Category: اہم خبریں

اسلام آباد: چیئرمین پی ٹی آئی بیرسٹر گوہر علی خان کا امریکی کانگرس کے بل سے متعلق ردعمل سامنے آ گیا۔میڈیا سے خصوصی گفتگو کرتے ہوئے چیئرمین پی ٹی آئی بیرسٹر گوہر نے کہا کہ بانی پی ٹی آئی کی رہائی کے لیے اس بار سنجیدہ اقدامات کریں گے، رہائی میں سب سے بڑی رکاوٹ آزاد عدلیہ کا نہ ہونا ہے۔بیرسٹر گوہر علی نے کہا کہ اگر عدلیہ فیصلہ نہیں کرتی تو ہمارا پولیٹیکل الائنس فیصلہ کرے گا، اعظم سواتی نے ایسی کوئی بات نہیں کی جس پر ہم ایکشن لیں۔چیئرمین پی ٹی آئی کا کہنا تھا کہ قرآن اور قسم کی روش ختم ہونی چائیے، آئندہ کوئی بات پبلک پر نہیں کی جائے گی۔بیرسٹر گوہر نے مزید کہا کہ امریکہ میں کئی بل آتے رہتے ہیں، کوئی پاس ہوتے ہیں کوئی نہیں ہوتے، میں نے بل دیکھا ہے نہ پی ٹی آئی کا اس بل سے کوئی لینا دینا ہے۔

راولپنڈی(خبرنگار، نیوز ایجنسیاں، مانیٹرنگ ڈیسک)اڈیالہ جیل میں بانی پی ٹی آئی عمران خان سے وزیر اعلیٰ خیبر پختونخوا علی امین گنڈا پور اور بیر سٹر سیف کی اڑھائی گھنٹے طویل الگ الگ خصوصی ملاقاتیں ہوئیں۔ بانی پی ٹی آئی نے علی امین کی کارکردگی پر اظہار اطمینان کرتے ہوئے اسٹیبلشمنٹ سے مذاکرات کی اجازت دیدی۔
کے پی کے سے متعلق تمام معاملات پر علی امین گنڈا پور خود مختار ہو نگے۔ بدھ کی دوپہر دو بجے علی امین گنڈاپور سرکاری پروٹوکول میں اڈیالہ جیل پہنچے ان کے ہمراہ سنیئر مشیر بیرسٹر سیف بھی تھے۔ جیل ذرائع کے مطابق بانی پی ٹی آئی نے دونوں رہنمائوں سے الگ الگ ملاقاتیں کیں ۔جیل کے کانفرنس روم میں ہونے والی ملاقاتوں میں سب سے پہلے بیرسٹر سیف کی ملاقات ہوئی اس کے بعد علی امین گنڈا پور کی ملاقات ہوئی ۔ علی امین ساڑھے چاربجے کے بعد جیل سے واپس روانہ ہو گئے ۔ملاقاتوں کے حوالے سے ذرائع سے ملنے والی معلومات کے مطابق علی امین گنڈاپور نے بانی پی ٹی آئی کو کے پی کے حکومت کی کارکردگی کی رپورٹ پیش کی ۔ بانی پی ٹی آئی نے وزیر اعلیٰ کی کارکردگی کو سراہا اور فلاحی منصوبوں کی تعریف کی ۔ سپیکر اسمبلی اور اعظم سواتی کے حوالے سے معاملہ کو خود حل کرنے کی ہدایت کی ۔ مجموعی طور پر علی امین کی کارکردگی کو سراہا اور کے پی کے سے متعلق تمام معاملات میں فیصلہ کرنے کا اختیار بھی دیا ۔ ملاقات میں قیادت پر سوشل میڈیا پر جاری بے جا تنقید بھی زیر بحث آئی،ملاقات میں اداروں سے ٹکراؤ کی پالیسی پر نظر ثانی پر بھی بات ہوئی، بانی پی ٹی آئی نے علی امین گنڈا پور اور بیرسٹر سیف کو اسٹیبلشمنٹ سے مذاکرات کا ٹاسک دے دیا،آنے والے چند دنوں میں علی امین گنڈا پور بانی پی ٹی آئی سے ایک اور ملاقات کرینگے ، ملاقات میں پارٹی معاملات سمیت تمام امور پر بھی بات چیت کی گئی، بیر سٹر سیف اور گنڈاپور نے اسٹیبلشمنٹ کے ساتھ مذاکرات کے حوالے سے بانی پی ٹی آئی کو اپنے نقطہ نظر پر قائل کیا۔
دوسری طرف عید کے دنوں میں بانی پی ٹی آئی اور بشریٰ بی بی سے فیملیز ملاقات کے لئے نہ آئیں عید کے دوسرے دن اعظم سواتی ، نادیہ خٹک اور مبشر مقصود اعوان کی ملاقات ، سلمان اکرم راجا کی دی گئی فہرست پر ملاقات نہ ہو سکی ۔ عید کے دوسرے دن بانی پی ٹی آئی سے ملاقات سے قبل گیٹ 5 پر تنازع کھڑا ہوگیا۔بانی سے ملاقات کے لیے نامزد کوارڈنیٹر سلمان اکرم راجہ کو ملاقات کی اجازت نہ ملی جبکہ اعظم خان سواتی، نادیہ خٹک، تابش فاروق، مبشر اعوان اور انصر کیانی کو اجازت مل گئی ۔سلمان اکرم راجا نے کہا کہ یہ کیسے ہوسکتا ہے میں نے نام دئیے اور مجھے ہی ملاقات کی اجازت نہیں ملی۔سلمان راجہ اجازت نہ ملنے پر ساتھیوں سمیت گیٹ پانچ پر موجود رہے ۔ بانی پی ٹی آئی اور بشریٰ بی بی سے ملاقات کے بعد اعظم خان سواتی، مبشر اعوان اور نادیہ خٹک جیل سے باہر آئے اور اعظم سواتی اور سلمان اکرم راجا میں طویل مشاورت ہوئی ۔باقی رہنمائوں کو مشاورت میں شامل ہونے سے روک دیا گیا ۔میڈیا سے گفتگو کرتے ہوئے اعظم خان سواتی نے کہا کہ میری بانی پی ٹی آئی سے دیگر دو لوگوں کے ہمراہ ملاقات ہوئی ہے ۔بانی کو بتایا سلمان اکرم راجا آپ کا سودا نہیں کرے گا۔میں نے بانی کو مانسہرہ کی کرپشن کے معاملات پر بتایا۔میں نے بانی کو بتایا کمیٹی کے معاملات سامنے لائے جائیں۔بانی نے کہا ہے کمیٹی نے فیصلہ کیا ہے تو سپیکر کے پی اسمبلی کو مستعفی ہوجانا چا ہئے ۔پی ٹی آئی کے بانی عمران خان نے تیسری عید اڈیالہ جیل میں گزار ی ۔بعض میڈیا رپورٹ کے مطابق گزشتہ روز اعظم سواتی خاص پیغام لے کر اڈیالہ جیل گئے تھے اور اعظم سواتی کی ملاقات علی امین گنڈا پور نے مینیج کی تھی۔

کراچی: سندھ حکومت نے سابق ذوالفقار علی بھٹو کی برسی کے موقع پر عام تعطیل کا اعلان کر دیا ہے۔کل پیپلز پارٹی کے بانی کی چھیالیسویں برسی ہے، چیف سیکرٹری سندھ آصف حیدر شاہ نے عام تعطیل کا نوٹیفکیشن جاری کیا ہے۔نوٹیفکیشن میں کہا گیا ہے کہ صوبے کے تمام سرکاری دفاتر، خودمختار ادارے، کارپوریشنز اور مقامی کونسلیں بند رہیں گی۔پیپلز پارٹی برسی کے موقع پر گڑھی خدا بخش میں تعزیتی اجتماع منعقد کرے گی، ملک بھر سے کارکنوں اور حامیوں کی بڑی تعداد کے شریک ہونے کی توقع ہے۔