی جا رہی ہیں، جو صارفین کے ساتھ ٹیکنالوجی کے نام پر دھوکہ ہے ۔ ان بیٹریوں کی کارکردگی محدود ہے جبکہ مینوفیکچررز ان پر 24 ماہ سے زائد وارنٹی دینے سے گریز کرتے ہیں۔ لیتھیم آئن بیٹریاں بین الاقوامی معیار کے مطابق ہیں۔ ان بیٹریوں کی عالمی سطح پر 5 سال یا اس سے زائد کی وارنٹی دی جاتی ہے۔

کراچی: پاکستان سٹاک ایکسچینج میں کاروبار کے دوران اتار چڑھاؤ کے بعد ہنڈرڈ انڈیکس منفی زون میں بند ہوا۔کاروباری ہفتے کے چوتھے روز بھی کاروبار کے آغاز پر سٹاک ایکسچینج میں زبردست تیزی دیکھنے میں آئی، 1000 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 66 ہزار 729 پوائنٹس کی سطح پر پہنچ گیا۔بعدازاں ٹریڈنگ کے دوران سٹاک مارکیٹ میں اچانک مندی چھاگئی جو کاروباری روز کے اختتام تک برقرار رہی جس کے باعث ہنڈرڈ انڈیکس 735 پوائنٹس کی کمی کیساتھ ایک لاکھ 64 ہزار 530 پوائنٹس کی سطح پر بند ہوا۔واضح رہے کہ گزشتہ کاروباری روز کے اختتام پر 907 پوائنٹس کی کمی کے ساتھ انڈیکس ایک لاکھ 65 ہزار 266 پوائنٹس کی سطح پر بند ہوا تھا۔سٹاک مارکیٹ میں آج 37 ارب 7 کروڑ 87 لاکھ 95 ہزار 159 روپے مالیت کے 69 کروڑ 88 لاکھ 65 ہزار 320 شیئرز کا لین دین ہوا۔

وزیر سرمایہ کاری سے اردنی سفیر کی ملاقات ، زراعت، آئی ٹی میں تعاون پر تبادلہ خیال۔ اسلام آباد: وفاقی وزیر سرمایہ کاری قیصر احمد شیخ سے اردن کے سفیر ڈاکٹر مائن خریسات نے ملاقات کی، جس میں زراعت، انفراسٹرکچر اور آئی ٹی کے شعبوں میں تعاون کے نئے امکانات پر تبادلہ خیال اور دوطرفہ اقتصادی تعاون کے فروغ پر اتفاق کیا گیا۔ اردنی سفیر نے بورڈ آف انویسٹمنٹ اسلام آباد کا دورہ بھی کیا۔ ملاقات میں پاکستان اور اردن کے درمیان اقتصادی تعلقات میں پیشرفت کا جائزہ بھی لیا گیا اور تجارت، سرمایہ کاری اور توانائی کے شعبوں میں تعاون پر گفتگو کی گئی۔ اس موقع پر وفاقی وزیر نے کہا کہ پاکستان اردن کے ساتھ معاشی تعلقات کو مزید مضبوط بنانا چاہتا ہے۔

کراچی:پاکستانی ٹیکسٹائل مصنوعات کی برآمدات کو عالمی مارکیٹوں کی ترجیحات میں شامل کرنے کیلئے ایل کے ایس جی،کارپوریٹ سسٹین ایبلٹی رپورٹنگ ڈائریکٹیو اور ای سی جی معیارات پر عملدرآمد ناگزیر ہوگیا ہے ۔ان خیالات کا اظہارانہوںنے گرین پاکستان پراجیکٹ کے ڈائریکٹر ڈاکٹر مائیکل آریٹز نے گرین پاکستان پراجیکٹ کے تحت منعقدہ تیکنکی ورکشاپ سے خطاب کرتے ہوئے کہی۔

انٹربینک میں ڈالر281.22،اوپن مارکیٹ میں282.25روپے کا ہوگیا۔کراچی:انٹربینک اور اوپن مارکیٹ میں روپے کے مقابلے ڈالر کی قدر میں مزید کمی ریکارڈ کی گئی۔ادھرعالمی اور مقامی مارکیٹوں میں سونا مزید مہنگا ہوگیا تاہم چاندی کی قیمت میں معمولی کمی ریکارڈ کی گئی ۔ اسٹیٹ بینک کے مطابق انٹربینک میں ڈالر3پیسے کی بہتری سے 281.22 کا ہوگیا۔یاد رہے کہ پیر کو مقامی کرنسی281.25 روپے پر بند ہوئی تھی۔ اوپن کرنسی مارکیٹ میں بھی ڈالر کی قدر 05پیسے کی کمی سے 282روپے 25پیسے کی سطح پر بند ہوئی۔دوسری جانب عالمی بلین مارکیٹ میں سونا 15 ڈالر کے نمایاں اضافے سے 3955 ڈالر فی اونس کا ہوگیا۔بین الاقوامی مارکیٹ میں سونے کے نرخ میں نمایاں اضافے کے باعث مقامی سطح پربھی فی تولہ سونا 1500 روپے کے اضافے سے ملکی تاریخ میں پہلی بار 4 لاکھ 16 ہزار 778 روپے پر جاپہنچا۔ اسی طرح دس گرام سونے کی قیمت بھی 1286 روپے بڑھ کر 3 لاکھ 57 ہزار 4319 روپے ہوگئی۔دریں اثنا چاندی کی قیمت فی تولہ قیمت 20 روپے کی کمی سے 4,929 روپے ہوگئی۔