Category: بین الاقوامی

اسلام آباد- وزیراعظم محمد شہبازشریف آج نیویارک میں اقوام متحدہ کی جنرل اسمبلی کے 79ویں اجلاس سے خطاب کریں گے
دفترخارجہ کی ترجمان ممتاز زہرہ بلوچ نے اسلام آباد میں ہفتہ وار نیوز بریفنگ کے دوران کہا کہ وزیراعظم عالمی فورم پر فلسطین اور مسئلہ کشمیر سمیت عالمی اہمیت کے مسائل کو اجاگر کریں گے
ترجمان کا کہنا تھا کہ پاکستان جنوبی ایشیا میں پائیدار امن و استحکام کے لیے مسئلہ کشمیر کے حل کی اہمیت کو اجاگر کرتا رہے گا

(سنگ میل نیوز )تائیوان کے وزیر اقتصادیات نے لبنان میں ہونے والے پیجرز دھماکوں کے آلات کی تائیوان میں تیار ہونے کی تردید کردی۔

لبنان میں پیجر، واکی ٹاکی سمیت دیگر الیکڑانک آلات میں دھماکوں کے معاملے پر تائیوان کے وزیر اقتصادیات نے کہا کہ پیجرز میں استعمال ہونے والے اجزاء تائیوان میں نہیں بنائے گئے تھے البتہ دیگر معاملات پر تحقیقات جاری ہیں۔

پیجر دھماکوں کے حوالے سے لبنانی مشن برائے اقوام متحدہ نے اپنے بیان میں کہا کہ دھماکاخیز موادلبنان پہنچنےسے پہلےآلات میں رکھا گیا تھا۔

دوسری جانب مشرق وسطیٰ میں بڑھتی ہوئی کشیدہ صورت حال پر تشویش کا اظہار کرتے ہوئے وائٹ ہاؤس ترجمان اور برطانوی وزیر خارجہ نے مسئلے کے سیاسی اور سفارتی حل پر زور دیا۔

پیجرز کہاں سے آئے؟ معاملہ تائیوان اور ہنگری سے بلغاریہ اور ناروے تک پھیل گیا

ترجمان وائٹ ہاؤس نے اپنے بیان میں کہا کہ مشرق وسطیٰ میں فوری سفارتی حل کی ضرورت ہے، اسرائیل اورحماس کے درمیان جنگ بندی معاہدہ خطے میں کشیدگی کوکم کرےگا۔

برطانوی وزیر خارجہ نے بھی اسرائیل اور لبنان سے فوری جنگ بندی کا مطالبہ کرتے ہوئے کہا کہ مذاکرات کے ذریعے سیاسی تصفیہ دیکھنا چاہتے ہیں، ہم چاہتےہیں اسرائیلی اور لبنانی اپنےگھروں کو واپس جا سکیں۔

واضح رہے کہ رواں ہفتے لبنان کے مختلف شہروں میں پیجرز، واکی ٹاکی سمیت دیگر الیکڑانک آلات اچانک دھماکوں سے پھٹ گئے جس کے نتیجے میں 30 سے زائد افراد جاں بحق ہو گئے اور ہزاروں زخمی بھی ہوئے۔

مظفرآباد: ((سنگ میل نیوز)بھارت نے مقبوضہ کشمیر کے اوڑی ڈیم سے دریائے جہلم میں اضافی پانی چھوڑ دیا۔

ڈائریکٹر آپریشن ایس ڈی ایم اے کے مطابق دریائے جہلم میں پانی کی سطح بلند ہوگئی تاہم بہاؤ میں اضافے سے دریائے جہلم میں سیلاب کی صورتحال پیدا نہیں ہوگی۔

ایس ڈی ایم اے نے بتایا کہ اوڑی ڈیم سے چھوڑے گئے پانی سے صرف 2 فٹ تک اضافہ ہوسکتا ہے، بھارت کی جانب سے چھوڑا گیا ریلہ دریائے جہلم میں مظفرآباد کے مقام سےگزر رہا ہے۔

دوسری جانب ڈومیل پل کے مقام پر پانی کی سطح میں اضافہ ریکارڈ کیا گیا ہے۔

امریکی کانگریس (سنگ میل نیوز)مین ٹام سوازی پاکستانی کاکس کے سربراہ بن گئے ہیں، انہوں نے آنجہانی رکن کانگریس شیلا جیکسن کی جگہ یہ منصب سنبھالا ہےجن کا19 جولائی کو انتقال ہوگیا تھا۔

ٹام سوازی کے پاکستانی کاکس کا سربراہ بننے سے متعلق تقریب نیویارک میں ہوئی جس میں پاکستانی کمیونٹی کی سرکردہ شخصیات شریک ہوئیں۔

اس موقع پر میڈیا سے بات کرتے ہوئے ٹام سوازی نے کہا کہ انکی کوشش ہوگی کہ وہ پاکستان اورامریکا کے درمیان رشتے مضبوط کریں، انہوں نے پاکستان آنے کی دعوت بھی قبول کی اور کہا کہ وہ چاہیں گے کہ نومبر ہی میں پاکستان کا دورہ کریں تاکہ اپنے دوستوں سے ملاقات ہو۔

امریکا میں پاکستان کے سفیر رضوان سعید شیخ نے تقریب کے بعد ٹام سوازی سے ٹیلی فون پر بات چیت کی جس میں دو طرفہ تعلقات پر تبادلہ خیال کیا گیا۔

ٹام سوازی نے پاک امریکہ تعلقات کو مزید مستحکم کرنے ،عوامی روابط کے فروغ کے حوالے سے مل کر کام کرنے اور امریکی کانگریس میں پاکستانی کاکس کومتحرک و مُستحکم کرنے کے عزم کا اعادہ کیا۔

سفیر پاکستان نے کہا کہ پاک امریکہ تعلقات دونوں ممالک اور خطے کے لیے انتہائی اہمیت کے حامل ہیں۔ اور یہ کہ وہ خیر سگالی اور دوستی کے اس جذبے کو ہمہ جہتی تعلقات خصوصا معاشی تعلقات کے فروغ کے لیے بھرپور طریقے سے برؤے کار لانے کے لیے پرعزم ہیں۔

ٹام سوازی نیویارک کے تھرڈ کانگریشنل ڈسٹرکٹ سے ایوان نمائندگان کے رکن ہیں۔ اس حلقے میں کوئنز ، لانگ آئی لینڈ کے علاقے اور نساؤ کاؤنٹی شامل ہے، ان تینوں علاقوں میں پاکستانی کمیونٹی کی بھی قابل ذکر تعداد آباد ہے۔

ڈیموکریٹ پارٹی سے تعلق رکھنے والے ٹام سوازی اٹارنی تھے اور وہ نساؤکاونٹی ایگزیکٹو اور گلین کوو علاقے کے میئر بھی رہ چکے ہیں۔وہ 30برس سے عوامی خدمات انجام دے رہے ہیں۔

ٹام سوازی نے اس سال فروری میں ہوئے خصوصی الیکشن میں نشست جیتی ہے۔ان کا مقابلہ ری پبلکن پارٹی سے تعلق رکھنے والی مازی فلپ سے تھا۔یہ نشست ری پبلکن پارٹی ہی سے تعلق رکھنے والے جارج سانتوس کی برطرفی سے خالی ہوئی تھی۔ اسی حلقے سے سوازی تین بار پہلے بھی رکن کانگریس منتخب ہوچکے ہیں۔یہی وجہ ہے کہ وہ ڈیموکریٹ پارٹی میں بااثر سمجھے جاتے ہیں۔

جب آنجہانی شیلا جیکسن پاکستان کاکس کی چیئرپرسن تھیں، اس وقت ٹام سوازی کانگریس میں پاکستانی کاکس کے کوچیئر تھے۔ یہی وجہ ہے کہ ٹام سوازی پاکستانی حلقوں میں بھی جانا پہچانا نام ہیں۔ وہ سن 2022 کے بدترین سیلاب سے3 کروڑ پاکستانیوں کے متاثر ہونے کےموقع پر امداد کیلئے پاکستان بھی آچکے ہیں۔

ٹام سوازی کا وہ دورہ پاکستانی امریکن تنویر احمد کی کاوشوں کے سبب ممکن ہوا تھا۔نیویارک میں منعقد تقریب کے بعد اس نمائندے سے بات کرتے ہوئے تنویر احمد نے امید ظاہر کی کہ شیلا جیکسن کی طرح ٹام سوازی بھی پاکستان کے لیے بڑھ چڑھ کر کاوشیں کریں گے۔