Category: اہم خبریں

کراچی:امیرجماعت اسلامی کراچی منعم ظفر خان نے جماعت اسلامی کے ٹاؤن چیئرمینوں کے ہمراہ شہر بھر میں شروع کی جانے والی ’’جراثیم کُش اسپرے مہم‘‘ کا افتتاح کردیا۔ٹاؤن آفس ،ٹی ایم سی لیاقت آباد میں افتتاحی تقریب سے خطاب کرتے ہوئے منعم ظفر خان نے کہاکہ مہم کا مقصد کراچی کے شہریوں کو صحت مند اور محفوظ ماحول فراہم کرنا ہے ۔ قابض میئر مرتضیٰ وہاب اگر عوامی خدمت اور مسائل حل نہیں کر سکتے تو کم از کم عوام پر ٹیکسوں اور اپنی نا اہلی کا بوجھ نہ ڈالیں ، ایک طرف قابض میئر میونسپل یوٹیلیٹی چارجزمیں ناجائز اضافہ کرتے ہیں، دوسری طرف بلند و بالا دعوے کرتے ہیں۔ اصل حقیقت یہ ہے کہ یہ عوام کو ریلیف دینے میں ناکام رہے ہیں۔لیکن جماعت اسلامی کراچی کے عوام کے ساتھ کھڑی ہے ، ہم خدمت کے میدان میں بھی آگے بڑھیں گے اور مزاحمت و جدوجہد کے ذریعے کراچی کے عوام کو ان کا حق دلوا کر رہیں گے ۔کراچی کے عوام کا حق ہے کہ انہیں صاف پانی، صاف ماحول، کھیل کے میدان اور صحت مند سہولیات میسر آئیں لیکن افسوس کہ آج بھی شہر کے پارک اور میدان کمرشل سرگرمیوں کی نذر کیے جا رہے ہیں۔ عدالت نے حال ہی میں پارکوں کے کمرشل استعمال کے خلاف تاریخی فیصلہ دیا ہے ، جو کراچی کے عوام کی بہت بڑی کامیابی ہے ۔ عوام کے پارک عوام کے لیے ہیں، یہ کسی کے کاروبار کا ذریعہ نہیں۔ اس فیصلے پر اگر کسی کو پریشانی ہے تو وہ ان افراد کو ہے جن کا کرپشن کا عمل متاثر ہوا ہے ۔

کراچی: محکمہ ٹرانسپورٹ سندھ نے کمرشل گاڑیوں کے روٹ پرمٹس کے اجرا اور رجسٹریشن کے لیے آن لائن پورٹل باضابطہ طور پر شروع کر دیا ہے ۔سندھ کے سینئر وزیر شرجیل انعام میمن نے کہا ہے کہ منتقلی کے عمل کو شفاف اور ہموار بنانے کے لیے تمام متعلقہ اسٹیک ہولڈرز کو اس تبدیلی سے آگاہ کر دیا گیا ہے۔ ایک بیان میں انہوں نے کہا کہ محکمہ ٹرانسپورٹ نے 2024 میں صوبے کے ٹرانسپورٹ نظام کی ڈیجیٹلائزیشن کے لیے ’’آٹومیشن آف پی ٹی اے ، آر ٹی ایز اور ایم وی آئیز کے منصوبے کا آغاز کیا تھا، جس کے پہلے مرحلے میں مارچ 2025 میں گاڑیوں کی رجسٹریشن، فزیکل انسپیکشن اور فٹنس سرٹیفکیٹس کے اجرا کے لیے آن لائن پورٹل لانچ کیا گیا تھا۔کراچی میں دو نئے وہیکل فٹنس سینٹرز قائم کیے گئے ہیں،صرف چار ماہ کے قلیل عرصے میں 35 ہزار سے زائد گاڑیوں کو فٹنس سرٹیفکیٹس جاری کیے جا چکے ہیں جبکہ بغیر فٹنس گاڑیوں کا ڈیٹا ٹریفک پولیس اور موٹر وے پولیس سے بھی شیئر کیا جا رہا ہے ۔ مزید فٹنس سینٹرز تمام ڈویژنل ہیڈکوارٹرز میں قائم کرنے کا فیصلہ کیا ہے تاکہ زیادہ سے زیادہ گاڑیوں کو یہ سہولت فراہم کی جا سکے ۔ نئے آن لائن سسٹم کے ذریعے ٹرانسپورٹرز کو یہ سہولت حاصل ہوگی کہ وہ دفتر آئے بغیر ہی روٹ پرمٹس کے اجرا یا تجدید کے لیے درخواست دے سکیں گے ۔ اس کے ساتھ ساتھ گاڑی مالکان کو پرمٹ کی میعاد ختم ہونے سے 15 روز قبل ایس ایم ایس کے ذریعے اطلاع بھی فراہم کی جائے گی۔

اسلام آباد: وفاقی وزیر اطلاعات و نشریات عطا تارڑ نے کہا کہ پاکستان میں دہشت گردی کی کوئی گنجائش نہیں، دہشت گردی کا سرکچلیں گے۔میڈیا سے گفتگو کرتے ہوئے وفاقی وزیر اطلاعات و نشریات عطا تارڑ کا کہنا تھا کہ افواج پاکستان کا ملک کی سرحدوں کے دفاع میں کردار ناقابل فراموش ہے، ملک میں دہشت گردوں کے لیے کوئی جگہ نہیں۔عطا تارڑ نے کہا کہ دہشت گرد کا کوئی رنگ، نسل اور مذہب نہیں ہوتا، جو تشدد کا راستہ اختیار کرتے ہیں وہ ملکی سالمیت کو نقصان پہنچاتے ہیں۔انہوں نے کہا کہ پیغام امن کمیٹی ملک کے کونے کونے میں امن کا پیغام لے کر جائے گی، دہشت گردی کے ناسور کو ہمیشہ کے لیے ختم کریں گے۔

حافظ آباد: وائس چانسلر گورنمنٹ کالج یونیورسٹی فیصل آباد پروفیسر ڈاکٹر رؤف اعظم کا سب کیمپس حافظ آباد کا دورہ۔ وائس چانسلر نے سب کیمپس میں نئی کمپیوٹر لیب اور لائبریری کا افتتاح کیا اور شجر کاری مہم کے سلسلہ میں پودا بھی لگایا۔ وائس چانسلر پروفیسر ڈاکٹر رؤف اعظم کاکہنا تھا کہ چھوٹے اور دور دراز شہروں میں یونیورسٹی کا قیام ان علاقوں میں جدید تعلیم کے فروغ کیلئے سنگ میل ہے اور ان علاقو ں کے نوجوانوں کیلئے سنہری موقع ہے کہ وہ اپنے شہر میں رہتے ہوئے اپنی اعلیٰ تعلیم کو مکمل کر سکتے ہیں۔ حافظ آباد کیمپس کی بدولت والدین کو اپنے بچوں کو بڑے شہروں میں بھیجنے کی ضرورت نہیں رہی اور وہ اپنے شہر میں ہی اعلیٰ تعلیم کے زیور سے آراستہ ہو رہے ہیں۔ انہوں نے کیمپس کو مزید فعال کرنے اور مستقبل میں توسیع کیلئے حکومت پنجاب اور مقامی قیادت سے گفتگو کا عندیہ دیا۔وائس چانسلر کاکہنا تھا کہ سب کیمپس میں نئی لائبریری اور کمپیوٹر لیب کے قیام سے طلبا و طالبات کو اپنی تدریسی سرگرمیوں کو مزید بہتر بنانے میں رہنمائی حاصل ہو گی ۔انکاکہنا تھا کہ آج کے دور میں آئی ٹی کا شعبہ بڑی اہمیت اختیار کر چکا ہے ، اس لئے تمام طلبا و طالبات کو کمپیوٹرکی تعلیم ضرور حاصل کرنی چاہیے ۔

لاہور: پنجاب میں طلبہ میں جلد لیپ ٹاپ تقسیم ہونگے، محکمہ ہائر ایجوکیشن نے ہوم ورک مکمل کرلیا۔محکمہ خزانہ نے پروگرام کیلئے 5ارب 50 کروڑ روپے جاری کر دئیے، محکمہ نے یہ بجٹ محکمہ ہائر ایجوکیشن کو لیپ ٹاپس دینے کیلئے جاری کیا ہے۔

اسلام آباد: چیئرمین پی ٹی اے نے اسلام آباد ہائیکورٹ کی جانب سے عہدے سے ہٹائے جانے کے فیصلے کیخلاف انٹراکورٹ اپیل دائر کی۔چیئرمین پی ٹی اے نے انٹرا کورٹ اپیل آرڈیننس 1972ء کے تحت دائر کی ہے، جس میں موقف اختیار کیا گیا ہے کہ اپیل کنندہ پاکستان ٹیلی کمیونی کیشن اتھارٹی (پی ٹی اے) کے موجودہ چیئرمین ہیں۔چیئرمین پی ٹی اے کو پہلے 24 مئی 2023 کو پی ٹی اے میں ممبر (انتظامیہ) مقرر کیا گیا تھا، 25 مئی 2023 کو انہیں چیئرمین پی ٹی اے کے طور پر تعینات کیا گیا۔چیئرمین پی ٹی اے میجر جنرل (ر) حفیظ الرحمان قوانین اور ضوابط کے مطابق اپنے کام انجام دے رہے ہیں، یہ اپیل چیئرمین پی ٹی اے کی قانونی تعیناتی کو ثابت کرنے کیلئے دائر کی گئی ہے۔واضح رہے کہ اسلام آباد ہائیکورٹ کے جسٹس بابر ستار نے آج ایک محفوظ فیصلہ سناتے ہوئے چیئرمین پی ٹی اے کو عہدے سے ہٹانے کا فیصلہ دیا تھا۔اپیل کنندہ چیئرمین پی ٹی اے نے عدالت سے اپیل فوری سماعت کیلئے مقرر کرنے کی بھی درخواست کی ہے۔

سیالکوٹ: انسانی سمگلرز نے زمینی راستوں پر سختی کے بعد نیا طریقہ واردات اپنا لیا۔وفاقی تحقیقاتی ایجنسی (ایف آئی اے) کے مطابق 22 افراد پر مشتمل جعلی فٹبال ٹیم سیالکوٹ ایئرپورٹ سے جاپان پہنچ گئی، دستاویزات جعلی ثابت ہونے پرجاپان نے تمام افراد کو واپس ڈی پورٹ کردیا اور اسکینڈل میں ملوث ملزم ملک وقاص کو گرفتار کرلیا گیا۔ایف آئی اے کے مطابق تمام افراد کو فٹ بال ٹیم کے کھلاڑیوں کی طرح تربیت دی گئی، ملزم نے 22 افراد سے فی کس 40 لاکھ روپے وصول کیے، تھانہ ایف آئی اے گوجرانوالہ میں واقعے کا مقدمہ بھی درج کرکے تفتیش کا آغاز کردیا۔ایف آئی اے نے بتایاکہ ملزم نے فٹ بال فیڈریشن کی جعلی رجسٹریشن دستاویزات بنائیں، جعلی دستاویزات کے مطابق ملزمان کے جاپان میں فٹ بال میچ شیڈول تھے، ملزم نے وزارت خارجہ کے جعلی کاغذات بھی تیار کیے تھے، 22 افراد نے فٹ بال ٹیم کے روپ میں سیالکوٹ ائیرپورٹ سے فلائی کیا، جاپان ائیرپورٹ پر جعلی دستاویزات پکڑی گئیں۔گرفتار ملزم نے اعتراف کیاکہ جنوری 2024 میں بھی جعلی فٹبال ٹیم میں 17 افراد کو جاپان بھجوایا تھا۔