Category: اہم خبریں

اسلام آباد : آئی جی کی ہدایت پر اسلام آباد پولیس شہر بھر کے تمام تفریحی مقامات اور پارکس میں شہریوں کی حفاظت کیلئے متحرک، مارگلہ ہلز، فیصل مسجد، دامن کوہ، فاطمہ جناح پارک، پاکستان مونومنٹ ،اہم تجارتی مراکزسمیت دیگر مقامات پر جامع سکیورٹی انتظامات کیے گئے ہیں، موثر پٹرولنگ کیلئے موبائل پیٹرولنگ یونٹس کی تعیناتی سمیت تفریحی مقامات پر ڈولفن سکواڈاور خواتین پولیس اہلکار بھی تعینات کی گئی ہیں، ٹریفک کی روانی کو برقراررکھنے کیلئے تمام تفریحی مقامات پر خصوصی گاڑیوں کی پارکنگ کیلئے جگہ مختص کی گئی ہے، کسی بھی ہنگامی صورتحال میں فوری رسپانس کیلئے پولیس کے تازہ دم دستے بھی تعینات ہیں، شہریوں کی رہنمائی کیلئے خصوصی پوائنٹس بھی قائم کیے گئے ہیں، اسی طرح شہر کے اہم داخلی و خارجی راستوں کی نگرانی سمیت مشکوک عناصر کی سرویلنس کا عمل سیف سٹی کیمروں سے ہمہ وقت جاری ہے، آئی جی اسلام آباد نے کہا کہ شہریوں کی جان و مال کا تحفظ ہماری اولین ترجیح ہے، ہم چاہتے ہیں کہ شہری بلا خوف و خطر سیاحت اور تفریح سے لطف اندوز ہوں۔

اسلام آباد:چیئرمین فیڈرل بورڈ آف ریونیو (ایف بی آر)راشد محمود لنگڑیال نے کہا ہے وزیراعظم شہباز شریف نے تنخواہ دار طبقے پر ٹیکس کا ریٹ کم کرنے کی ہدایت جاری کر دی، جس کے بعد آئندہ مالی سال کے بجٹ میں تنخواہ دار طبقے کو ٹیکس رعایت کیلئے باقاعدہ کام کا آغاز کر دیا گیا ہے ۔حکومت نے بڑی کمپنیوں پر سپر ٹیکس کے مرحلہ وار خاتمے کا بھی فیصلہ کیا ہے ۔ٹیکسوں میں کمی آئی ایم ایف کی اجازت سے مشروط ہے ۔ چیئرمین ایف بی آر نے پاکستان بزنس کونسل کے سیمینار سے اظہار خیال کرتے ہوئے کہا آئی ایم ایف سے اجازت لے کر تنخواہ دار طبقہ پر انکم ٹیکس اور بڑی کمپنیوں پر سپر ٹیکس مرحلہ وار کم کیا جائے گا، وزیراعظم شہباز شریف نے ٹیکس ریلیف کی اجازت کیلئے آئی ایم ایف سے مشاورت اور ورکنگ شروع کرنے کی ہدایت کر دی، آئندہ بجٹ میں تنخواہ دار طبقے پر ٹیکس کا ریٹ کم کرنے کیلئے کام شروع کر رہے ہیں۔ وزیراعظم نے بڑی کمپنیوں پر سپرٹیکس کم کرنے کی بھی ہدایت کی ہے جس پر کام شروع کردیا گیا ہے ۔

اسلام آباد: سپریم کورٹ نے پولیس کی حراست میں موجود ملزمان پر تشدد اور ماورائے عدالت قتل کے واقعات کے خلاف فیصلہ جاری کردیا کہ تشدد، غیر انسانی و توہین آمیز سلوک اور ذاتی وقار کی پامالی کسی صورت جائز نہیں۔جسٹس جمال خان مندوخیل نے پولیس کی حراست میں موجود ملزمان پر تشدد اور ماورائے عدالت قتل کے خلاف 7 صفحات پر مشتمل فیصلہ تحریر کیا، جس میں قرار دیا گیا ہے کہ بعض اوقات پولیس کی جانب سے تشدد ماورائے عدالت قتل کا باعث بنتا ہے، کیوں کہ وہ استثنیٰ کے مفروضے کے تحت ملزم کو انصاف کے کٹہرے میں لانے کے لیے یہ طریقہ اختیار کرتے ہیں۔سپریم کورٹ کے فیصلے میں کہا گیا ہے کہ اس عمل کو روکنے کے لیے پولیس فورس پر مؤثر اور خصوصی نگرانی ناگزیر ہے، زندگی کے حق کو سب سے اعلیٰ انسانی حق قرار دیا گیا ہے، اور آئین ذمہ داری عائد کرتا ہے کہ ریاست ہر شہری کے حقِ زندگی کا تحفظ کرے، حراستی تشدد اور قتل کو روکے۔فیصلے میں قرار دیا گیا ہے کہ غیر قانونی حراست، گرفتاری، تشدد، ماورائے عدالت قتل کیخلاف یہ آئینی ضمانتیں قانونی اصولوں کی اساس ہیں، غیر قانونی حراست اور تشدد کسی بھی صورت میں پسندیدہ ہیں نہ ہی قابلِ جواز ہیں۔جسٹس جمال خان مندوخیل کے تحریر کردہ فیصلے میں کہا گیا ہے کہ بنیادی حقوق کا اصول ایک محفوظ اور منصفانہ معاشرے کو یقینی بنانا ہے، پولیس فورس آئین میں درج بنیادی حقوق کے فریم ورک کو برقرار رکھنے کی پابند ہے، پولیس ہر شخص کی جان، آزادی اور وقار کے تحفظ کی ذمہ دار ہے۔سپریم کورٹ کے فیصلے کے مطابق جب کوئی سرکاری اہلکار قانون پر عمل کیے بغیر کسی شخص کو نقصان پہنچاتا ہے، تو اس سے شفاف ٹرائل کے حق کی بھی خلاف ورزی ہوتی ہے، پولیس کو قانون کی خلاف ورزی کرنے والے شخص کو گرفتار کرنے کا حق حاصل ہے، لیکن گرفتاری آئین و قانون کے مطابق ہونی چاہیے۔فیصلے میں مزید کہا گیا ہے کہ آئینی و قانونی تقاضوں کے برخلاف گرفتاری، غیر انسانی رویہ اپنانا، ظلم یا تشدد کرنا نہ صرف مجرمانہ فعل ہے، بلکہ یہ فعل مس کنڈکٹ میں بھی شمار ہوتا ہے۔سپریم کورٹ نے کہا کہ زریاب خان کو غیر قانونی طور پر حراست میں رکھنے اور تشدد کے ذریعے درخواست گزاران نے اپنے فرض کی خلاف ورزی کی، درخواست گزاران کا یہ عمل اختیارات کے غلط استعمال کے مترادف ہے، پولیس اہلکاروں کو نوکری سے نکالنے کی محکمانہ کارروائیاں ریاستی اداروں پر عوام کے اعتماد کو قائم رکھنے کیلئے ضروری ہیں۔عدالت نے پولیس اہلکاروں کی سزائیں برقرار رکھتے ہوئے اپیلیں خارج کردیں۔سپریم کورٹ نے کہا کہ آئین کا آرٹیکل 10 کسی شخص کی گرفتاری اور حراست کے حوالے سے حفاظتی ضمانتیں فراہم کرتا ہے، کوئی بھی گرفتار شخص گرفتاری کی وجوہات بتائے بغیر حراست میں نہیں رکھا جا سکتا، گرفتار شخص کو 24 گھنٹوں کے اندر مجسٹریٹ کے سامنے پیش کیا جانا ضروری ہے۔فیصلے میں کہا گیا ہے کہ آئین کے آرٹیکل 14 کے مطابق انسان کی عزتِ نفس اور گھر کی پرائیویسی کی پامالی نہیں ہوسکتی۔عدالت عظمیٰ نے یہ فیصلہ ڈیرہ غازی خان سے تعلق رکھنے والے 3 پولیس کانسٹیبلز کی اپیلوں پر جاری کیا، تینوں افراد پر زریاب خان نامی شخص کو غیر قانونی حراست میں رکھنے، اسے قتل کرنے کا الزام تھا۔نوکری سے برخاست کرنے کے محکمانہ کارروائی کے فیصلے کیخلاف پنجاب سروس ٹربیونل سے درخواست گزاروں نے رجوع کیا تھا، پنجاب سروس ٹربیونل نے انکی نوکری سے برخاست کرنے کا فیصلہ برقرار رکھا تھا، نوکری سے برخاست کرنے کے فیصلے کیخلاف اپیل سپریم کورٹ میں دائر کی گئی تھی۔جسٹس امین الدین خان کی سربراہی میں جسٹس جمال خان مندوخیل اور جسٹس نعیم اختر افغان پر مشتمل سپریم کورٹ کے 3 رکنی بنچ نے کیس پر سماعت کی۔

اسلام آباد : چیئرمین سی ڈی اے و چیف کمشنر محمد علی رندھاوا کی زیر صدارت اسلام آباد میں کیش لیس اکانومی کو مزید فروغ دینے کے حوالے سے اجلاس ہوا۔ چیئرمین سی ڈی اے نے کہا کہ اسلام آباد کو کیش لیس اکانومی کے حوالے سے ماڈل شہر بنایا جارہا ہے ۔ کمرشل بینکس مرچنٹس اور شہریوں کو مکمل آگاہی فراہم کریں۔ انہوں نے کہا کہ تمام سٹیک ہولڈرز د کانداروں اور تاجروں کے ساتھ صارفین کو راست کیو آر کوڈ کے ذریعے ادائیگیوں کی طرف راغب کرنے کیلئے زیادہ سے زیادہ رعایت اور مراعات دیں۔انہوں نے کہا کہ وفاقی دارالحکومت کو ڈیجیٹل شہر بنانے کیلئے ایم ٹیگ اور ڈیجیٹل پارکنگ جیسے منصوبے بھی متعارف کروائے جا رہے ہیں۔

اسلام آباد:پاکستان کے نئے اور تیزی سے ابھرتے ہوئے ای کامرس پلیٹ فارم گولڈ باکس نے مشہور ٹی وی اور فلم اداکار فیروز خان کے ساتھ ایک اہم شراکت داری کا اعلان کیا ہے اور اس سلسلے میں سینٹورس مال میں ایک دستخطی تقریب کا اہتمام کیا گیا۔ یہ شراکت داری کمپنی کے اس وژن کا اہم قدم ہے کہ پاکستان بھر میں صارفین کے لیے ایک معتبر، آسان اور جدید آن لائن شاپنگ تجربہ فراہم کیا جائے، یہ بات گولڈ باکس کے چیف ایگزیکٹو آفیسر حسنین خان نے کہی، جنہوں نے کمپنی کی جانب سے اس معاہدے پر دستخط کیے۔اپنے مختصر خطاب میں، حسنین خان نے اس شراکت داری کی اہمیت پر روشنی ڈالی اور کہا کہ کیسے فیروز خان کا تعلق برانڈ کے معیار، اعتماد اور اصلیت کے اصولوں کے ساتھ ہم آہنگ ہے۔انہوں نے کہا، “فیروز خان کی ساکھ، مقبولیت اور شائقین کے ساتھ مضبوط تعلق انہیں گولڈ باکس کے لیے بہترین سفیر بناتا ہے۔ ہمارا مقصد صارفین کے اعتماد کو مزید بڑھانا اور پاکستان میں آن لائن شاپنگ کے نئے معیار قائم کرنا ہے۔”حسنین خان نے مزید کہا، “یہ معاہدہ محض شراکت داری نہیں بلکہ ایک مشترکہ وژن کی نمائندگی کرتا ہے۔ یہ گولڈ باکس کی ملک گیر برانڈنگ کی سرگرمیوں کا آغاز ہے۔”انہوں نے بتایا کہ گولڈ باکس کا مقصد بہترین معیار کی مصنوعات فراہم کرنا ہے جو جدت اور اعتماد پر مبنی ہوں۔ سالوں کے دوران، ہم نے صارفین کے تجربے کو بہتر بنانے، جدید پیکجنگ حل متعارف کرانے، اور پاکستان بھر میں صارفین تک پہنچنے کے لیے اپنے تقسیم نیٹ ورک کو وسیع کرنے کے متعدد اقدامات کیے ہیں۔حسنین خان نے کہا، “ہمیشہ ہماری کوشش رہی ہے کہ معیار اور جدت کو یکجا کیا جائے اور ایک ایسا برانڈ بنایا جائے جو ہر طبقے کے لوگوں کے ساتھ جڑ سکے۔”گولڈ باکس آن لائن شاپنگ کے تجربے کو نئے انداز سے پیش کرنے کے لیے کام کر رہا ہے، جس میں ہموار انٹرفیس، منتخب مصنوعات کی رینج اور صارف مرکزیت پر مبنی سروس ماڈل شامل ہیں، جو نہ صرف مؤثر بلکہ خوشگوار شاپنگ کا تجربہ فراہم کریں گے۔انہوں نے گولڈ باکس ایپ پر بھی روشنی ڈالی اور کہا کہ یہ وہ پاکستانی ای کامرس پلیٹ فارم ہے، جو جدت اور سہولت کے ذریعے شاپنگ کو آسان بناتا ہے۔وسیع مصنوعات کی رینج اور ہموار صارف تجربے کے ساتھ، گولڈ باکس صارفین کو قابل اعتماد خدمات مسابقتی قیمتوں پر فراہم کرنے کے لیے پرعزم ہے۔انہوں نے گولڈ باکس ٹیم کی محنت کو سراہا اور تقریب میں شرکت کرنے والے معزز مہمانوں کا شکریہ ادا کیا۔تقریب کے دوران، فیروز خان نے کہا، “میں گولڈ باکس فیملی کا حصہ بن کر بے حد پرجوش ہوں۔ یہ ایک ایسا پلیٹ فارم ہے جو جدت کی نمائندگی کرتا ہے اور سہولت کو براہ راست لوگوں کے گھروں تک پہنچاتا ہے۔ گولڈ باکس کے پاس ای کامرس کے منظرنامے کو تبدیل کرنے کی صلاحیت ہے، اور مجھے اس مشن کی حمایت پر فخر ہے۔”اس شراکت داری کے ابتدائی مرحلے کے طور پر، گولڈ باکس سینٹورس مال میں صارفین ایک اثر انگیز کیمپین شروع کرے گا، جس میں فیروز خان کی بڑی تصویری پوسٹرز مختلف جگہوں پر لگائے جائیں گے تاکہ زیادہ سے زیادہ نمائش اور برانڈ انگیجمنٹ حاصل کی جا سکے۔ یہ ڈسپلے خریداروں کی توجہ حاصل کرنے، برانڈ کی پہچان مضبوط کرنے اور اس شاندار نئی شراکت داری کے آغاز کو اجاگر کرنے کے لیے ڈیزائن کیا گیا ہے۔اس موقع پر انفلوئنسرز، کاروباری شراکت دار اور پرجوش مداح بھی موجود تھے جو گولڈ باکس کے لیے اس اہم سنگ میل کو دیکھنے کے لیے جمع ہوئے۔سائننگ تقریب کے بعد ایپ کی خصوصیات کا مختصر مظاہرہ کیا گیا، جس میں خصوصی پروڈکٹ کیٹگریز، محفوظ ادائیگیاں، تیز ترسیل اور خصوصی آفرز شامل تھیں۔