Category: اہم خبریں

نوشہرہ ورکاں:ڈپٹی کمشنر گوجرانوالہ نوید احمد نے اسسٹنٹ کمشنر جواد حسین پیرزادہ کے ہمراہ اچانک پنجاب کالج نوشہرہ ورکاں کیمپس کا دورہ کیا۔ ڈائریکٹر چودھری عظمت علی ملہی اور پرنسپل علی وسیم طور نے مہمانوں کا استقبال کیا اور انہیں ادارے کے مختلف شعبہ جات کا معائنہ کرایا۔ ڈپٹی کمشنر نے کلاس رومز، سائنس و کمپیوٹر لیبارٹریز، کانفرنس ہال، گراؤنڈز اور دیگر تعلیمی سہولیات کا جائزہ لیا انہوں نے کالج کی لائبریری کی خصوصی تعریف کی جہاں مطالعہ کیلئے پر سکون ماحول اور کتب کا وافر ذخیرہ موجود تھا۔ اس موقع پر انہوں نے کہا اعلیٰ معیار کے ایسے ادارے کسی بھی علاقے کی ترقی اور نوجوان نسل کے روشن مستقبل کی ضمانت ہوتے ہیں یہاں کے طلبہ کو بہترین تعلیمی ماحول میسر ہے جو انکی صلاحیتوں کو نکھارنے میں اہم کردار ادا کرے گا۔

کراچی :سندھ ہائیکورٹ میں کراچی بلڈنگ اینڈ ٹاؤن پلاننگ ریگولیشن میں کی گئی ترمیم کے خلاف درخواست کی سماعت ہوئی۔ عدالت نے درخواست گزار کی فوری سماعت کی استدعا منظور کرتے ہوئے سیکریٹری بلدیات، ڈی جی ایس بی سی اے ، ماسٹر پلان ڈیپارٹمنٹ اور دیگر متعلقہ حکام کو نوٹس جاری کردیے۔ اور فریقین سے 13 اکتوبر تک جواب طلب کرلیا۔ درخواست گزار وکیل طارق منصور ایڈووکیٹ نے مؤقف اختیار کیا کہ کے بی ٹی آر میں کی گئی ترمیم سپریم کورٹ کے وضع کردہ اصولوں کے خلاف ہے ۔ انہوں نے کہا کہ ایس بی سی اے ، ماسٹر پلان اور دیگر قوانین کی خلاف ورزی کرتے ہوئے ترمیم کی گئی جس سے قانونی پیچیدگیاں پیدا ہوگئیں۔ وکیل درخواست گزار نے مزید کہا کہ ایس بی سی اے نے ترمیم کو واپس لینے کے بجائے منسوخ کیا اور منسوخی سے قبل اس سے فائدہ اٹھانے والوں کو قانونی تحفظ فراہم کیا گیا جو شفافیت اور قانون کے اصولوں کے منافی ہے ۔ عدالت نے فریقین کو نوٹس جاری کرتے ہوئے آئندہ سماعت تک تفصیلی جواب داخل کرنے کی ہدایت کی۔دریں اثنا سندھ ہائی کورٹ میں معذور کوٹے پر سیکنڈری اسکول ٹیچر کی بھرتی نہ کرنے کے خلاف درخواست کی سماعت ہوئی۔سرکاری وکیل کی جانب سے جواب جمع نہ کرانے پر عدالت نے سخت برہمی کا اظہار کیا۔جسٹس فیصل کمال عالم نے واضح کیا کہ اگر آئندہ سماعت پر جواب داخل نہ کیا گیا تو چیئرمین سندھ پبلک سروس کمیشن کو ذاتی حیثیت میں پیش ہونا ہوگا۔

راولپنڈی : وزیر زراعت و لائیو سٹاک پنجاب سید عاشق حسین کرمانی کی زیر صدارت اعلیٰ سطحی اجلاس کا انعقاد ہوا۔اجلاس میں صوبائی وزیر زراعت نے وزیراعلیٰ پنجاب کے زرعی اقدامات سے متعلق اہم منصوبوں اور سیلاب کی ریلیف سرگرمیوں بارے تفصیلی جائزہ لیا۔ اجلاس میں پارلیمانی سیکرٹری برائے زراعت اسامہ خان لغاری، سیکرٹری زراعت پنجاب افتخار علی سہو، سپشل سیکرٹری زراعت آغا نبیل اختر، ایڈیشنل سیکرٹری زراعت پلاننگ عامر شہزاد کنگ، ڈائریکٹر جنرلز زراعت نوید عصمت کاہلوں، چوہدری عبدالحمید، رانا تجمل، انجنئیر ساجد نصیر و دیگر افسران نے شرکت کی۔ اجلاس سے خطاب کرتے ہوئے وزیر زراعت نے کہا کہ وزیر اعلیٰ پنجاب کسان کارڈ فیز IIکے تحت ساڑھے 7لاکھ کسان کارڈ جاری کیے گئے ہیں اور کسان کارڈز کے ذریعے 96ارب روپے کا بلا سود قرض فراہم کیا جا رہا ہے۔ 75سے 125 ہارس پاور کے لوکل و درآمد شدہ ٹریکٹرز کی جلد ڈیجیٹل قرعہ اندازی عمل میں لائی جائے گی جبکہ 4ماڈل ایگری مالز اکتوبر میں آپریشنل ہو جائیں گے۔ زرعی گریجویٹس انٹرن شپ پروگرام کے تحت مزید 2ہزار نوجوانوں کی بھرتی کا عمل مکمل ہو گیا ہے۔

کراچی : ملیر ندی میں طُغیانی اور پانی کے تیز بہاؤ سے کورنگی کراسنگ ندی اور کاز وے تیسرے روز بھی ٹریفک کے لئے بند رہے ۔ بروکس چورنگی، جام صادق پُل، قیوم آباد چورنگی اور۔ اطراف کی سڑکوں پر شدید ٹریفک جام رہا۔رپورٹ کے مطابق قیوم آباد چورنگی، جام صادق پل، ایکسپریس وے ، بروکس چورنگی، ڈیفنس سگنل پر بدترین ٹریفک جام ہوا، گاڑیوں کی لمبی قطاریں لگ گئیں، منٹوں کا سفر گھنٹوں میں تبدیل ہوگیا ، جب کہ ٹریفک جام میں پھنسے شہریوں کا اپنی منزل پرپہنچنا محال ہو گیا۔ٹریفک پولیس نے کہا کہ کورنگی کراسنگ ندی او ای بی ایم کازوے ندی ٹریفک کے لیے بند ہونے سے ٹریفک کا دباؤ قیوم آباد چورنگی اورجام صادق پل پر پڑنے سے صورتحال خراب ہوئی، ٹریفک پولیس موقع پرموجود رہی اور صورتحال کوکنٹرول کرنے کی کوشش کرتی رہی ۔قیوم آباد کے پی ٹی انٹر چینج فلائی اوور پر بھی بدترین ٹریفک جام تھا، گاڑیوں کی لمبی قطاریں لگی رہیں۔ وزیراعلیٰ سندھ سید مراد علی شاہ نے شہر میں ٹریفک جام کا نوٹس لیتے ہوئے قیوم آباد، کورنگی اور ملحقہ علاقوں میں ٹریفک مسائل فوری حل کرنے کی ہدایت کی۔وزیراعلیٰ سندھ نے کورنگی کراسنگ اور ای بی ایم کازوے بند ہونے پر صورتحال کی رپورٹ طلب کرلی۔وزیراعلیٰ کو ڈی آئی جی ٹریفک پولیس کراچی پیر محمد شاہ نے تفصیلی بریفنگ دی اور بتایا کہ برساتی پانی کے تیز بہاؤ کے باعث کورنگی کراسنگ اور ای بی ایم کازوے ٹریفک کے لیے بند ہیں، کورنگی کراسنگ اور ای بی ایم کازوے بند ہونے سے قیوم آباد چورنگی اور جام صادق پل پر ٹریفک کا شدید دباؤ ہے ۔وزیراعلیٰ سندھ کو آگاہی دی گئی کہ ٹریفک پولیس موقع پر موجود ہے ، صورتحال کو قابو کرنے کی کوشش کی جا رہی ہے ۔ مراد علی شاہ نے ہدایت دی کہ شہریوں کو متبادل راستے فراہم کیے جائیں، رہنمائی کے لئے اضافی نفری تعینات کی جائے ۔وزیراعلیٰ سندھ نے کمشنر کراچی اور ایڈمنسٹریٹر کے ایم سی کو ٹریفک پولیس کے ساتھ مکمل تعاون کی ہدایت کی۔

اسلام آباد:سپیکر قومی اسمبلی سردار ایاز صادق نے کہا ہے کہ نشانِ حیدر کے حامل قومی ہیرو میجر راجہ عزیز بھٹی شہیدؒ کی جرٔات اور قربانی ہمیشہ قوم کے لیے مشعلِ راہ رہے گی۔شہیدؒ نے دشمن کے سامنے سیسہ پلائی ہوئی دیوار بن کر مادرِ وطن کا دفاع کیا اور اپنی جان کا نذرانہ پیش کر کے ایسی مثال قائم کی جو ہمیشہ تاریخ کے سنہری اوراق میں لکھی جائے گی۔ ڈپٹی سپیکر قومی اسمبلی سید غلام مصطفیٰ شاہ نے بھی اپنے پیغام میں کہا کہ میجر راجہ عزیز بھٹی شہیدؒ نے آخری دم تک مادرِ وطن کی حفاظت کا جو لازوال کردار ادا کیا وہ پوری قوم کے لیے قابلِ فخر ہے۔

لاہور:سرکاری ریٹ لسٹ کے مطابق 7 سبزیوں کے نرخ بڑھے، سبزیاں سرکاری نرخ ناموں کے برعکس مہنگی فروخت کی جاتی رہیں، انتظامیہ قابو پانے میں ناکام رہی، سبز منڈیوں، پوش علاقوں اور گلی محلوں کے نرخ الگ الگ وصول کئے جاتے رہے۔پیاز سرکاری ریٹ لسٹ میں 80 روپے کلومقرر ، درجہ اول خشک پیاز کی فروخت پرچون بازاروں میں 120 روپے تک ،ٹماٹر سرکاری قیمت 140 روپے کلو مقرر ،تاہم درجہ اول ٹماٹرکی فروخت پرچون بازاروں میں 200 روپے فی کلو تک ، لہسن سرکاری قیمت 285 روپے کلو مقرر ، درجہ اول لہسن پرچون مارکیٹ میں فروخت 440 روپے فی کلو تک،ادرک سرکاری قیمت 470 روپے مقرر کردی گئی ، ـ مارکیٹ میں ادرک 600 روپے کلو تک ،سبز مرچ سرکاری ریٹ لسٹ میں 140 روپے کلو ، مارکیت میں 200 روپے فی کلو تک ،لیموں سرکاری ریٹ لسٹ میں 125 روپے کلو مقرر، مارکیٹ میں لیموں 200 روپے کلو تک ،ٹینڈے دیسی سرکاری ریٹ لسٹ میں 200 روپے مقرر، مارکیٹ میں معیاری ٹینڈے دیسی 350 روپے کلو تک ، آلو کچا چھلکا سرکاری ریٹ لسٹ میں قیمت 85 روپے کلو مقرر ، مارکیٹ میں 120 روپے فی کلو تک ،کھیرا سرکاری ریٹ لسٹ میں 80 روپے مقرر ، مارکیٹ میں فروخت 120 روپے کلو تک، کریلے سرکاری ریٹ لسٹ میں 200 روپے کلو مقرر، تاہم مارکیٹ میں 250 روپے کلو تک ،پالک 5 روپے بڑھاکر ریٹ لسٹ میں 60 روپے کلو مقرر، مارکیٹوں میں فروخت 150 روپے کلو تک ،بند گوبھی سرکاری قیمت 120 روپے کلو مقرر، فروخت 180 روپے تک، پھول گوبھی سرکاری قیمت 170 روپے کلو ، فروخت پرچون بازاروں میں 220 روپے فی کلو تک ، شلجم سرکاری ریٹ لسٹ میں 80 روپے کلو مقررکیا گیا،مارکیٹوں میں 150 روپے کلو تک ، بھنڈی 10 روپے بڑھاکر سرکاری ریٹ لسٹ میں قیمت 180 روپے کلو مقرر، تاہم فروخت پرچون مارکیٹوں میں 220 روپے کلو تک ، شملہ مرچ 10 روپے بڑھاکر سرکاری ریٹ لسٹ کی قیمت 180 روپے کلو مقرر ، پرچون مارکیٹس میں فروخت 240 روپے فی کلو تک ، اروی 10 روپے مہنگی کرکے سرکاری قیمت 110 روپے کلو مقرر ، پرچون میں فروخت 150 روپے فی کلو تک ، گاجرچائنہ 10 روپے بڑھا کر سرکاری قیمت 160 روپے کلو مقرر ، پرچون بازاروں میں فروخت 200 روپے فی کلو تک، گھیا کدو سرکاری ریٹ لسٹ میں 100 روپے کلو مقرر، پرچون بازار میں فروخت 260 روپے تک، گھیا توری 10 روپے بڑھاکر سرکاری ریٹ لسٹ میں 180 روپے کلو مقرر، مارکیٹ میں 240 روپے کلو تک بک رہا ہے۔

کراچی: یم کیوایم پاکستان نے سندھ کے شہری علاقوں کے مسائل پرعدالتوں سے رجوع کرنے کا فیصلہ کر لیا۔ایم کیو ایم پاکستان کے چیئرمین خالد مقبول صدیقی نے شہری مسائل اورعوامی مشکلات کےازالے کیلئے قانونی چارہ جوئی کی ہدایت کر دی۔ایم کیو ایم مرکز بہادرآباد میں اس سلسلہ میں اہم اجلاس ہوا جس میں قانونی اقدامات پر مشاورت مکمل کر لی گئی۔اجلاس میں لیگل ایڈ، گریجویٹ فورم، مرکزی ذمہ داران اور منتخب نمائندوں نے شرکت کی، اجلاس میں جلد شہری تنظیموں اور اہم شخصیات کو فیصلے پر اعتماد میں لینے کا فیصلہ کیا گیا۔

راولپنڈی : کمشنر راولپنڈی ڈویژن انجینئر عامر خٹک کی زیر صدارت گلریز کالونی کے نمائندگان، متعلقہ اداروں کے سربراہان کا اجلاس ہوا۔اجلاس میں ایڈیشنل کمشنر کوآرڈینیشن، ڈی جی آر ڈی اے، سول ڈیفنس، واسا، آر ڈبلیو ایم سی اور دیگر اداروں کے سربراہان نے شرکت کی۔ کمشنر نے کہا کہ عوامی خدمت میں کوتاہی کسی صورت برداشت نہیں کی جائے گی، انہوں نے ہدایت کی کہ گلریز کے عوام کو صاف اور معیاری پانی کی فراہمی کیلئے علاقے میں فلٹریشن پلانٹس فوری طور پر فعال کیا جائے اور نئے پلانٹس کا پروپوزل تیار کیا جائے، واسا اور آر ڈبلیو ایم سی کو تاکید کی گئی کہ علاقے میں صفائی ستھرائی کے کام کو مزید مؤثر بنایا جائے۔ تاکہ شہریوں کو بہتر ماحول فراہم ہو۔ تمام سٹیک ہولڈرز کے ساتھ مسلسل رابطہ اور مشاورت کو یقینی بناکر مسائل بروقت حل ہوں۔ کمشنر نے مزید ہدایت کی کہ انتظامی یا آر ڈی اے سطح پر کسی بھی مسئلے یا درخواست کو زیر التواء نہ رکھا جائے اور عوامی سہولت کے منصوبوں کو بروقت مکمل کیا جائے۔