Category: اہم خبریں

اسلام آباد: ترلائی دھماکہ کا ایک اور زخمی چل بسا، شہدا کی مجموعی تعداد 35 ہو گئی۔بتایا گیا ہے کہ لاڑکانہ کا رہائشی زخمی علی نقی بوسن اسلام آباد کے نجی ہسپتال (الشفا اںٹرنیشنل) میں زیر علاج تھا۔پمز، پولی کلینک اور نجی ہسپتال میں شہدا کی تعداد 35 ہوگئی، اب تک پمز میں 29 اور پولی کلینک میں 5 اور 1 نجی ہسپتال میں زخمی شہید ہوچکے ہیں۔

اسلام آباد: وزیرِ دفاع خواجہ آصف نےکہا ہے کہ ملک میں 78 سال سے بہت واقعات ہوئے ، ماضی کی غلطیوں سے سیکھ کر ازالہ کرنا ہوگا۔سینیٹ اجلاس میں اظہارِ خیال کرتے ہوئے خواجہ آصف کا کہنا تھا کہ گزشتہ دو،تین سال میں دہشت گردی کے واقعات بڑھے ہیں، ہم دہشت گردی کی مذمت کرنے کے لیے بھی متحد نہیں۔اُنہوں نے کہا کہ کیا یہ قرض اُن پرواجب ہے جو اپنی جان وطن کے لیے نچھاور کر رہے ہیں، کیا یہ قرض کسی اور پر واجب نہیں ہے؟ اقتدارکے حصول کے لیے اُن کے جنازوں پر بھی نہیں جاتے، ہم اُن کی قربانیوں کوبھی اون نہیں کرتے۔وزیرِ دفاع کا کہنا تھا کہ افسوس ہے کہ دہشت گردی کی مذمت تک نہیں کی جاتی، ملکی دفاع کے لیے شہدا کی قربانیاں رائیگاں نہیں جائیں گی، میں نے جمعہ والے دن واقعہ ہوا تو مسلک بتایا تھا، مجھے اسلام کے کسی بھی فقہ سےکوئی اختلاف نہیں۔خواجہ آصف نے کہا کہ مجھے تھریٹ آگئی، میرا فون بھرا ہوا ہے، اِس سے میں کوئی خائف نہیں، اس مٹی کو اپنا وجود مانیں، اگر باہر سے بھی آئے تھے، شناخت اِس کو بنائیں، اِس شناخت کو تلاش کرنے کے لئے کہیں اور جانے کی ضرورت نہیں ہے۔اُن کا کہنا تھا کہ صدیاں گزر گئیں تو اس مٹی سے رشتہ تو جوڑیں، اگر کسی قومیت کو اختلافات ہیں تو وہ بھی سرحد پار نہ دیکھے، ہم اپنے سپانسر باہر جا کر نہ ڈھونڈیں، ہم کفالت کے لئے کبھی واشنگٹن، کبھی ماسکو چلے جاتے ہیں۔وزیرِ دفاع نے کہا کہ بھارت نے جو جنگ ہم سے ہاری، اب وہ ڈائریکٹ سٹیٹ ٹو سٹیٹ وار کی جرأت نہیں کرے گا، مودی ساری دنیا اور اپنے ملک میں بھی رُل گیا ہے، نہ وہ گھر کا نہ گھاٹ کا۔خواجہ آصف کا کہنا تھا کہ میں پہلی دفعہ افغانستان گیا میرے ساتھ اُس وقت کے ڈی جی آئی ایس آئی تھے، افغانستان نے کہا ہم اُن کو دور کہیں لے جاتے ہیں، اِس کے لئے ہم سے دس ارب مانگا گیا، وہ گارنٹی دینے کو تیار نہیں تھے۔اُنہوں نے کہا کہ اِس کے بعد جتنے بات چیت کے ادوار ہوئے ہیں انہوں نے ہماری باتیں تسلیم کی ہیں لیکن گارنٹی دینےکو تیار نہیں، کیا افغانستان کی حکومت کو نہیں پتہ یا وہ اِس میں ملوث ہیں، بھارت سامنے آکے مقابلہ نہیں کرسکتا، افغانستان کے پلو میں چھپ کے ہم پہ وار کر رہا ہے۔وزیرِ دفاع کا کہنا تھا کہ دونوں جنگیں ہماری نہیں تھیں، ایک نقطے پر ہمار اتحاد ہونا چاہیے کہ ہندوستان ہمارے خلاف پراکسی وار لڑ رہا ہے، اِس ایوان کو فعال بنائیں، اس ملک میں 78 سال میں بہت سے واقعات ہوئے، ہم اپنی ماضی کی غلطیوں کا ازالہ بھی کر سکتے ہیں۔خواجہ آصف نے مزید کہا کہ اگر صوبوں میں وسائل ہیں تو صوبوں کا پہلا حق ہے، آپ سوچ بھی نہیں سکتے موجودہ حالات میں کتنے اتحاد کی ضرورت ہے۔

القادر ٹرسٹ، سائفر کیس سے بریت کے خلاف اپیلیں، توشہ خانہ ،9مئی کیسزشامل، نوٹسز جاری، چیف جسٹس یحیٰ آفریدی کی سربراہی میں2 رکنی بینچ سماعت کریگا ایسے کیا حالات بنے رات گئے پمز لے جانا پڑا:وکیل بانی، قیدی کے ذاتی معالج کا رول نہیں:پراسیکیوٹر، معاملہ زیر سماعت نہ ہونے پر حکام کو بھجوا دیا:سپریم کورٹ اعلامیہ

اسلام آباد، راولپنڈی :سپریم کورٹ میں عمران خان کے خلاف 13 مقدمات کل سماعت کیلئے مقرر کر دیئے گئے ، خصوصی عدالت نے ذاتی معا لج سے معائنے کی درخواست مسترد کر دی۔ سپریم کورٹ نے بانی پی ٹی آئی کے 13 مختلف مقدمات سماعت کیلئے مقرر کر دیئے ، چیف جسٹس یحیٰ آفریدی اور جسٹس شاہد بلال پر مشتمل دو رکنی بینچ 9 فروری کو سماعت کرے گا۔ بانی تحریک انصاف اور بشریٰ بی بی کی ضمانتوں کے خلاف پنجاب حکومت کی اپیلیں، بانی پی ٹی آئی کی الیکشن کمیشن کی فوجداری شکایت کے خلاف اپیل، بانی پی ٹی آئی کے آفیشل سیکرٹریٹ اور نیب کے مقدمات پر سماعت فکس کر دی گئی، القادر ٹرسٹ کیس میں بانی کی ضمانت کے خلاف نیب اپیل، سائفر کیس میں بانی پی ٹی آئی اور شاہ محمود قریشی کی بریت کے خلاف اپیل، 9 مئی لاہور مقدمات میں بانی کی ضمانت کے خلاف حکومتی اپیل، ہتک عزت کیس میں شہباز شریف کے خلاف بانی کی اپیلیں بھی سماعت کیلئے مقرر کر دی گئی ہیں۔ رجسٹرار آفس نے تمام متعلقہ فریقین اور وکلاء کو نوٹسز جاری کر دیئے ۔توشہ خانہ کیس سے متعلق فوجداری درخواستیں بھی سماعت کیلئے مقرر کر دی گئیں، اسلام آباد ہائیکورٹ میں کارروائی مکمل ہونے کے بعد کیس دوبارہ سپریم کورٹ نے سماعت کیلئے مقرر کر دیا۔ ٹرائل کورٹ نے بانی پی ٹی آئی کو تین سال قید کی سزا سنائی تھی، اسلام آباد ہائیکورٹ نے سزا معطل کر دی تھی۔ الیکشن ایکٹ کی دفعات 167 اور 173 کے تحت سزا سنائی گئی تھی، بانی کے خلاف توشہ خانہ فوجداری کیس پر 9 فروری کو سماعت ہوگی۔ انسداد دہشتگرد ی عدالت نے بانی پی ٹی آئی کی ذاتی معالجین سے میڈیکل چیک اپ سے متعلق دائر درخواست خارج کر دی۔ بانی پی ٹی آئی کے وکیل فیصل ملک نے دلائل دیتے ہوئے کہا سابق وزیراعظم نواز شریف کو جیل میں ذاتی معالج کی سہولت حاصل رہی،بانی پی ٹی آئی ملک کے سابق وزیراعظم اور برابر سلوک کے مستحق ہیں۔اڈیالہ جیل میں آنکھوں کی ٹریٹمنٹ کا انتظام نہیں، وہ انڈر ٹرائل قیدی ہیں ذاتی معالج سے میڈیکل چیک اپ حق ہے ، تین سال میں بانی کو کبھی جیل سے باہر نہیں لے جایا گیا، ایسے کیا غیر معمولی حالات بنے کہ رات گئے پمز ہسپتال لے جانا پڑا،استدعا ہے ذاتی معالجین کو اڈیالہ جیل میں رسائی دی جائے ۔ سپیشل پراسیکیوٹر ظہیر شاہ نے درخواست کی مخالفت کی اور دلائل میں کہا بانی پی ٹی آئی انڈر ٹرائل قیدی نہیں نو مئی جی ایچ کیو حملہ کیس میں ضمانت پر اور انڈر ٹرائل ملزم ہیں قیدی نہیں، کریمنل کورٹ کے پاس اختیار نہیں ضمانت پر کسی ملزم کی کسٹڈی ریگولیٹ کرے ، قیدی کے علاج معالجے کیلئے حکومت ڈاکٹرز کا تعین کرتی ہے ، پاکستان پرزن رولز میں پرائیویٹ ڈاکٹرز سے علاج کرانے کا کوئی ذکر نہیں، قیدی کیلئے ذاتی معالج کا پرزن رولز میں کوئی رول نہیں۔ عدالت نے دلائل سننے کے بعد بانی کیلئے ذاتی معالجین کی اڈیالہ جیل میں رسائی کی درخواست خارج کر دی۔ سماعت جج امجد علی شاہ نے کی۔سپریم کورٹ نے چیف جسٹس پاکستان کو بانی پی ٹی آئی سے متعلق یاد داشت بھیجنے کے معاملہ میں احتجاج اور یاد داشت سے متعلق اعلامیہ جاری کر دیا جس میں کہاگیا کہ پی ٹی آئی اور اپوزیشن ارکان نے سپریم کورٹ کے باہر احتجاج کیا، بانی پی ٹی آئی تک رسائی اور میڈیکل رپورٹس کے حصول کا مطالبہ کیا گیا، رجسٹرار سپریم کورٹ نے وفد کی جانب سے میمورنڈم وصول کیا،پی ٹی آئی وکیل سلمان اکرم راجہ کی چیف جسٹس پاکستان سے ملاقات کرائی گئی، سپریم کورٹ نے معاملہ زیر سماعت مقدمے سے متعلق نہ ہونے پر متعلقہ حکام کو بھجوا دیا، ایک ہفتے تک جواب موصول نہ ہونے پر پی ٹی آئی وفد دوبارہ سپریم کورٹ پہنچا، سپریم کورٹ نے ایسے معاملات کیلئے متاثرہ فریقین سے رابطے کیلئے ایس او پیز بنا دیئے جن میں انصاف تک رسائی اور ادارہ جاتی معاونت سمیت دیگر مسائل کو دیکھا جائے گا۔

اسلام آباد: وفاقی دارالحکومت اسلام آباد میں خودکش دھماکے کے شہدا کی نمازِ جنازہ امام بارگاہ خدیجتہ الکبریٰ اور امام بارگاہ جامع صادق میں ادا کردی گئی۔امام بارگاہ خدیجتہ الکبریٰ میں گیارہ شہدا جبکہ امام بارگاہ جامع صادق میں تین شہداء کی نمازِ جنازہ ادا کی گئی ہے، نمازِ جنازہ کے موقع پر وفاقی وزراء، پولیس حکام، تمام مکاتبِ فکر کے جید علمائے کرام، سیاسی رہنماؤں اور شہریوں کی بڑی تعداد نے شرکت کی، کل 33 شہدا کی غائبانہ نماز جنازہ ادا کی گئی۔شہداء کی میتیں جب نمازِ جنازہ کے لیے لائی گئیں تو فضا رقت آمیز ہو گئی، ہر طرف آہیں اور سسکیاں سنائی دیتی رہیں اور سوگوار اپنے جذبات پر قابو نہ رکھ سکے۔امام بارگاہ خدیجتہ الکبریٰ میں نمازِ جنازہ تحریک نفاذ فقہ جعفریہ کے سربراہ علامہ حسین مقدسی نے پڑھائی، اس موقع پر سیکیورٹی کے سخت انتظامات کیے گئے تھے اور پولیس و قانون نافذ کرنے والے ادارے مکمل طور پر الرٹ رہے۔دوسری جانب امام بارگاہ جامع صادق جی نائن میں شہداء کی نمازِ جنازہ آغا شیخ محمد شفا نجفی نے پڑھائی، جس میں اپوزیشن لیڈر، آئی جی اسلام آباد، سیاسی و مذہبی شخصیات اور شہریوں کی بڑی تعداد نے شرکت کی، جنازہ گاہ کے اطراف بھی سخت سیکیورٹی انتظامات نافذ کیے گئے تھے۔اس موقع پر شرکا نے واقعہ کی شدید مذمت کرتے ہوئے شہداء کے درجات کی بلندی اور لواحقین کے لیے صبر جمیل کی دعا کی، جبکہ مطالبہ کیا گیا کہ دہشت گردی کے ذمہ داروں کو جلد از جلد قانون کے کٹہرے میں لایا جائے۔