Category: اہم خبریں

کراچی:امیر جماعت اسلامی پاکستان حافظ نعیم الرحمن نے جمعہ کو ادارہ نور حق میں پریس کانفرنس کرتے ہوئے کہا ہے کہ موجودہ قومی و بین الاقوامی صورتحال میں امریکی سرپرستی میں غزہ پر اسرائیلی جارحیت و دہشت گردی۔ فلسطینیوں کی نسل کشی اور مسئلہ فلسطین سب سے بڑا مسئلہ ہے ، جماعت اسلامی نے فیصلہ کیا ہے کہ قومی اور عالمی سطح پر اسرائیل کے خلاف احتجاج کو مزید تیز کیا جائے گا۔ 4اکتوبر کو لاہور جبکہ 5اکتوبر کو کراچی میں عظیم الشان ‘‘غزہ ملین مارچ’’ منعقد کیے جائیں گے ، 7اکتوبر کو عالمی احتجاج کے دن ملک بھر میں سڑکوں پر نکل کر ایک گھنٹے تک اسرائیل کے خلاف احتجاج اور اہل غزہ سے اظہار یکجہتی کیا جائے گا، پاکستان کا موقف صرف اور صرف آزاد فلسطینی ریاست ہونا چاہئے ۔ ان دنوں اسٹیبلشمنٹ کی من پسند جماعتیں پیپلز پارٹی اور نواز لیگ نورا کشتی میں مصروف ہیں، ملک میں آئینی بحران پیدا کرنے والی یہی حکومتی پارٹیاں ہیں، اپنے سیاسی مفادات کی خاطر نورا کشتی کر کے عوام کو بے وقوف بنا رہی ہیں۔حافظ نعیم الرحمن نے مزید کہا کہ قائد اعظم نے واضح کہا تھا کہ اسرائیل کو کسی صورت تسلیم نہیں کیا جا سکتا، وزیر اعظم اور امریکی صدر کی ملاقات کے اعلامیہ میں فلسطینیوں کی نسل کشی بند کرنے کے الفاظ شامل نہیں، صرف جنگ بندی کا ذکر ہے ، گلوبل صمود فلوٹیلا کی مکمل حمایت اور دنیا بھر کے ان تمام انسانوں کو خراج تحسین پیش کرتے ہیں جو اسرائیل کے خلاف احتجاج کر رہے ہیں۔

کرک: کرک کے علاقے درشہ خیل میں سکیورٹی فورسز اور پولیس کے آپریشن کے دوران 17 خوارج مارے گئے جبکہ متعدد زخمی خوارج قریبی علاقوں میں چھپ گئے۔ڈی پی او نے بتایا کہ سرچ آپریشن کے دوران بھاری تعداد میں اسلحہ برآمد ہوا ہے، لوگ گھروں سے نہ نکلیں اور کسی کو اپنے گھر میں پناہ بھی نہ دیں، زخمی خوارج کی معلومات فوری طور پر پولیس کو دی جائیں۔کرک کے علاقے درشہ خیل اور قریبی دیہات میں کرفیو نافذ کر دیا گیا۔سکیورٹی ذرائع نے بتایا کہ کرک کے تھانہ شاہ سلیم کے علاقے درشہ خیل میں سکیورٹی فورسز اور پولیس نے فتنہ الخوارج کے خلاف انٹیلی جنس بیسڈ آپریشن کیا، یہ علاقہ لکی مروت اور کرک کی باؤنڈری پر واقع ہے۔ذرائع نے بتایا کہ خفیہ معلومات پر 22 خوارج پر مشتمل گروہ کو درشہ خیل میں باقاعدہ منصوبہ بندی کے تحت گھیرے میں لیا گیا، پھر انتہائی مہارت سے گھیرا تنگ کر کے نشانہ بنایا گیا، اس آپریشن میں 17 خوارج جہنم واصل ہوئے۔سکیورٹی ذرائع نے یہ بھی بتایا کہ سات سے دس خوارج کے شدید زخمی ہونے کی بھی اطلاع ہے۔وزیراعظم نے ضلع کرک میں 17 خوارج کو ہلاک کرنے پر سکیورٹی فورسز کو خراج تحسین پیش کیا اور زخمی اہلکاروں کی جلد صحت یابی کے لیے دعا کی۔وزیراعظم شہباز شریف نے کہا کہ سکیورٹی فورسز کی پیشہ ورانہ مہارت اور بروقت کارروائی کی بدولت خوارج کے مذموم عزائم خاک میں مل گئے، حکومت اور سکیورٹی فورسز دہشتگردی کے مکمل خاتمے کے لیے پر عزم ہیں، دہشتگردی کےعفریت کو جلد جڑ سے اکھاڑ دیں گے۔

اسلام آباد:فیڈرل بورڈ آف ریونیو (ایف بی آر) نے وزیراعظم کی ہدایت پر ٹیکس دہندگان کی سہولت کے لیے اہم اقدام کرتے ہوئے انکم ٹیکس ریٹرن فارم2025 سے اثاثوں کی مارکیٹ ویلیو کا کالم ہٹا دیا۔
ایف بی آر نے بتایا کہ وزیراعظم نے آئی آر آئی ایس ٹیکس ریٹرن میں نئے کالم کا جائزہ لینے کے لیے وزیرقانون اعظم نذیرتارڑ کی سربراہی میں کمیٹی تشکیل دی، جس میں وزیر پیٹرولیم، وزیر مملکت خزانہ، اٹارنی جنرل، سیکرٹری خزانہ اور چیئرمین ایف بی آر شامل ہیں۔کمیٹی ممبران نے بتایا کہ اجلاس میں اثاثوں کی مارکیٹ ویلیو کا تخمینہ لگانے والا کام ہٹانے کی سفارش کر دی گئی اور وزیراعظم نے ٹیکس ریٹرن فائلنگ آسان بنانے کے لیے کمیٹی کی سفارش کی منظوری دے دی ہے۔دوسری جانب ایف بی آر نے بتایا کہ ٹیکس دہندگان انکم ٹیکس گوشوارے جلد از جلد فائل کریں کیونکہ آخری تاریخ 30 ستمبر 2025 ہے۔

اسلام آباد:ڈی آئی جی اسلام آباد جواد طارق کی زیرصدارت کرائم کے حوالے سے اجلاس ہوا۔ اجلاس سے خطا ب میں انہوں نے کہا کہ فرائض کی ادائیگی میں کسی قسم کی غفلت یا لاپرواہی ہرگز برداشت نہیں کی جائے گی۔ شہریوں کے جان و مال کا تحفظ اولین ترجیح ہے۔ غیر رجسٹرڈ اور بغیر نمبر گاڑیوں اور موٹرسائیکلز پر زیرو ٹالرنس پالیسی ہے، سنگین جرائم میں ملوث ملزمان کی گرفتاری کو یقینی بنائیں، پٹرولنگ کو مزید موثر بنانے کی ہدایات جاری کیں، فرائض کی انجام دہی میں کسی قسم کی غفلت یا لاپرواہی ہرگز برداشت نہیں کی جائے گی۔ جرائم کے انسداد کیلئے تما م تر وسائل بروئے کار لاتے ہوئے قتل، اقدام قتل، ڈکیتی اور راہزنی کی وارداتوں میں ملوث ملزمان کی گرفتاری کو یقینی بنائیں۔

کراچی:ایسوسی ایشن آف بلڈرز اینڈ ڈیولپرز کے سرپرستِ اعلیٰ محسن شیخانی نے کہا ہے کہ حکومت کی جانب سے شروع کی گئی میرا گھر میرا آشیانہ اسکیم زمینی حقائق سے مطابقت نہ رکھنے کے باعث ناکامی سے دوچار ہونے کا خطرہ رکھتی ہے ۔کراچی میں زمینوں پر قبضے کا طریقہ بدل گیا ہے ،اب ریکارڈ میں جعلسازی کرکے سرکاری زمینیں فروخت کی جارہی ہیں۔دنیا نیوز کو انٹرویو دیتے ہوئے انکا کہنا تھا کہ کم آمدنی والے افراد کیلئے اسکیم میں رکھی گئی قرض کی حد غیر حقیقی ہے اور ان سے عام شہری کیلئے گھر کا حصول ممکن نہیں ۔ حکومت نے اسٹیٹ بینک کے ذریعے آسان گھر اسکیم کو متعارف تو کرادیا مگر اس کے توسط سے ملنے والا قرض صرف 20 سے 35 لاکھ روپے ہے جو کسی شہری کی مدد کرنے کیلئے ناکافی ہے ۔سرپرست اعلیٰ آباد نے بتایاکہ آج ایک گھر یا فلیٹ بنانے کی لاگت 6 ہزار روپے فی اسکوائر فٹ تک پہنچ گئی ہے جبکہ کچی آبادی میں بھی ایک کمرے کے گھر کی مالیت30لاکھ روپے سے زیادہ ہے ،سونے پر سہاگا شہری پہلے اپنی زمین خرید کر اس اسکیم کے ذریعے مکان کی تعمیر کیسے کرے گا یہ حکومت کیلئے سوالیہ نشان ہے ۔انہوں نے مطالبہ کیا کہ اسکیم میں قرض کی حد کو بڑھا کر کم از کم ایک کروڑ روپے کیا جائے ۔زمینوں پر قبضے اور جعلسازی کے معاملات پر انکشاف کرتے ہوئے کہا کہ کراچی میں زمینوں پر قبضے کا طریقہ بدل گیا ہے ،اب ریکارڈ میں جعلسازی کرکے سرکاری زمینیں فروخت کی جارہی ہیں۔انکے مطابق صوبائی حکومت زمینوں پر پابندی کے باوجود من پسند افراد کو کئی کئی ایکٹر زمینیں الاٹ کررہی ہے ، حال ہی میں دس ہزار ایکڑ زمین ایجوکیشن سٹی کیلئے الاٹ کی جارہی ہے ،اسی طرز پر صوبائی حکومت زمینوں کی الاٹمنٹ پر پابندی عائد کرکے خود ساختہ زمینیں الاٹ کرتی رہی تو شہر بھر میں رہائش کا نظام اور قانونی رٹ شدید متاثر ہوگی جبکہ دوسری جانب سرکاری ادارے ملی بھگت سے زمینوں کے ریکارڈ میں خرد برد کرکے کئی کئی ایکڑ زمین فروخت کررہے ہیں جو لینڈ گریبنگ کا منفرد انداز ہے ۔محسن شیخانی نے بتایا کہ زمینوں پر قبضے اور جعلسازی کا سلسلہ جاری رہنے سے شہریوں کا اعتماد مزید مجروح ہورہا ہے ، اسی تناظر میں اوورسیز پاکستانی بھی تعمیراتی شعبے میں سرمایہ کاری سے منہ موڑ چکے ہیں اور بلڈرز بھی اپنا سرمایہ سمیٹ رہے ہیں ۔

جھنگ:وزیراعلیٰ پنجاب مریم نواز شریف کی ہدایت پر ضلع بھر میں انسدادِ ڈینگی کے حوالے سے ٹھوس اور عملی اقدامات جاری ہیں۔اس سلسلے میں ڈپٹی کمشنر علی اکبر بھنڈر نے محکمہ صحت کے افسروں کے ساتھ میٹنگ کی۔ جس میں انسداد ڈینگی مہم پر عملدرآمد، محکمانہ کارکردگی اور سروسز پر تفصیلی بریفنگ دی گئی۔ ڈپٹی کمشنر نے ان ڈور اور آؤٹ ڈور سرویلنس کو مسلسل جاری رکھنے کی ہدایات دیں اور کہا کہ ڈینگی کی صورتحال کو براہِ راست مانیٹر کیا جا رہا ہے ۔انہوں نے فیلڈ سٹاف کی سو فیصد حاضری یقینی بنانے اور مختلف علاقوں میں اینٹی ڈینگی فوگنگ سپرے کے فوری اقدامات کرنے کی ہدایت کی۔ اس کے ساتھ ان ڈور اور آؤٹ ڈور سرویلنس مزید تیز کرنے پر بھی زور دیا۔ڈپٹی کمشنر نے کہا کہ وزیراعلیٰ پنجاب کی ہدایات کی روشنی میں ڈینگی مچھر کی افزائش روکنے کے لیے ہنگامی بنیادوں پر اقدامات کیے جا رہے ہیں۔ ہائی رسک ایریاز میں انسدادِ ڈینگی سرگرمیوں کی سخت نگرانی کی جائے ، جبکہ نرسریوں، کباڑ خانوں اور قبرستانوں سمیت تمام حساس مقامات پر خصوصی سرویلنس کرائی جائے ۔

اسلام آباد :آئی جی اسلام آباد کا فورس کے انتظامی امور کے حوالے سے اجلاس میں پولیس فورس کی استعداد کار میں اضافہ۔ دستیاب وسائل کے موثر استعمال، لاجسٹک سپورٹ کے بہتر انتظامات اور جاری خصوصی منصوبہ جات کی پیش رفت کا تفصیلی جائزہ لیا۔ افسران کو درکار سہولیات کی بروقت فراہمی کیلئے خصوصی احکامات بھی جاری کئے۔ آئی جی نے کہا کہ افسران جدید ٹیکنالوجی اور اصلاحات کے ذریعے عوامی خدمت کے معیار کو مزید بلند کیا جائے، اس موقع پر ڈائریکٹر اسپیشل انیشی ایٹو نے مختلف ترقیاتی و فلاحی منصوبوں پر آئی جی اسلام آباد کوبریفنگ دی۔