Author: Gulraiz Ruhani

اسلام آباد: وفاقی وزیر خزانہ اسحاق ڈار نے معیشت پر چیئرمین پی ٹی آئی عمران خان کو لائیو مناظرے کا چیلنج کردیا۔

ویڈیو خطاب کے دوران انہوں نے کہا کہ عمران خان اپنے تمام افلاطون اکٹھے کرکے مذاکرہ کرلیں، عمران خان نے آئی ایم ایف سے معاہدے کیے اور حکومت جاتی دیکھ کر خود ہی توڑ دیے۔

انہوں نے کہا عمران خان کی تمام باتیں جھوٹ پر مبنی ہیں، معیشت کی بدحالی کے ذمہ ہم نہیں عمران خان ہے، عمران خان نے ملک کو تباہی کے دہانے پر کھڑا کیا، نیازی کی تباہ کی ہوئی معیشت کو ہم ٹھیک کررہے ہیں۔
’عمران خان نے معیشت کے غلط اعداد و شمار جاری کیے‘

اسحاق ڈار نے کہا کہ عمران خان نے معیشت کے غلط اعداد و شمار جاری کیے، جی ڈی پی پر جھوٹ بولا، عمران خان کی ترقی کا ہدف یہ ہے کہ اگر میری حکومت نہیں تو ریاست بھی نہ رہے۔

وزیر خزانہ نے عمران خان کو مخاطب کرکے کہا کہ حکومت آپ کی تباہی ٹھیک کررہی ہے، آپ نے ملک کو یہاں لاکر کھڑا کیا گیا، آپ نے مان لیا تو کون چوری شدہ الیکشن سے آپ کو لایا، اور آپ نے خود ہی اُس کا نام بتادیا۔

’عمران خان سیاسی دشمنی نہ کرتے تو پاکستان آج اس ڈگر پر نہ ہوتا‘

ان کا کہنا تھا کہ اپ اگر معیشت پر کام کرتے اور سیاسی دشمنی نہ کرتے تو پاکستان آج اُس ڈگر پر نہ ہوتا، ہمارے لیے ریاست یا سیاست کا آپشن تھا، لوگ نوازشریف کے پاس لائنیں لگا کر کھڑے تھے جب عدم اعتماد ہورہا تھا، ریاست کو بچانے کا فیصلہ کیا اور سیاست کو قربان کرنے کا فیصلہ کیا۔

اسلام آباد: تحریک انصاف کے رہنما اور سابق وزیر خزانہ شوکت ترین نے ڈالر کے مقابلے میں روپے کی قدر میں نمایاں کمی پر حکومت پر کڑی تنقید کرتے ہوئے کہا ہے کہ روپیہ 2 دن میں 34 روپے گرگیا ہے، آئی ایم ایف اس لیے ان کے پاس نہیں آ رہا کہ ان کا بجٹ خسارہ 3 کھرب سے زائد کا ہے اور اب نئے ٹیکس کے ساتھ پٹرول کی قیمت بڑھادی جائے گی اور بجلی کا یونٹ اب یہ 50 روپے تک لے کر جائیں گے۔

پارٹی رہنماؤں کے ساتھ پریس کانفرنس کے دوران انہوں نے کہا کہ یہ وہ وزیر ہے جو کہتا تھا کہ جہاز پر چڑھتے ہیں ڈالر آئیں گے اور 1200 ارب روپے قرضہ کم ہوا گا، جب ہم چھوڑ کر گئے تھے تو ڈالر 182 روپے تھا۔

شوکت ترین نے کہا کہ انہوں نے 2 دونوں میں 4 کھرب سے زائد کا قرضہ بڑھا دیا ہے، ملکی ذخائر اس وقت 4 ارب ڈالر سے کم ہو گئے ہیں، اس وقت ایف بی ار کا ریونیوز اپنے ٹارگیٹ سے 400 ارب روپے کم ہے۔

انہوں نے کہا کہ اگر آئی ایم ایف سے معاہدہ نہیں کیا تو باقی دوست ممالک بھی پیسے نہیں دیں گے، یہ تو آئی ایم ایف کے سامنے بالکل لیٹ گئے ہیں، ان کا سرکولر ڈیٹ اس وقت تین اشارہ دو ٹریلین پر چلا گیا ہے۔

سابق وزیر خزانہ نے کہا کہ اس وقت یہ ہدف سے 800 ارب روپے شارٹ ہیں، سی پی آئی تیس سے پنتیس فیصد پر جاتا دیکھیں گے، مہنگائی کا طوفان بدتمیزی آنے والا ہے اور بے روزگاری بڑھے گی۔

شوکت ترین نے کہا کہ کاروبار بند ہو رہے چھ فیصد جو معیشت بڑھی رہی تھی لیکن ہمارا تخمینہ ہے کہ یہ منفی ہو گی۔

لاہور: پاکستان سپر لیگ (پی ایس ایل) اور مردم شماری کیلئے سیکیورٹی ڈیوٹیاں لگانا پنجاب پولیس کیلئے مشکل ہوگا، پولیس حکام نے وفاق سے 15 ہزار کی نفری طلب کرلی۔

پی ایس ایل اور مردم شماری کے دوران سیکیورٹی کیلئے پنجاب پولیس کے پاس نفری کم پڑگئی، آئی جی پنجاب نے یکم مارچ سے لاہور سمیت پنجاب بھر میں شروع ہونے والی مردم شماری کےلئے 15 ہزار کی نفری وفاقی حکومت سے مانگ لی۔

پولیس حکام کا کہنا ہے کہ مردم شماری کےلئے لاہور میں 45 سو ٹیموں کےلئے 5 ہزار سے زائد ملازمین درکار ہوں گے جب کہ صوبہ بھر میں ساڑھے 47 ہزار سے زائد ٹیموں کیلئے 50 ہزار نفری درکار ہوگی۔

پولیس حکام کا کہنا ہے کہ پولیس کے ریزویر میں صرف 14 ہزار سے زائد نفری موجود ہے۔

پولیس حکام کے مطابق مردم شماری کرنے والی ٹیموں کو نفری کس طرح فراہم کی جائے گی، پلان ترتیب دے دیا گیا، جس کے تحت تمام اضلاع میں تھانوں کی نفری مردم شماری کی ٹیموں کے ساتھ ڈیوٹی سرانجام دیں گی اور ہر ٹیم کے ساتھ 1 اہلکار جب کہ 10 ٹیموں پر ایک سپروائزری افسر تعینات کیا جائے گا۔

آئی جی پنجاب پولیس کا کہنا ہے کہ پی ایس ایل میچز کے دوران متعلقہ اضلاع میں وفاق سے مانگی گئی نفری مردم شماری کےلئے تعینات کی جائے گی۔

واضح رہے کہ مردم شماری کے لئے محکمہ تعلیم نے 50 ہزار کی نفری مانگی تھی۔

اسلام آباد: پاکستان مسلم لیگ (ق) کے سینئر رہنما اور وفاقی وزیر چوہدری سالک حسین نے چدہدری شجاعت کو پارٹی صدارت سے ہٹانے والوں کو سیاسی غدار قرار دے دیا۔

پاکستان مسلم لیگ کے سینئر رہنما اور وفاقی وزیر چوہدری سالک حسین نے صحافیوں سے گفتگو کرتے ہوئے کہا کہ نہایت افسوس اور دکھ کا مقام ہے کہ چوہدری شجاعت حسین جنہوں نے چودھری ظہور الٰہی شہید کی سیاسی میراث کو زندہ رکھا، آگے بڑھایا اور خاندان کو اکٹھے رکھنے کیلئے قربانیاں دیں اُنہیں انکے اپنے چھوٹے بھائی نے اپنی خود غرض سیاست کا نشانہ بناتے ہوئے غیر آئینی طور پر پارٹی کی صدارت سے ہٹا دیا۔

انہوں نے کہا کہ پرویز الہیٰ نے چوہدری شجاعت کو ہٹا کر خود کو کٹھ پتلی صدر بنانے کی ناکام کوشش کی ہے، حلقہ کے عوام جانتی ہے کہ چوہدری ظہور الٰہی شہید اور چوہدری شجاعت حسین نے ہمیشہ اپنی دی ہوئی زبان کا مان رکھا ہے۔
چوہدری سالک نے کہا کہ کچھ لوگوں نے اپنی ذاتی خواہشات ،انا ،لالچ اور عہدوں کی حوس میں خاندان کی ساکھ، روایت اور شہید ظہور الٰہی کے سیاسی نظریے سے غداری کی ہے.

لاہور: پاکستان تحریک انصاف کے چیئرمین عمران خان نے دعویٰ کیا ہے کہ مجھے قتل کرنے کے لیے اب پلان سی بنایا گیا ہے جس کیلیے زرداری نے دہشت گرد تنظیموں کو پیسے دیے ہیں۔

زمان پارک لاہور سے بذریعہ ویڈیو لنک پریس کانفرنس کرتے ہوئے عمران خان نے کہا کہ اب پلان سی بنا ہے جس کے پیچھے آصف زرداری ہے، آصف زرداری نے دہشت گرد تنظیموں کو مجھے قتل کرانے کیلیے پیسے دیے اور سہولت کاری کیلیے پیسہ لگایا، اس سازش میں سہولت کار طاقت ور ایجنسیوں کے لوگ شامل ہیں۔

انہوں نے کہا کہ اب یہ میرے خلاف اگلی واردات کرنے والے ہیں جس کی آج ہی قوم کو خبر دے رہا ہوں، زندگی موت اللہ کے ہاتھ میں ہے اور مجھے کسی کا خوف نہیں، میں ہر صورت انتخابی مہم پر نکلوں گا، مجھے کچھ ہوا تو قوم کو معلوم ہونا چاہیے یہ سب کرنے والے کون تھے؟ میں نے ان کے نام اسلیے لکھے ہیں تاکہ قوم انہیں کبھی معاف نہ کرے۔

انہوں نے کہا کہ اس سے پہلے میرے قتل کا بند کمرے میں فیصلہ کرنے والے چار لوگ تھے جنہوں نے مجھے راستے سے ہٹانے کی سازش کی، مجھے قتل کی سازش کا معلوم ہوا تو ویڈیو بنا کر بیرون ملک بھیج دی تھی اور عوامی جلسے میں اعلان کردیا تھا کہ اگر کچھ ہوا تو ویڈیو ریلیز ہوجائے گی، اس ویڈیو میں سازش کرنے والے چار لوگوں کے نام ہیں جن میں زرداری بھی شامل ہے۔

عمران خان نے دعویٰ کیا کہ انہوں نے پلان بی کے تحت مجھے مذہبی انتہا پسندی کے نام پر قتل کا منصوبہ بنایا، اس پلان کا مجھے علم ہوا تو جلسوں میں ساری سازش کو بے نقاب کیا، مجھے قتل کرنے کے پلان میں یہ تقریباً کامیاب ہوگئے تھے مگر اب یہ پلان سی کی طرف جارہے ہیں جس کے لیے زرداری نے دہشت گرد تنظیموں کو ٹاسک دیا اور سہولت کاری کےلیے پیسہ بھی لگایا ہے۔

اُن کا کہنا تھا کہ ’زرداری نے یہ پیسہ سندھ سے لوٹ کر حاصل کیا جسے وہ الیکشن پر لگا کر اراکین اسمبلی کو خریدتا ہے‘۔

چیئرمین پی ٹی آئی نے کہا کہ پارلیمنٹ جمہوریت اور اداروں کو تباہ کرنے کا مقصد اپنی چوری چھپانا ہے، یہ سب کچھ مجھے راستے سے ہٹانے کیلیے کیا جارہا ہے، اس سے ملک ترقی نہیں بلکہ مزید تباہی کیطرف جائے گا، ان کو خوف ہے کہ کہیں سازش کرنے والوں کا پتہ نہ لگ جائے یہ مزید غلطیاں کررہے ہیں۔

انہوں نے کہا کہ قوم اور عدلیہ سُن لے یہ پاکستان کیلیے یہ فیصلہ کن وقت ہے اور یہ وقت اُس وقت آتا ہے جب ہر کوئی بے نقاب ہوجاتا ہے، ان 9 ماہ میں بہت سارے لوگ بے نقاب ہوگئے، ڈار اور شہباز کیا تھے قوم کو معلوم ہوگیا، اسحاق ڈار پاکستانی معیشت کو وہاں لے گیا جہاں قومی سلامتی کو خطرہ ہے۔

عمران خان نے مزید کہا کہ ماہرین پاکستانی معیشت کی خوفناک تصویر پیش کررہے ہیں، پاکستان میں وائٹ کالر کرائم کو لائسنس دے دیا گیا ہے۔