Category: کھیل

راولپنڈی:قومی کرکٹ ٹیم کے بلے باز بابر اعظم نے کہا ہے کہ اچھا وقت بہت مختصر ہوتا ہے ۔سابق انگلش کپتان کیون پیٹرسن کے یوٹیوب چینل پر انٹرویو کے دوران بابر اعظم نے کہا کہ جب میدان میں لوگ آپ کا نام پکارتے ہیں تو وہ کھلاڑی کے لیے بہت ہی مختلف احساس ہوتا ہے ۔بابر اعظم نے کہا کہ میرا خواب تھا کہ میں بطور کھلاڑی ملک کی نمائندگی کروں اور یہ میرا وقت ہے ۔کیون پیٹرسن نے سوال کیا کہ اے بی ڈی ویلیئرز آپ کے پسندیدہ کھلاڑی ہیں تو میں کون سے نمبر پر ہوں، دوسرے یا تیسرے ؟جس پر بابر اعظم نے کہا کہ ‘نہیں چھٹے یا شاید ساتویں ۔ بابر کے جواب پر دونوں نے زوردار قہقہہ لگایا۔بابر اعظم نے کہا کہ مجھے بلے بازی کرنا پسند ہے ۔ میں انسان ہوں، کبھی کبھار ہم فیل ہوجاتے ہیں تاہم اہم چیز توجہ مرکوز کرنا ہوتا ہے ۔انہوں نے کہا کہ جب آپ کھیل رہے ہوتے ہیں تو اچھا وقت بہت مختصر ہوتا ہے ،میرا مقصد ملک کیلئے ٹرافی جیتنا ہے جس کیلئے میں بہت محنت کر رہا ہوں۔

کراچی :اوور 40 ٹی20 ورلڈ کپ میں پاکستان نے ایونٹ کے فائنل میں جگہ بنا لی۔پاکستان نے سیمی فائنل میں امریکا کو 9وکٹوں سے شکست دے دی، دوسرے سیمی فائنل میں امریکا نے پہلے بیٹنگ کرتے ہوئے 153 رنز کا ہدف دیا۔فاتح ٹیم کے کپتان عبدالزاق اور ہمایوں فرحت نے 144 رنز کا آغاز فراہم کیا ،ہمایوں فرحت پانچ رنز کی کمی سے اپنی سنچری مکمل نہ کرسکے، اُنہوں نے 35 گیندوں پر 95 رنز کی جارحانہ اننگز کھیلی۔پاکستان نے مطلوبہ ہدف ایک وکٹ پر گیارہویں اوور میں حاصل کرلیا، پہلے سیمی فائنل میں آسٹریلیا نے جنوبی افریقہ کو شکست دیکر فائنل میں رسائی تک حاصل کی تھی۔خیال رہے اوور 40 ٹی 20 ورلڈ کپ کا فائنل پیر کو پاکستان اور آسٹریلیا کے درمیان کھیلا جائے گا۔

راولپنڈی: ٹی 20 ٹرائی سیریز کے فائنل معرکے میں پاکستان نے سری لنکا سے ٹاس جیت کر فیلڈنگ کا فیصلہ کیا۔قومی ٹیم کے کپتان سلمان علی آغا کا کہنا تھا کہ اوس پڑنے کی وجہ سے پہلے باؤلنگ کرنے کا فیصلہ کیا گیا ہے ، ٹیم میں ایک تبدیلی کی ہے، وسیم جونیئر کی جگہ شاہین آفریدی کو شامل کیا گیا ہے جب کہ اچھا کھیل پیش کرنے کی کوشش کریں گے۔سری لنکا کے کپتان داسن شناکا کا کہنا تھا کہ پاکستان میں ہمیشہ کرکٹ کو انجوائے کیا، یہاں سکیورٹی کے بہترین انتظامات کیے گئے، آج کے میچ میں کوئی تبدیلی نہیں کی۔دوسری جانب سری لنکا میں سیلاب سے جان کی بازی ہارنے والوں کی یاد میں دونوں ٹیموں نے ایک منٹ کی خاموشی اختیار کی۔واضح رہے فائنل میچ سے قبل ٹرافی کی رونمائی کی گئی، دونوں کپتانوں نے ٹرافی کے ساتھ تصاویر بنوائیں تھیں۔

لاہور:جنوبی افریقہ نے دوسرے ٹیسٹ میچ میں بھارت کو اس کی سرزمین پر شکست دے کر وائٹ واش کردیا۔ جنوبی افریقہ کے ہیڈ کوچ شکری کونارڈ نے کہا، ‘ہم چاہتے تھے کہ بھارتی کھلاڑی ڈکلیئریشن کے لیے ہم سے بھیک مانگیں، ہمارے آگے گِڑگِڑائیں تاکہ اِن کے میچ جیتنے کا کوئی چانس باقی نہ رہے ،جان بوجھ کر بیٹنگ کھینچی تاکہ بھارتی بولرز کو مزید تھکایا جا سکے اور انہیں گھٹنے ٹیکنے پر مجبور کیا جائے ۔

اسلام آباد:دفاعی چیمپئن سیالکوٹ نے قائداعظم ٹرافی کرکٹ ٹورنامنٹ کے پانچ روزہ فائنل میں جگہ بنالی ،جہاں اس کا مقابلہ کراچی بلوز سے ہوگا جویکم دسمبر سے قذافی سٹیڈیم لاہور میں کھیلا جائے گا۔ٹورنامنٹ کے نویں اور آخری راؤنڈ میں بہاولپور نے فیصل آباد کو 4 وکٹوں سے شکست دے دی۔فائنل کی دوسری ٹیم کے لیے فیصل آباد اور سیالکوٹ کے درمیان مقابلہ تھا سیالکوٹ نے 155 پوائنٹس کے ساتھ فائنل میں جگہ بنالی جبکہ فیصل آباد کے 141 پوائنٹس رہے ۔کراچی بلوز پہلے ہی161 پوائنٹس کے ساتھ فائنل میں کوالیفائی کرچکی تھی۔دو ٹیمیں بہاولپور اور ایبٹ آباد آخری دو پوزیشنوں پر آنے کی وجہ سے ریلیگیٹ ہوگئی ہیں۔مرغزار کرکٹ گراؤنڈ اسلام آباد میں بہاولپور کو جیتنے کے لیے 310 رنز کا ہدف ملا تھا اس نے میچ کے آخری دن 124 رنز 2کھلاڑی آؤٹ پر اپنی دوسری اننگز شروع کی اور چھ وکٹوں کے نقصان پر مطلوبہ سکور پورا کرلیا۔محمد شہریار 92 ،سیف اللہ بنگش 76 ناٹ آؤٹ، محمد عالمگیر69 اور محمد سدیس 53 رنز کے ساتھ قابل ذکرر ہے ۔محمد جنید پلیئر آف دی میچ قرار پائے ۔ڈائمنڈ کرکٹ گراؤنڈ اسلام آباد میں اسلام آباد نے پشاور کو اننگز اور 77 رنز سے ہرادیا۔ پشاور نے دوسری اننگز 183 رنز 2 کھلاڑی آؤٹ پر شروع کی لیکن پوری ٹیم 255 رنز بناکر آؤٹ ہوگئی۔رضا اللہ نے 100 رنز سکور کیے ۔وقار احمد نے 83رنز بنائے ۔موسیٰ خان نے 70 رنز دے کر5 وکٹیں حاصل کیں انہوں نے چار گیندوں پر چار وکٹیں حاصل کیں۔ انہوں نے میچ میں149 رنز دے کر 10 وکٹیں حاصل کیں اور اس عمدہ کارکردگی پر پلیئر آف دی میچ رہے ۔

راولپنڈی: سہ ملکی ٹی 20 سیریز میں سری لنکا نے پاکستان کو جیت کے لیے 185 رنز کا ہدف دے دیا۔راولپنڈی کرکٹ سٹیڈیم میں کھیلے جا رہے میچ میں پاکستان نے ٹاس جیت پر سری لنکا کو پہلے بیٹنگ کی دعوت دی۔پہلے بیٹنگ کرتے ہوئے سری لنکا نے مقررہ اوورز میں 5 وکٹوں کے نقصان پر 184 رنز سکور کیے، سری لنکا کی جانب سے کامل مشارا 76 رنز بنا کر نمایاں رہے۔کوشل مینڈس 40، کپتان داسن شناکا 17، پتھم نسانکا 8 اور کوشل پریرا 6 رنز بنا کر ناٹ آؤٹ پویلین لوٹے۔پاکستان کی جانب سے ابرار احمد نے 2 کھلاڑیوں کو آؤٹ کیا جبکہ سلمان مرزا اور صائم ایوب 1، 1 وکٹ لے سکے۔

راولپنڈی:سہ ملکی ٹی ٹونٹی کرکٹ سیریز میں پاکستان کی مسلسل تیسری فتح، گرین شرٹس زمبابوے کو 69رنز سے شکست دیکر ایونٹ کے فا ئنل میں پہنچ گئے ، آف سپنر عثمان طارق کی شاندار ہیٹرک، 18رنز دیکر 4کھلاڑیوں کو آؤٹ کیا۔ پنڈی کرکٹ سٹیڈیم میں کھیلے گے میچ کا ٹاس پاکستان کے کپتان سلمان علی آغا نے جیت کر بیٹنگ کا فیصلہ کیا۔پاکستان نے مقررہ 20 اوورز میں 5 وکٹوں پر 195 رنز سکور بنائے ۔ بابر اعظم نے 52گیندوں پرشاندار 74 رنز کی اننگز کھیلی جبکہ صاحبزادہ فرحان نے بھی 41گیندوں پر63 رنز کیے ۔فخر زمان نے 27، صائم ایوب نے 13 اور محمد نواز نے 4 رنز بنائے ۔ زمبابوے کی جانب سے سکندر رضا نے 2 اور براڈ ایوانز نے ایک وکٹ حاصل کی۔196 رنز کے تعاقب میں زمبابوے کی پوری ٹیم19ویں اوور میں 126 رنز پر ڈھیر ہوگئی۔ آف سپنر عثمان طارق نے یادگار باؤلنگ کا مظاہرہ کرتے ہوئے ہیٹرک مکمل کی۔ یہ ان کے کیریئر کا صرف دوسرا انٹرنیشنل ٹی ٹونٹی میچ تھا۔ عثمان نے صرف 18 رنز کے عوض 4 وکٹیں حاصل کیں۔محمد نواز نے 2 جبکہ نسیم شاہ اور فہیم اشرف نے ایک ایک وکٹ اپنے نام کی۔زمبابوے کی بیٹنگ لائن بری طرح ناکام رہی اور آٹھ بیٹر ڈبل فیگر میں داخل بھی نہ ہوسکے ۔رائن برل نے 67 اور سکندر رضا نے 23 رنز بنائے ، جبکہ برائن بینیٹ 9 اور برینڈن ٹیلر 8 رنز ہی بنا سکے ۔زمبابوے اور سری لنکا کے درمیان اہم میچ 25 نومبر کو کھیلا جائے گا۔