امریکہ کو ایران کے جوہری ہتھیاروں کے خطرے کا خدشہ: جیک سلیوان

واشنگٹن میں میڈیا سے گفتگو کرتے ہوئے امریکی قومی سلامتی کے مشیر جیک سلیوان نے کہا کہ بائیڈن انتظامیہ کو خدشہ ہے کہ ایران جوہری ہتھیار تیار کر سکتا ہے۔ انہوں نے مزید کہا کہ ایران کا دعویٰ ہے کہ اس کا جوہری پروگرام پُرامن ہے، تاہم اس نے یورینیئم کی افزودگی بڑھا دی ہے، جس کے باعث جوہری ہتھیار بنانے کے خطرات میں اضافہ ہوا ہے۔

جیک سلیوان نے کہا کہ ایران کے جوہری ہتھیار بنانے کے وعدے سے پیچھے ہٹنے کا امکان ہے، اور اسرائیل کی جانب سے ایرانی فوجی تنصیبات کو نشانہ بنانے سے ایران کی جوہری صلاحیت پر اثر پڑا ہے۔ انہوں نے اس بات پر بھی زور دیا کہ ایران کی کمزور پوزیشن ڈونلڈ ٹرمپ کو تہران سے سفارتکاری میں معاون ثابت کرے گی۔ سلیوان نے یہ بھی کہا کہ شامی صدر بشار الاسد کے زوال سے ایران کے علاقائی اثر و رسوخ میں کمی آئی ہے۔